web counter
LEXO PA REKLAMA!

SHKARKO APP

App Store
Google Play

Si ta kuptojmë luftën antikorrupsion të Ramës me Komisionin e Posaçëm?

27 Maj 2024, 15:51, Editorial CNA

Kryeministri Edi Rama, sot i ka shkuar deri në fund valles së tij të lodhur për të ngritur një Komision të Posaçëm parlamentar, një komision, i cili ka shqetësuar ndërkombëtarët, në mënyrë të veçantë zyrën e BE-së në Tiranë.

Edhe ambasada e SHBA-së ka qenë e qartë duke thënë se në rast se do të ketë një luftë ndaj korrupsionit me reforma të mirëfillta, komisioni duhet të jetë bipartizan, pra duhet të jenë të përfshira të gjitha palët politike. (LEXO KETU)

Por mesa duket kryeministri Rama nuk ka ndërmend ta bëjë këtë, ai ka ndërmend t’i japë Erion Veliajt, Fatmir Xhafajn, në krye të komisionit për të ushtruar presion ndaj SPAK-ut dhe asgjë më shumë sesa kaq.

SHpresojmë që deri në kohën që do të bëhet gati Xhafaj për të bërë ndonjë reformë apo ndonjë ndryshim ligjor, Erion Veliaj mund të ketë kryer punë me ligjin.

Megjithatë, le të shikojmë një detaj.

Kush është morali i fabulës së Edi Ramës me këtë komision?

Lojtarët bien dhe makineria vazhdon dhe gllabëron, loja është e njëjta. Duket qartë se Edi Rama bën sikur do të bëjë reforma me antikorrupsionin, me antikrimin, ndërkohë që pushteti është i mbështetur mbi ta.

Pse theksohet ky fakt?

Sepse u desh hetimi i SPAK-ut për të ndaluar njerëzit e dosjes “5D” megjithëse ishin denoncuar, u desh SPAK-u për inceneratorët megjithëse ishin denoncuar, u desh SPAK-u për sterilizimin, u desh SPAK-u për koncesionet dhe për korrupsionin, u desh SPAK-u që Edi Rama ta kuptonte se ministrat e tij ishin hajdutë, u desh SPAK-u që të ikte zv.kryeministri, u desh SPAK-u që të shkojnë ministrat në rresht atje. Duhej SPAK për shtabin elektoral të Veliajt që jashtë fushate kanë rolin e drejtorëve hajdutë.

Si u bëka antikorrupsion vetëm me SPAK-un?

Si ka mundësi që kryeministri ynë nuk ka referuar në SPAK apo në prokurori një zyrtar të tijin, një ministër, një kryetar bashkie?

Doli denoncimi i dosjes “5D”, pse nuk hetoi Kryeministria?

Dolën aferat dhe skandalet e tjera, pse nuk shkoi Kryeministria t’i verifikojë faktet dhe dokumentet që nxirrnin mediat në lidhje me inceneratorët apo korrupsione të tjera?

Nuk ka asnjë referim të tijin në SPAK, ndaj është e vështirë të besohet se kryeministri ynë do të bëjë një luftë ndaj korrupsionit, kur deri tani ka 11 vite në pushtet. Çbëri këto 11 vite?  Mblodhi "kufomat e korrupsionit" që la SPAK? 

Ndonëse po bëhet gati për përfundimin e mandatit të tretë, ende nuk ka asnjë veprim, të paktën me akte parandaluese ndaj korrupsionit, sepse këto janë akte parandaluese që tregojnë edhe autoritetin e zyrës së kryeministrit, por nuk ka ndodhur.

Pse duhet ta bëjë Komisioni i Posaçëm i Fatmir Xhafajt? Me kë do të bëhet lufta ndaj krimit me komisionin, ecja përpara? Me këta që sollën Rilindjen në pushtet?

Si ta kuptojmë luftën antikorrupsion të Ramës me Komisionin
Fatmir Xhafaj

Bashkë me Ilir Metën që po hetohet nga SPAK-u? Me deputetët që ishin pjesë e Grupit Parlamentar të PS-së dhe tani po dalin në aplikacionin “Sky”, duke folur për vrasje me pagesë dhe për dhjetëra miliona euro pasuri? Me Babalet?

Çfarë është ky komision?

Një paradoks, një komision cinik, një provokim dhe një sinjal i qartë ndaj SPAK-ut për të bërë sa më shpejt dhe sa më fort detyrën sepse me komisione të tilla nuk bëhet luftë ndaj korrupsionit. Me komisione të tilla thjesht dhe vetëm lojtarët bien dhe hyjnë lojtarë të rinj, makineria vazhdon të gllabërojë.

Ndaj dhe ky komision nuk mund të jetë një betejë kundër korrupsionit, por ky komision është një betejë për të frenuar SPAK-un për të luftuar korrupsionin.

Për më tepër, kanë gjetur një hetues të diktaturës, enveristin e fundit në krah të 99-çave që doli paturpësisht pak ditë më parë në Parlament dhe mbrojti drejtorët hajdutë të Erion Veliajt, që të bëjë reformën kundër korrupsionit.

A e mund reformën kundër korrupsionit Fatmir Xhafaj?

Le t’i hetojë SPAK-u pasurinë, le t’i hapë kartelën Fatmir Xhafajt dhe atëherë do ta shikojmë se kush është ky i fundit, ndërkohë që po hetohet pasuria e Erion Veliajt.

Ndaj, komisione të tilla me këtë fabul nuk i beson kush se mund të luftojnë korrupsionin sepse korrupsioni është më këmbë dhe kryeministri, zyrat e tij, institucionet që ka në varësi mund ta luftojnë fort pa pasur nevojë të bëhen të tilla komisione, ashtu sikundër mund ta luftojë dhe krimin pasi ka pushtetin.

Në të dyja rastet, edhe korrupsioni, edhe krimi janë aty dhe nuk luftohen me Komisione të Posaçme, por me vullnet nga kryeministri, i cili duhet t’u kishte shtënë tmerrin varësve të tij  sepse ka zyrat antikorrupsion në kryeministri që çfarë bëjnë, asgjë më shumë, thjesht korrupsion si gjithë të tjerët.

Prandaj nuk luftohet korrupsioni me korrupsion, por korrupsioni luftohet me vullnet të qartë dhe të pastër politik, edhe me luftë ndaj krimit, edhe ndaj fenomeneve të tjera ndaj shoqërisë./ CNA

 





Lajmet e fundit nga