Sovraniteti, si strehë e delenxhinjve

23 Maj 2024, 18:23, Editorial CNA

Po ndodh shpesh e më shpesh që disa deputetë, sa herë që duhet të justifikojnë përdorimin e foltoreve të Kuvendit si çelës për zgjidhjen e halleve personale, ose kur duan që të ushtrojnë presion për halle personale ndaj institucioneve, i veshin vetes stofën e mbajtësit të sovranitetit të popullit.

Ka ndodhur kjo me deputetin Salianji, i cili beson se brenda kostumit të deputetit, nga njëra anë mund të thërrasë gjithë përfaqësuesit e shtetit që t’i japin atij llogari dhe nga ana tjetër, sa herë e kërkon Gjykata niset jashtë shtetit dhe mungon në seanca.

Tallja me Apelin/ “Babalja” prej 2 vitesh shtyn gjyqin
9 Nëntor, 13:23
“Babalja” i dënuar për shpifje, në prag të burgut / Seanca në Apel kthehet në telenovelë
19 Dhjetor, 09:46
Gjyqi ndaj “Babales”, një turp për Reformën në Drejtësi
7 Mars, 12:21

Ky shpërdorim i konceptit të sovranitetit të popullit, deri te Salianji edhe mund të falet, sepse në fund të fundit Salianji kur i duhen mend merr avokat!

Por kësaj liste deputetësh së fundmi ju shtua edhe deputeti Plarent Ndreca. Plarent Ndreca deri dje avokat, papritur paska kapur një copë sovraniteti.

Deputeti Ndreca, gjatë seancës së raportimit në Komisionin e Ligjeve të njërit prej organeve të drejtësisë, iu referua vetes dhe justifikoi sulmin ndaj Inspektoriatit të Lartë të Drejtësisë, me pretendimin se ai qenka mbajtës i sovranitetit të popullit.

Mbledhja e sotme në Komisionin e Ligjeve

Në një sulm personal ndaj një institucioni të drejtësisë, Plarent Ndreca kërkoi të fshihet pas popullit.

NË RENDET MODERNË, pushteti i popullit sovran ushtrohet sipas LIGJIT. Ai bazohet në pëlqimin e POPULLIT (SOVRANITET POPULLOR), i cili e ushtron atë nëpërmjet votimit të përfaqësuesve të tij.

Në sistemin tonë, qytetarët (populli) zgjedhin deputetët, kryetarin e bashkisë dhe përfaqësuesit e tjerë, të cilëve u japin pushtetin për të qeverisur.

Në këtë formë, populli e ushtron sovranitetin e vet.

Sovraniteti i popullit ushtrohet si nëpërmjet delegimit, nëpërmjet instrumentit të drejtpërdrejtë të referendumit ose me një sërë instrumentesh ligjore (p.sh. iniciativa legjislative), të cilat gjithmonë çojnë në delegim, sepse nëse një ligj nuk diskutohet nga Kuvendi, ai nuk bëhet dot efektiv.

Plarent Ndreca

Por kujdes!

Ligji duhet diskutuar nga Kuvendi! Jo nga Plarent Ndreca!

Nga ana tjetër, vullneti i popullit nuk mbaron tek delegimi, për faktin e thjeshtë se në demokraci - nëse pritshmëritë politike të komunitetit shpërfillen - deputetët mund të zëvendësohen me të tjerë, të zgjedhur nga komuniteti në bazë të nevojave dhe interesave reale të tyre.

Sovraniteti popullor nuk transferohet tek i zgjedhuri (Plarent) dhe as nuk pezullohet derisa i zgjedhuri të zëvendësohet me të tjerë (Plarenta) nga SOVRANI.

Përfaqësimi që merr Kuvendi nga Sovrani, nuk mund dhe nuk duhet të shërbejë si koncept mashtrues, siç ai po përdoret nga kategoria Ndreca-Salianji.

Ervin Salianji

Përfaqësimi nuk do të thotë që secili i zgjedhur ushtron vullnetin e popullit në mënyrë unitare.

Deputetët nuk janë përfaqësues të popullit, por janë politikisht përgjegjës ndaj popullit, si të zgjedhur nga populli gjatë ushtrimit të të drejtës së votës nga populli.

Nëse do ishin përfaqësues të popullit, atëherë do na duhej që të numëronim votat e secilit deputet dhe t’i jepnim secilit aq sovranitet sa mbartet nga pjesëza e popullit që e ka votuar atë individualisht.

Komuniteti, pra populli si i tërë përfaqësohet vetëm përmes Kuvendit sa herë që ky mblidhet për të vendosur.

Sovraniteti ushtrohet nëpërmjet shtetit, jo nëpërmjet Ndrecës apo larg qoftë Salianjit.

Me cilën cilësi deputeti Ndreca beson se po ushtron sovranitetin që i paska përcjellë atij populli?

Debat te Ligjet/ Ndreca përplaset me Artur Metanin: Nuk po shoh punën e ILD-së
23 Maj, 11:56

Cili popull? 500 votuesit që kanë votuar Ndrecën? Plarent Ndreca sot beson se mund të bëjë gallatë në Kuvend, sepse 500 shqiptarë i paskan transferuar atij sovranitetin individual?

Apo deputeti Salianji, që pasi paska futur në xhep sovranin beson se mund të sillet si prokuror me ca të tjerë që njëjtë si ai, (sipas logjikës Salianji-se), mund të pretendojnë që edhe ata kanë një copë sovraniteti nëpër xhepa!

Bile Salianjit populli bashkë me sovranitetin i paska dhuruar edhe të drejtën që t'i fshihet një pushteti të tërë, atij Gjyqësor.

Ervin Salianji

Por nëse Salianjit ju dashka sovraniteti që i paska dhuruar populli për t'ju fshehur, apo për t'i bërë presion Gjykatës, po Plarent Ndreca kujt po i bën presion?

Inspektoriati i Lartë i Drejtësisë nuk është organ që ushtron vendimmarrje direkte, ndaj e ka kollaj të ndihet imun ndaj sulmeve të Plarent Ndrecës. Po gjykatat dhe prokuroria që marrin vendime të drejtpërdrejta, sa imun mund të jenë ndaj sulmeve të tipit Ndreca?

A ishte sjellja e sotme e deputetit Ndreca prova gjenerale e asaj që do ndodhë nëse rezoluta Xhafaj miratohet në Kuvend?/ CNA