web counter
LEXO PA REKLAMA!

SHKARKO APP

App Store
Google Play

Mblidhet asambleja e të pandehurve anti-SPAK

11 Shkurt 2024, 10:22, Editorial CNA
Mblidhet asambleja e të pandehurve anti-SPAK
Foto arkiv - Asambleja e PS-së

Partia Socialiste mblodhi Asamblenë, takime që po bëhen shumë të shpeshta në fakt. Një fjalim i gjatë i kryetarit prej 20 vitesh të PS, përjashtime, emërime dhe në fund Suksese në jetë.

Këtë herë është zgjedhur një Asamble me termin organizative. Shpesh kur ka pasur ngjarje të tilla politike brenda PS-së, kryeministri Edi Rama ka shpallur ndryshime ministrash, ndryshime statutore, përgatitje kongresesh nga fitorja në fitore e kështu me radhë.

Këtë herë Asambleja e Partisë Socialiste mund të quhet Asambleja e të pandehurve kundër SPAK-ut. Kjo, për dy fakte mjaft të thjeshta.

Të pandehurit e PS-së

Në Asamblenë e Partisë Socialiste bëjnë pjesë një grup të pandehurish nën akuzë nga SPAK-u, që nga ish-zv.kryeministri Arben Ahmetaj i larguar nga vendi, ish-ministrja jetëgjatë e Jashtme dhe e Mbrojtjes me plot skandale, Olta Xhaçka.

Ish-ministri i Shëndetësisë, i PPP-ve siç janë “check up”-i, sterilizimi apo laboratorët zoti Ilir Beqaj, ish-ministri Lefter Koka, i cili ishte deputet i PS-së në momentin kur u arrestua dhe me rregullin e ri të Asamblesë 400 veta.

Do të ishte anëtar i saj, ish-deputeti tjetër Alqi Bllako, i cili ishte përfaqësues i PS-së kur u arrestua, ish-ministri Damian Gjiknuri që është nën hetim, kryetarë bashkie si Fatos Tushe, Vagjush Dako, Lefter Alla, drejtorë të Rilindjes, të parët janë ata të Erion Veliajt (vetë kryebashkiaku ka halle me SPAK), por edhe shumë zyrtarë të tjerë socialistë, të cilët janë arrestuar për korrupsion, janë nën akuzë, dikush është dënuar dhe shumica presin dënimin.

Shkëlqejnë midis tyre njëri-tjetrit, por ka dhe të tjerë rrugës edhe më të rëndësishëm në propagandë, apo në peshë brenda PS-së.

Kjo është pjesa e të pandehurve të SPAK-ut, por është dhe pjesa anti-SPAK. Pjesa anti-SPAK, nën hije dhe rrogoz është e skematizuar nga Eduart Shalsi, “idioti” i dobishëm i Rilindjes, i cili me një grup individësh po përgatitin ngritjen e një komisioni “Ad-Hoc”.

Grupi anti-SPAK

Komisioni i Shalsit përbëhet nga Klotilda Bushka, Etilda Gjonaj, Bledi Çuçi dhe Lindita Nikolla, ndërsa komisioni “Ad-Hoc” do të drejtohej nga Fatmir Xhafaj me anëtarë Plarent Ndrecën, Ermonela Felajn, Klotilda Bushkën dhe Toni Gogun.

Ky grup individësh që fillimisht u shpall si grup anti-SPAK, por tashmë mesa duket duke parë qëndrime të ashpra nga ndërkombëtarët ujërat fillojnë dhe po kthjellohen, ka dhe hapa pas.

Betejën e filloi një tjetër anti-SPAK-ist, Erion Veliaj, kryebashkiaku i Tiranës, i cili është me probleme të mëdha përballë këtij institucioni, për shkak të drejtorëve të tij pas prangave, apo të tjerëve që pritet të arrestohen, dhe deri te fakti që dhe ai vetë pritet të jetë nën akuzë, pasi deri tani mbetet person i dyshuar.

Një anti-SPAK-ist tjetër, ai që do të kryesonte komisionin “Ad-Hoc” dhe do të udhëhiqte betejën kundër SPAK-ut dhe Altin Dumanit, Fatmir Xhafaj, pritet të jetë një person i rëndësishëm në Asamble.

Fatmir Xhafaj pasohet nga Klotilda Bushka, e cila ka marrë përsipër përgatitjen e draftit për komisionin “Ad-Hoc”, që në fakt tani duan ta quajnë një komision në kuadër të integrimit, megjithëse parlamenti ka një strukturë të posaçme për integrimin evropian, e cila për më tepër bashkëdrejtohet nga opozita.

Në këtë asamble do të jetë e gjithë eskorta që mbronte tezën anti-SPAK dhe do të shërbente në menaxhimin e tij si Elisa Spiropali, si 99-çat, si Plarent Ndreca, Ermonela Felaj, Klotilda Bushka dhe Toni Gogu dhe edhe juristët si Ulsi Manja, Etilda Gjonaj, Engjëll Agaçi, Adea Pirdeni, Bledi Çuçi dhe Damian Gjiknuri.

Asambleja e socialistëve sot ka me dhjetëra vetë, të cilët lehtësisht identifikohen si persona të pandehur nga SPAK-u dhe grupi anti-SPAK për të shpëtuar të pandehurit nën akuzë./ CNA





17:09 Editorial

ËSHTË KOHA E SPAK

Tani nga SPAK-u pritet vërtet më shumë. Ndërkombëtarët...

Lajmet e fundit nga