LEXO PA REKLAMA!

SHKARKO APP

Inceneratorët nuk mund të jenë dosja “Hermes”

2022-10-18 15:23:00, Editorial CNA

Inceneratorët nuk mund të jenë dosja “Hermes”

Dy inceneratorë të ndërtuar, ai i Tiranës dhe i Fierit, të cilët janë jashtë funksionit, por që vlera e tyre sipas kontratave fillestare shkon 50 milionë euro dhe bashkë me TVSH-në shkon afërsisht 60 milionë euro.

Një tjetër kontratë 30-vjeçare koncensionare rreth 430 milionë euro, por që në fakt sipas shifrave të ekspertëve dhe përllogaritjeve që bëhen, mund të shkojë dhe dyfish, sepse studimi i fizibilitetit apo plani i biznesit, ofruar nga vetë kompania, ka rezerva të mëdha fitimesh të deklaruara.

Përllogaritjet vijnë nga shifrat, në gati 4 vite.

Inceneratori i Tiranës ka marrë rreth 50 milionë dollarë, vetëm nga qeveria shqiptare dhe Bashkia e Tiranës si transferta të pakushtëzuara, pa folur për dhjetëra miliona dollarë të tjera, të ardhura nga fitime, që vijnë nga biznesi, pra nga mbledhja dhe përpunimi i dherave.

 

Inceneratorët nuk mund të jenë dosja “Hermes”
Inceneratori i Tiranës

Shitja e të gjithë zinxhirit të riciklimit, plastika, kauçuku, hekuri, etj., duke shtuar këtu edhe mbetjet që shkojnë nga Durrësi.

Pra, gjithçka nuk fillon dhe nuk mbyllet me një biznes plan apo një projekt të dorëzuar në qeveri prej 430 milionë eurosh.

Qindra miliona euro, një ministër pas prangave, një sekretar i përgjithshëm shkon në arrest shtëpie, dhjetëra të thirrur në prokurori.

Inceneratorët nuk mund të jenë dosja “Hermes”
Lefter Koka

Dosja e inceneratorëve është një aferë korruptive, ka një Komision Hetimor Parlamentar, ka persona të akuzuar, por ende nuk është hapur “kutia e pandorës”.

Nuk është hapur kontrata, nuk është mbyllur hetimi dhe nuk janë kryer veprimet e Prokurorisë për inceneratorin e Tiranës, i cili duhet theksuar se nuk ekziston.

Inceneratorët nuk mund të jenë dosja “Hermes”
Alqi Bllako

Jemi më shumë se 5 vite pas firmosjes së kontratës më 31 gusht 2017 dhe në tetor të 2022-shit, ende në Tiranë nuk ka inceneratorë.

Justifikimet janë se leja e ndërtimit është dhënë me vonesë, leja e zhvillimit e të tjera si këto e deri te dorëzimi.

Në fakt kompania ka kryer punime, pasi ka bërë deklarime te tatimet dhe dy janë rrugët: ose është ndërtuar sepse te tatimet është deklaruar TVSH-ja, ose nuk është ndërtuar.

Në fakt, deklarimet në TVSH rezultojnë përpara dhënies së lejes zyrtarisht nga qeveria, çka do të thotë se është ndërtuar pa leje.

Gjithsesi, përtej këtyre pikave delikate të një afere korruptive dhe një denoncimi publik të bërë vazhdimisht nga media, për të cilin u detyruan të flasin edhe ato televizione apo media, të cilat paguheshin sistematikisht me qindra mijëra euro në vit, kompani edhe me miliona, siç është rasti i aferës dhe blerjes e kthimit të aksioneve të “Lori Caffe”-së.

Inceneratorët nuk mund të jenë dosja “Hermes”

Por personazhet e përfshira janë disa: Stela Gugallja në kërkim, Klodian Zoto, bashkëjetuesi i Stelës, Mirel Mërtiri, i cili shfaqet kudo sa në kompaninë Air One, sa në Zimbabve, apo në letra të çuara në kompani të tjera në emër të kompanisë në Holandë, ajo që është mëma e inceneratorit të Tiranës.

Inceneratorët nuk mund të jenë dosja “Hermes”
Klodian Zoto dhe Stela Gugallja (Foto ilustruese)

E të gjitha këto para, që përmendëm më lart paguhen nga taksat e shqiptarëve dhe shkojnë në llogari të Klodianit, Stelës dhe kompanisë në Holandë, e cila është shpërndarë në të gjithë botën, duke e quajtur Shqipërinë një histori suksesi.

