web counter
LEXO PA REKLAMA!

SHKARKO APP

App Store
Google Play

E fundit!

x

SPAK-u nuk mund të harrojë inceneratorët/ Ku shkuan paratë e shqiptarëve?

29 Qershor 2022, 10:06, Editorial CNA

SPAK-u nuk mund të harrojë inceneratorët/ Ku shkuan paratë e

Prokuroria e Posaçme Kundër Krimit të Organizuar dhe Korrupsionit, e njohur ndryshe si SPAK, një ndër organet e reja të drejtësisë, është trumbetuar fort nga politika shqiptare, por edhe ka pasur një mbështetje të plotë nga partnerët ndërkombëtarë.

SPAK është parë si shpresë për shqiptarët, që më në fund të gjejnë drejtësinë e munguar. Që më në fund të goditet krimi dhe korrupsioni, në nivelet e larta.

Por, çfarë ndodh

SPAK, ka përballë gurin e provës. Dosja e inceneratorëve është “patatja e nxehtë”, në duart e prokurorëve të SPAK, të cilët kanë mundësinë t’iu tregojnë shqiptarëve, se janë vërtetë në lartësinë e pretenduar.

Dosja e inceneratorëve, është një ndër koncesionet më të akuzuara në Shqipëri.

SPAK-u nuk mund të harrojë inceneratorët/ Ku shkuan paratë e

Gjithçka fillon në vitin 2014, pra me ardhjen e Rilindjes në pushtet, ku për dy vite firmosen tre kontrata koncesionare, 22 milionë euro në Elbasan, 28 milionë euro në Fier dhe 128 milionë euro në Tiranë.

Por, që në shifra reale, sipas përllogaritjeve të ekspertëve, taskapaguesve shqiptare pritet t'u kushtojë deri në 600 milionë euro.

Çështja e inceneratorëve tashmë është në duart e drejtësisë. SPAK-u ka hetuar inceneratorin e Elbasanit, dhe atë të Fierit, por ende nuk është hapur dosja e Tiranës, ku duket se zullumi është edhe më i madh.

SPAK nuk mund të mjaftohet vetëm me dosjen e Fierit dhe Elbasanit.

Dosja e inceneratorëve duhet të hetohet nga fillimi, deri në fund dhe çdo person i përfshirë duhet të dalë para drejtësisë, qoftë ky edhe në godinën e Kryeministrisë.

SPAK-u duhet të hetojë vendimin e një dite në Kryeministri, ku për 24 orë, me një shpejtësi të rrufeshme, u mblodhën 14 mendime ministrish.

SPAK-u nuk mund të harrojë inceneratorët/ Ku shkuan paratë e

Nga ana tjetër, kujtojmë këtu se CNA.al ka publikuar një dosje të plotë, me dokumente dhe investigime të plota në lidhje me tre inceneratorët, ku bëhet fjalë për një seri kompanish në ortakëri me njëra-tjetrën, deri edhe kompani të regjistruara në parajsa fiskale.

Këto duhet të jenë në duart e SPAK-ut, i cili duhet të hetojë se ku kanë shkuar paratë e taksapaguesve shqiptarë.

SPAK-u nuk mund të harrojë mediat

Nga ana tjetër, duket se në këtë aferë, “thelën” e tyre e kanë marrë edhe mediat.

Sipas dokumenteve të publikuara nga CNA.al, gazetarë, media, deri edhe portale periferike kanë marrë para nga kompanitë që kanë marrë me koncesion inceneratorët në Shqipëri.

Që nga mediat e Irfan Hysenbelliut, Carlo Bollinos, Endrit Habilajt, apo deri edhe tek “Doktori” i Spitalit Amerikan, Baton Haxhiu kanë marrë pagesa rregullisht nga kompanitë që kanë marrë me koncesion inceneratorët në Shqipëri. Para këto të justifikuara si reklama.

Por, se çfarë reklamon një landfill apo pse duhet të reklamojë një kompani monopol, këtë duhet të sqarojnë para drejtësisë.

Për të mos folur deri edhe ortakëritë në media. Kujtojmë këtu rastin e aksioneres së Top Channel, Vjollca Hoxha, e cila del në ortakëri me pronarët e inceneratorëve, në të paktën dy kompani.

Së pari është Valtelina Kafe, e cila i ka shitur 51% të aksioneve, EM Capital Group, një kompani në pronësi të pronarëve të inceneratorëve.

SPAK-u nuk mund të harrojë inceneratorët/ Ku shkuan paratë e

Dhe një kompani e dytë, Kudo Pay, ku Vjollca Hoxha del në ortakëri me Stela Gugallën. Kjo e fundit tashmë e shpallur në kërkim nga drejtësia.

SPAK-u nuk mund të harrojë inceneratorët/ Ku shkuan paratë e

SPAK-u nuk mund të harrojë inceneratorët/ Ku shkuan paratë e

Tentakulat në Afrikë

Por, ndërkohë CNA.al së fundi ka publikuar të tjera dokumente, që tregojnë shtrirjen e tentakulave të inceneratorëve, në shumë vende të botës, në Afrikë apo Lindjen e Mesme, duke përdorur Shqipërinë si “trampolinë”.

Duke shitur si “histori suksesi” rastin e Shqipërisë, kompania që qëndron në majën e piramidës që ka marrë koncesionin e inceneratorëve në Shqipëri, po “shëtit” në shumë vende të botës.

Që nga Iraku, Zimbabve apo deri edhe në Ganë.

Për më tepër, në dokumente del edhe Mirel Mërtiri.

Së pari, doli që Mirel Mërtiri ka qenë drejtor i kompanisë “Integrated Technology Services”. Kjo e fundit kompania që ka marrë koncesionin e inceneratorit të Tiranës.

Gjithashtu, emri i Mirel Mërtirit dilte si administrator edhe në kompaninë "ER One Albania", ku bashkëjetuesja e tij Stela Gugallja është ortake me "Energy Recuperator", e cila ka si ortakë dy shtetas italianë, Ernesto Granelli dhe Mario Granelli.

Më tej, është dokumenti i publikuar nga CNA.al, ku Mirel Mërtiri del si negociator i "Geogenix B.V", në Zimbabve.

Dokumenti i dytë, është në Irak. Në vitin 2019, Mirel Mërtiri shfaqet drejtpërdrejt me firmën e tij në Irak, si përfaqësues i kompanisë "Integrated Energy B.V.".

Ndërkohë, së fundi emri i tij del edhe në një akt noterial, për të hapur llogari apo për të transferuar para në Zvicër.

Në dokumentin e tretë, të publikuar nga CNA.al, kompania "Integrated Energy B.V.” autorizon Mirel Mërtirin të transferojë paratë në Zvicër.  

Pra, inceneratorët nuk mund të harrohen nga SPAK. Por, duhet hetuar çdo qindarkë e paguar, nga paratë e taksapaguesve shqiptarë.

Tashmë kanë kaluar rreth tetë vite nga firmosja e kontratave koncesionare dhe janë paguar miliona euro nga taksat e shqiptarëve. Dhe sot që flasim në Shqipëri kemi dy inceneratorë që nuk funksionojnë, në Fier dhe në Elbasan, ndërsa në Tiranë nuk ka incenerator. Por, vetëm një landfill.

SPAK duhet të hetojë ku shkuan paratë e shqiptarëve dhe çdo qindarkë, duhet t’iu kthehet në buxhetin e shtetit. /CNA.al

 





Lajmet e fundit nga