Kush e vuri në rrezik Xhuljana Dumanin/ Autorët që fshihen pas institucioneve

22 Qershor 2022, 14:23, Editorial CNA

Kush e vuri në rrezik Xhuljana Dumanin/ Autorët që fshihen pas

Foto ilustruese

Pesë ditë më parë, CNA.al, raportoi mbi një skandal që ishte prodhuar në Ministrinë e Jashtme për t’u shtrirë edhe në institucione të tjera.

Motra e të penduarit të SPAK-ut, Nuredin Dumani, e punësuar pranë zyrave të shërbimit në Drejtorinë për NATO-n, që ndodhet në Ministrinë për Europën dhe Punët e Jashtme, ishte pajisur me certifikatë sigurie.

Gjithçka ka ndodhur në një kohë që vrasësi serial Nuredin Dumani ka rrëfyer për dhjetëra ekzekutime me pagesë, duke nxjerrë rreth 100 emra të botës së krimit.

Pavarësisht se Dumani ishte në arrati për disa vite dhe konsiderohej si lider i një grupi vrasësish me pagesë, motra e tij, Xhuljana Dumani, ishte punësuar në Ministrinë e Jashtme, madje i janë besuar edhe informacione sekrete të NATO-s dhe jo vetëm.

Xhuljana Dumani është pajisur me certifikatë sigurie të nivelit të dytë, “sekret shtetëror” për NATO-n me 6.06.2022.

Zyra ku është 'gatuar' certifikata e sigurisë për Xhuljana Dumanin, gjatë kësaj periudhe dyshohet se është zyra Juridike dhe e Shërbimeve në Ministrinë e Jashtme, që drejtohet nga Etleva Haka.

Drejtoresha e Zyrës Juridike dhe e Shërbimeve në Ministrinë e Jashtme, Etleva Haka

Për të vijuar më tej me Drejtorinë e Sigurimit të Informacionit të Klasifikuar, institucion që ky mbledh informacione nga institucione të tjera, si SHISH, Ministria e Brendshme apo edhe Policia.

Pas publikimit të skandalit, pati një reagim nga Ministria e Jashtme, që Xhuljana Dumanin e cilësonte si praktikante, dhe për mënyrën se si i është dhënë certifikata e sigurisë, nuk fliste fare.

Reagim pati edhe nga vetë Xhuljana Dumani, e cila është më e pafajshmja në këtë skandal dhe që bënte thirrje se i rrezikohej jeta.

Kush e vuri në rrezik Xhuljana Dumanin/ Autorët që fshihen pas

Thirrja e saj ishte kambanë alarmi për SPAK-un fillimisht e më tej, për Etleva Hakën, DSIK-un dhe SHISH-in.

Këta të fundit, jo vetëm kanë vënë rrezik sigurinë kombëtare dhe sigurinë e NATO-s, por edhe jetën e Xhuljana Dumanit.

24-vjeçarja, për shkak të të vëllait është lehtësisht e shantazhueshme.

Autorët që e vunë në rrezik jetën e saj, dhe që dyshohet se janë Etleva Haka, nga Ministria e Jashtme, Dorian Tola dhe Mark Ndreca nga DSIK apo dhe Helindon Bendo nga SHISH nuk kanë reaguar, duke e thelluar edhe më tej skandalin.

Për më tepër reagim nuk ka as nga Struktura e Posaçme Antikorrupsion, që në një vend normal do të kishte nisur hetimet ndaj institucioneve që kanë lëshuar sekretet në duart e motrës së një vrasësi serial./CNA.al