Në fakt është një histori me një ministër në burg, që po përpiqet të mbahet qetë-qetë nga SPAK-u.

Inceneratorët nuk mund të jenë dosja “Hermes”
Arben Kraja, kreu i SPAK-ut

Vetë Arben Kraja ka deklaruar se është voluminoze dosja.

Në fakt, nuk ka nevojë për gjurmët kur është ujku. Mjafton të shkojnë në Sharrë, të shikojnë punimet e kryera, faturat, tatimet, volumin, krahasimet dhe gjithçka është lehtësisht e zbuluar.

Pa folur më tej për personat e angazhuar, të përfshirë, kush menaxhon atje, si u gënjye nga ata që u pyetën në Komisionin Hetimor Parlamentar, e kështu me radhë.

Por çfarë po tenton SPAK-u?

SPAK-u ndoshta po tenton ta kthejë dosjen e inceneratorëve si dosjen “Hermes”.

Ka qenë një dosje e famshme e denoncuar nga opozita, para vitit 2005, në lidhje me interkonjeksionin dhe impulset e AlbTelecom-it, atëherë kompani publike.

Në këtë historinë e atëhershme janë përfshirë edhe disa personazhe, të cilët janë dhe sot tek inceneratorët, punonin “rastësisht” tek AlbTelecom.

U hapën dosje hetimore, u mbyllën, u parashkruan, tashmë kanë kaluar 18 vjet nga ajo histori. Dokumentet përpiqen të zhduken, por diku gjurmët janë.

Një histori që është mbyllur, por një histori që nuk harrohet, e cila na bën të kemi kujdes dhe të kujtojmë se SPAK-u sot, mund të kërkojë ta kthejë dosjen e inceneratorëve ashtu siç u kthye dosja “Hermes” dje, ku të gjithë dolën të paqtuar, disa rrëmbyen paratë e kështu me radhë.

Më pas lindën po këta individë, shkuan në Maltë, apo shkuan në Bullgari, u regjistruan si rezidentë, bënë skema kompanish nga Holanda e kështu me radhë.

Gjithsesi, inceneratorët nuk mund të kthehen në dosjen “Hermes”. Kjo tashmë është e qartë, pasi disa nga firmëtarët janë brenda, por në fakt zbatuesi, projektuesi i këtyre historive, i cili dihet nga të gjithë, ende nuk ka marrë përgjegjësinë ligjore, por ka filluar me sa duket të “luftojë me drejtësinë”, për ta kthyer dosjen e inceneratorëve, si dosjen “Hermes” dikur.

Inceneratorët nuk mund të jenë dosja “Hermes”
Mirel Mërtiri (Foto ilustruese)

Por, ky njeri, i cili nuk është më një enigmë, nuk do të mundet dot ta bëjë këtë, pasi nuk ka SPAK që të shpëtojë, një tufë të korruptuarish, hajdutësh politikanë, dhe ushtarët e tyre që zbatojnë skemat korruptive, apo ia kanë ofruar vetë politikës, të shpëtojnë të palarë nga kjo histori, apo të paprekur në një qime floku, çfarëdolloj imuniteti, apo çfarëdolloj pasurie që të kenë.

Koha tregoi se dosja e inceneratorëve, u tentua të mbyllet, por ajo u hap.

Sërish po kërkohet të kalohet në heshtje, por nuk ka për t’u mbyllur.

Derisa personi i fundit, i cili ka futur një qindarkë në xhep nga taksat e shqiptarëve, nga ato që janë vjedhur nga inceneratorët që nuk ekzistojnë si në Tiranë, apo që kanë mbushur me para ministra e kanë korruptuar deputetë, media e të tjerë si këto, nuk ka për t’u mbyllur kurrë pa marrë përgjegjësi ligjore dhe nuk ka për t’u parashkruar e nuk ka për t’u harruar.

Pasi ndoshta shpresojnë që të kalojnë 10 vjet dhe gjithçka të mbyllet, por inceneratori i Tiranës është firmosur në gusht të 2017-s.

Dhe në qoftë se pretendojnë se leja është dhënë 2 vjet me vonesë, duhet të kenë parasysh se nuk mbyllen dot procedurat deri në vitin 2029. Pra, të gjithë që shpresojnë dhe mendojnë se dosja “Hermes” do të jetë shembulli që do të ndjekë edhe dosja e inceneratorëve.

Pra, do të ketë dhe kjo dosja të njëjtin fat, si ajo e para 17 viteve, por duket qartazi se e kanë shumë gabim ose llogaritë i kanë bërë pa hanxhinë./CNA.al

Lajmet e fundit nga