Berisha: Rama dhe Agaçi, përgjegjës për inceneratorët/ Firmosën disbursimin e 420 milionë eurove në kundërshtim me ligjin

17 Tetor 2022, 14:29, Aktualitet CNA

Berisha: Rama dhe Agaçi, përgjegjës për

Kreu i PD-së, Sali Berisha, pas mbledhjes me drejtuesit e qarqeve është ndalur tek afera e inceneratorëve.

“Dua të denoncoj me forcën më të madhe paradoninë që po ndodh me aferën e inceneratorëve. Ju e patë njeriu absolut i dytë më përgjegjës për këtë aferë 420 milionë hyri dhe doli serbes sikur të ishte në një kafene te SKAP-i i partisë”, ka thënë Berisha.

Sipas tij, qytetarët duhet ta dinë se paratë e taksave të tyre u dhanë pikërisht nga firma e kundërligjshme e Edi Ramës dhe Engjëll Agaçit.

“Engjëll Agaçin taksapaguesit shqiptarë e paguajnë vetëm e vetëm që t'i thotë kryeministrit dhe Këshillit të Ministrave që ata firmosin, përputhen apo nuk përputhen me ligjin.

Engjëll Agaçi, megjithëse enti i specializuar kombëtar i prokurimeve i drejtuar nga Eduart Ahmeti i bëri shkresë se procedura e prokurimit është e paligjshme është prokurim me negociatë të mbyllur, ai përgatiti aktin për të dhënë fondet për këtë prokurim të paligjshëm i cili në rast se Agaçi bllokonte fondet shndërrohej në një letër të vdekur të pavlerë.

Ai tenton të lajë duart si pilati dhe të thotë se tenderin e shpalli ministri kurse ky me vetëdije të plotë se procedura e tenderit ishte në kundërshtim me ligjin, bashkë me Edi Ramën firmosën disbursimin e parave vetëm e vetëm se ata ndanin para me valixhe në këtë aferë monstruoze.

Agaçi dhe vetëm Agaçi mund të realizonte 17 procedura në 24 orë. Përveç Agaçit një gjë të tillë mund ta bënte vetëm kryeministri i vendit.

Askush tjetër në vend nuk ka fuqinë ekzekutive për të urdhëruar të gjitha agjencitë që me emergjencë brenda 24 orëve të dorëzojnë 17 akte për procesin e kontraktimit të një kompanie që nuk plotësonte asnjë kusht.

Engjëll Agaçi dhe Edi Rama janë fajtorët më kryesorë pasi firmosën disbursimin e shumave shumëmilionëshe, kujt, një kompanie që sapo ishte krijuar e nuk plotësonte asnjë kriter ligjor si e tillë për t’ju besuar ndërtimi i inceneratorëve.

Plotësonte si kriter të vetëm një kompani false e Edi Ramës dhe Engjëll Agaçit, Arben Ahmetajt dhe Erjon Veliajt për t'i vjedhë shtetit dhe taksapaguesve shqiptarë qindra miliona euro”, është shprehur Berisha./CNA.al