web counter
LEXO PA REKLAMA!

SHKARKO APP

App Store
Google Play

E fundit!

x

Miqtë e Putinit në Evropën Lindore/ Efekti i lodhjes po forcon sërish pozitat e Rusisë

4 Tetor 2023, 18:55, Blog CNA

Miqtë e Putinit në Evropën Lindore/ Efekti i lodhjes po forcon

Ne Kremlin po ngrihen dolli dhe festohet fitorja në zgjedhjet parlamentare në Sllovaki të populistit pro-rus Robert Fiko. Një personazh, për të cilin mund të thuhet gjithçka: ish-anëtar i Partisë Komuniste Çekosllovake, më pas lider i një partie socialiste që gjithmonë i ka shkelur syrin Moskës.

Ndërsa kohët e fundit është rikthyer drejt pozicioneve më të qarta anti-ukrainase, duke ndjekur qasjen e atyre që janë të gatshëm të besojnë me naivitet se mjafton të braktisësh Kievin në fatin e tij dhe t’i afrohesh Rusisë për të rikuperuar stabilitetin dhe mirëqenien ekonomike.

Në fushatën e fundit elektorale, Fiko që në vitin 2018 u detyrua të japë dorëheqjen si kryeministër pasi një gazetar (që u vra pak më vonë) kishte dokumentuar lidhjet e tij me mafian kalabreze në Itali, e etiketoi si “fashiste” qeverinë ukrainase, dhe premtoi se kur të jetë kryeministër, Kievit nuk do t’i dërgohet më as edhe një plumb si ndihmë ushtarake.

Kjo qasje është një “muzikë” për veshët e Vladimir Putin, që është i kënaqur teksa sheh Fikon t’i bashkohet hungarezit tjetër pro-rus Viktor Orban në rolin e “Kalit të Trojës” brenda BE-së dhe NATO-s. Dhe kjo jo vetëm për ta bërë më pak koheziv frontin perëndimor që e mbështet rezistencën ukrainase, por edhe për të pretenduar se jo të gjithë evropianët janë të rreshtuar me Brukselin dhe kundër Moskës.

Për të formuar qeverinë e tij të ardhshme në Bratislavë, Fiko (që mori vetëm 23 për qind të votave dhe 42 vende nga 150 vende në total), do të detrohet të udhëheqë një koalicion. Ai ka në plan të nënshkruajë një marrëveshje për bashkëqeverisje me partinë e qendrës së majtë Hlas-Sd të ish-kryeministrit Peter Pelegrini (27 vende) dhe sovranistët e Partisë Kombëtare Sllovake (SNS), 10 vendet e të cilëve do t’i jepnin Fikos një shumicë parlamentare prej 79 deputetësh.

Presidentja e Republikës Zuzana Kaputova, mbështetëse e frontit pro-evropian që u

mposht në votimin e së shtunës së kaluar, e kishte kritikuar Fikon disa ditë më parë. “Dikush mendon se paqja mund të arrihet duke bllokuar ndihmën për Ukrainën, dhe këtu nuk ne jemi dakord”- tha ajo.

Megjithatë, vështirë se Kaputova mund të bllokojë dhënien e mandatit për formimin e kabinetit të ri qeverisës. Vërshimi i lajmeve të rreme në faqet sllovake të internetit, të organizuar enkas nga Moska për të ndikuar në këto zgjedhje, është sigurisht një histori e keqe, por tani është pikërisht një histori.

Rëndësi ka e ardhmja, dhe me një qeveri pro-ruse në Bratislavë, së bashku me atë të Budapestit, situata do të jetë më pak rozë për Brukselin dhe Kievin. Edhe nëse arsyet që nxitën shumë votues sllovakë të votojnë për një mik të vjetër të Putinit, janë mbi të gjitha ekonomike, ky rezultat ndihmon në përhapjen e ndjenjës se një pjes në rritje e opinionit publik evropian është lodhur nga politika e mbështetjes së Ukrainës, me koston e saj të dhimbshme sa i përket inflacionit që u kërkohet të përballohet nga qytetarët.

Tani analistët janë fokusuar tek zgjedhjet parlamentare të 15 tetorit në Poloni. Edhe këtu pasojat e luftës kanë një ndikim të dukshëm, siç tregohet edhe nga lëvizja e qeverisë nacionaliste në Varshavë (që është gjithashtu një nga mbështetësit më të bindur dhe bujarë

të Kievit) për të bllokuar importin e drithërave nga Ukraina me synim mos-dëmtimin e prodhuesve vendas.

Madje kryeministri Moraviecki, i përballur me protestat e ashpra të Volodimir Zelenskit, kishte njoftuar edhe ndalimin e furnizimit me armë të Kievit, vendim nga i cili u tërhoq më pas për shkak të ndërhyrjes së SHBA-së. Pra Vladimir Putin mund të shpresojë të korrë edhe në Poloni frytet e politikave të tij dashakeqe.

Por edhe në Shtetet e Bashkuara mund të dëgjohet një jehonën e kësaj “sëmundje”, e cila e ka origjinën në fushat e betejës në Ukrainë. Kongresi amerikan sapo ka votuar mbi fondet e reja federale për të shmangur ndërprerjen e punës nga administrata shtetërore, por ka lejuar përkohësisht ndihmën për Kievin, kjo me kërkesë të presidentit Bajden.

Një deklaratë e mëvonshme dypartiake e mbështetjes për Ukrainën e ka reduktuar problemin, por mesazhi mbetet po ai. I zmadhuar nga kërkesa e një deputeti trampian për dorëheqjen e udhëheqësit republikan Mekarthi, sepse cilësohet si shumë i butë përballë shumicës qeverisëse. Zgjedhjet presidenciale të nëntorit 2024 nuk janë shumë larg, dhe nuk ka asnjë dyshim se Kremlini bën tifo për mikun e tij të vjetër Donald Trump edhe pse Biden siguron: “Dua t’i them Kievit dhe aleatëve tanë evropianë se mund të mbështeteni tek ne”.  Nga Roberto Fabbri “Il Giornale”/ Pershtatur nga CNA





Lajmet e fundit nga