Inceneratorët/ Hajdari: Të hetohet Rama, është test shumë i madh për SPAK-un

6 Korrik 2022, 22:27, Politikë CNA

Inceneratorët/ Hajdari: Të hetohet Rama, është test

Ish-deputetja, Rudina Hajdari

Ish-deputetja, Rudina Hajdari, akuzon mazhorancën se po vjedh në mënyrë të jashtëzakonshme për të pasuruar veten, familjet dhe një grup njerëzish afër tyre.

Ajo tha se logjika e çon se pa dijeninë e Edi Ramës nuk mendon se këto gjëra kanë ndodhur.

Duke u ndalur tek afera e inceneratorëve, duke deklaruar se këto kompani fiktive kanë marrë para dhe kjo skemë e gjitha ka marrë 48 milionë euro në këto vite nga buxheti i shtetit.

"Çdo ditë këto kompani fiktive paguhen nga buxheti i shtetit. Ku është Drejtoria e Tatimeve? Ku është policia në këtë mes? Nëse bën ndërtim pa leje i ke policët te dera e qytetarit të thjeshtë.

Ti bën gjithë këto transaksione, një kompani blen fruta ekzotike dhe shet beton, Drejtoria e Tatimeve çfarë ka bërë, ndërkohë që është bërë evazion fiskal. Si kanë operuar këto kompani?

Është shumë qartë se kjo skemë korruptive ka pasur shkelje syri nga institucionet e larta përfshi dhe Kryeministrin. Nëse nesër thotë se nuk ka pasur dijeni, Kryeministri jo vetëm duhet të dorëhiqet, por edhe duhet të hetohet.

Armën më të fortë në momentin që nxirret diçka kundrejt tij, e ka të luftojë. Futet në sulm duke menduar se mbrohet. SPAK-u e ka për detyrë të hetojë me imtësi se çfarë ka ndodhur.

Unë mendoj se janë lekë pushtetarësh që janë duke u strehuar në parajsa fiskale. Që kur mos të jenë aty, të jetojnë si lorda dhe sheikë, ndërkohë që kanë zhvatur buxhetin e shtetit. Është test shumë i madh për SPAK-un.

Nëse nuk ka rezultate reale është e kotë që kemi një strukturë të tillë, çfarë është zbuluar kohëve të fundit duhet të ketë tërheqje veshi ndaj Kryeministrit Rama qoftë edhe nga trupi diplomatik, se strukturat e tij janë të përfshira në këtë aferë.

Nuk duhet të presim vetëm SPAK-un. Të funksionojë sistemi i drejtësisë. 'Non grata' është sistem taktik demokratik, i cila vjen kur je një njeri i padëshiruar në një shtet të caktuar.

Nëse ka fakte të tilla për zotin Berisha, pres që drejtësia të veprojë dhe nëse ka vendim gjyqësor nuk do respektohej pastaj si kryetar i PD".

Lidhur me vendimin që pritet nga Gjykata e Apelit, deklaroi se nuk mendon se një vendim gjykate nuk mund të ketë efekt të caktuar në një parti, por vetëm mund të përçajë më shumë akoma.

Sipas saj, kjo do ishte në kurriz jo vetëm të PD-së, por të shqiptarëve se ndërkohë që PD copëzohet, nuk u shërben qytetarëve shqiptarë, por vetëm Edi Ramës.

"Nëse do ketë ndarje të dy grupimeve efektin përfundimtar do e kenë qytetarët dhe do shihet kush ka më shumë peshë në publik. Në gjithë këtë proces mendoj se jemi duke copëzuar.

Mendoj se gjykata duhet të përdorë një gjykim të pastër për të pasur një opozitë të shëndetshme, se nëse jemi të copëzuar, forcohet fuqia autokratike e Ramës.

7 korriku është një test për opozitën dhe do shikohet ku është fryma e opozitës. Që të kemi një lloj fryme që të përmbledhë pakënaqësitë e njerëzve"./CNA.al