Erion Veliaj nuk e dinte

16 Maj 2024, 11:34, Editorial Elvi FUNDO

Kryebashkiaku i Tiranës, Erion Veliaj, i cili vetëquhet zdroms, nuk e di se çfarë ndodh në bashkinë e tij. Ai është një person i pafajshëm, një burrë i ndershëm, një njeri që nuk ka gënjyer kurrë në jetën e tij.

Ka virtyte, elokuent, i urtë, i mençur, i shkolluar në Amerikë, dijetar, poliglot, i rrallë në llojin e vet, vetëm ka një problem, ai nuk di.

Erion Veliaj nuk e di se çfarë ndodh në Bashkinë e Tiranës.

Ai është thjesht një kryetar që vjen vërdallë dhe firmos ndonjë letër, sepse Erion Veliaj nuk e dinte që drejtorët e tij ishin një tufë me hajdutë, të cilët i qarkullonte sa në një zyrë në një tjetër për performancë shumë të mirë dhe me ta kishte bërë një mijë punë të mira.

Thirrja e fundit e Erion Veliajt për mëshirë
6 Maj, 13:49
Erion Veliaj, kryetari i llumit
5 Maj, 11:02

Vetëm ai nuk e dinte se drejtorët ishin hajdutë të pangopur, se ka dhe nga ata të ngopurit, por hajdutët e lalit qenë të pangopur, por ky nuk kishte faj se nuk e dinte.

Nuk e dinte se kishte firmosur dhe kishte dhënë 4 leje pallatesh për hajdutët e bashkisë së tij sepse lali Eri firmos kot, nuk e di.

4 lejet e ndërtimit që Veliaj i ka dhënë "5D"-së

Erion Veliaj të merret me hajdutët, në asnjë mënyrë! Nuk ka faj ai, ka firmosur nja 5 tenderë, ca miliarda lekë, fundja aq janë, nuk e dinte lali. Edhe ato lejet më lart nuk i ka dhënë ai, i kanë dhënë drejtorët e tjerë që ishin lidhur me njëri-tjetrin, lali nuk e dinte.

5 tenderat që Veliaj i ka dhënë "5D"-së

Nuk e dinte lali se këta hajdutët i mbushën kutitë e votimit një vit më parë, e bënë kryetar bashkie. Nuk e di lali se ka 11,700 veta në punë, di ai se kush janë hajdutët?! Dhe nuk e di fare që këta 11,700 janë përdorur si patronazhistë në zgjedhje, i mbushën kutitë e votimit dhe në rresht i vinin këta hajdutë.

Nuk e di lali fare se çfarë ndodh në Bashkinë e Tiranës, edhe 3 vjet më parë kur jepte urdhrin se armata e institucionit të bënte Fatmir Xhafajn deputet. Nuk e ka idenë fare ai, edhe pse hajdutët i thërrisnin në apel punonjësit për votën e tyre ndaj ish-ministrit të dorëhequr për skandalin “Babale”, të cilin Erion Veliaj nuk e kishte parë, nuk e dinte dhe nuk e kishte dëgjuar. (Lexo këtu)

Fatmir Xhafaj dhe Erion Veliaj

Erion Veliaj nuk e di që në Bashkinë e Tiranës paguhen 10 milionë dollarë në vit për një incenerator që nuk ekziston. Erion Veliaj i lë lekët te dera sepse kështu e di ai që dërgohen lekët dhe lihen te dera e landfillit, se çfarë ndodh brenda ç’punë ka lali?!

Nuk e di Lali që Ajola, kuron instalacione tek landfilli dhe inceneratori që nuk ekziston.

Erion Veliaj nuk e di që në Tiranë ndërtohen kulla, janë 20 apo 30, ai nuk e di. Ai thjesht dhe vetëm kur thonë që e ka bërë filani apo fisteku e mëson për herë të parë. Erion Veliaj nuk e di që në Tiranë janë shembur shtëpi dhe pallate banorësh në shkelje të ligjit. (Lexo këtu)

Erion Veliaj nuk e di se në Tiranë është shembur një teatër totalisht në shkelje të ligjit.

Shembja e Teatrit Kombëtar

Erion Veliaj nuk e di se në Tiranë janë bërë tenderë fiktivë, në bashkinë e tij. Ai nuk e di se punonjësit e tij shkojnë dhe punojnë për llogari të firmave private, siç është rasti i “5D”-së. (Lexo këtu)

Erion Veliaj nuk di, ai është një djalë i ndershëm, i pastër, dinjitoz, korrekt, që në fund për shkak se nuk e di rrezikon të shkojë në burg, ose më mirë ai është sjellë para “kolegëve” të SPAK-ut sipas variantit

“unë e di që ti e di,

ti e di që unë e di,

pse ti bën sikur s’e di,

kur unë e di që ti e di dhe kur ti e di që unë e di”.

Erion Veliaj nuk e di, ai thjesht dhe vetëm është kryetar “i ndershëm” i Bashkisë së Tiranës. Këto janë fjalët e vërteta për një njeri si Erion Veliaj./ CNA