Mashtrimet e radhës të Veliajt

6 Maj 2024, 14:56, Politikë CNA

Erion Veliaj

Pasi kryeministri Edi Rama e "kryqëzoi" publikisht gjatë ceremonisë zyrtare të dhënies së titullit “Qytetar Nderi” i Tiranës për Ali Ahmetin, kryebashkiaku i Tiranës del publikisht dhe bën sikur nuk ka ndodhur gjë, sikur marrëdhënia e tij me kreun e qeverisë është shumë e mirë.

Në një intervistë për njërin nga televizionet e paguara nga inceneratorët, Veliaj është shprehur se nuk ka asnjë lloj konflikti me Edi Ramën. Madje ai ka theksuar se "opozitës po i bëhen gjunjët kallo", që këta të dy të kenë përplasje, por kjo nuk ka për të ndodhur kurrë.

Lali Eri vijon me propagandën e tij dhe kërkon të mbulojë të zezën mbi të bardhë. Por të gjithë e dimë dhe u pa qartë edhe gjatë ceremonisë se Rama e injoroi totalisht, madje i tha në sy të të gjithë se i vetmi që e risolli në bashki ishte Ali Ahmeti dhe se ndryshe nuk do të vinte.

Veliaj tashmë është në duart e SPAK-ut për aferat korruptive në Bashkinë e Tiranës dhe vijojnë hetimet, ndërkohë që kjo strukturë ka nisur edhe akuza penale ndaj këtij të fundit. Përveç injorimit, Rama e ka lëshuar totalisht Veliajn.

Por jo vetëm kaq, lali Erit nuk i ka dalë e keqja me foton e ceremonisë, pasi ai publikoi foton ku shfaqet bashkë me kryeministrin.

Por ky i fundit, në foton e publikuar në rrjetet sociale nuk shfaqi Veliajn, por vetëm Ali Ahmetin dhe familjarët e tij.

Por si justifikohet lali Eri?

"Perlë" është përgjigjja e tij, ai thotë se po bënte koreografinë e fotografisë, ndaj nuk u shfaq në foton e kryeministrit.

“Ajo është thellësisht qesharake sepse transmetimi i ceremonisë së nderimit të Ali Ahmetit ishte 'live'. Para se të largohej, familja e z. Ahmeti donte një foto me kryeministrin. Duket 'live' kur në atë moment po bëja edhe koreografinë e fotografisë. E bija e z. Ahmeti më thotë na u bashko për një foto të fundit. Nga 10 fotografë që ishin aty janë shkrepur disa qindra foto. As unë, Edi Rama jo e jo, nuk kemi komplekse të tilla. Nuk bëjmë as kështu lojërash. Ju kam thënë gjithmonë: unë i kam shërbyer PS-së, kam punuar me Edi Ramën edhe kur s’kam pasur asnjë spaletë, asnjë titull, nga 2009-2013, edhe pse humba për një grusht votash në Berat, sepse njerëzit që e kanë vokacion, i shërbejnë atij misioni pa qenë të interesuar nëse kanë ofiqe dhe karrige. Opozitës i kam thënë: do t’i bëhen gjunjët me kallo dhe do të luten deri në pafundësi të jetës që unë dhe Edi Rama të kemi konflikt dhe prej këtij konflikti të rikthehet Saliu me Ilirin. Kjo s’ka për të ndodhur kurrë”, u shpreh ai./CNA