web counter
LEXO PA REKLAMA!

SHKARKO APP

App Store
Google Play

Inceneratorët nuk fajësojnë Erion Veliajn dhe qeverinë

27 Gusht 2024, 19:30, Editorial CNA
Inceneratorët nuk fajësojnë Erion Veliajn dhe qeverinë
Foto ilustruese, Erion Veliaj

Afera e shekullit, ajo e inceneratorëve e cila sipas përllogaritjeve të ekspertëve shkon rreth 1 miliard euro, ka çuar në pranga shumë zyrtarë, ish-ministra, drejtues të komisioneve të prokurimit, të tjerë zyrtarë të përfshirë në strukturat e procedurës apo drejtorë e të tjerë. Në fakt ka një debat të madh publik, juridik, edhe politik.

A është përgjegjës Erion Veliaj?

Inceneratorët nuk fajësojnë Erion Veliajn dhe qeverinë
Erion Veliaj

Në fakt, le ta bëjmë llogarinë ndryshe. Do ta marrim të qenë sikur Erion Veliaj është “i pafajshëm”. Ai nuk është fajtor për inceneratorët. Pra, inceneratorët nuk e fajësojnë kryebashkiakun e Tiranës apo dhe qeverinë e ndershme të Edi Ramës.

Le të shikojmë disa fakte.

Kush i shpiku inceneratorët?

A ishte ky një vullnet politik i Kryeministrit?

Kjo e parë në të treja rastet edhe tek Elbasani, edhe te Fieri dhe te Tirana dhe te mbrojtja në komsionin hetimor apo në qasjet e mëvonshme politike të Edi Ramës, i cili ka thënë që nëse do më kërkohej sërish do të bëja të njëjtat veprime.

Tregon që përgjigjja është po.

Por, a e bënte dot vetë qeveria këtë proces? Në asnjë mënyrë. Çfarë i duhej? I duheshin emergjencat. Kush i shpallte? I shpallnin bashkitë. Kush i bënte kërkesat? I bënin bashkitë. Pra, pa bashkitë inceneratorët si projekt i Edi Ramës apo qeverisë, si vizion i Rilindjes nuk do të ishin zbatuar.

Por ndryshe nga sa ndodhi në Elbasan dhe në Fier.

Tek e para kemi një kazan me naftë, tek e dyta një incenerator që nuk ka mbaruar dhe në Tiranë ndodh ndryshe. Nuk ekziston inceneratori, nuk ekziston asgjë prej tij. Megjithëse, kompania ka marrë rreth 130 milionë euro sa nga taksat e qytetarëve shqiptarë aq edhe nga biznesi.

Por, çfarë ndodh me Erion Veliajn, me të “pafajshmin” e inceneratorëve?

Erion Veliaj del në media dhe thotë: po unë i kam bërë kërkesën qeverisë që të kemi incenerator në Tiranë sepse ishte projekti i IFC -së, ishte më i shtrenjtë se ky inceneratori që kërkuam ne.

Në fakt projekti i IFC-së nuk ishte incenerator por përfshin pastrimin e Tiranës plus landfillin dhe kostot qenë më të ulta.

Nga ana tjetër është Erion Veliaj i cili ka përfaqësuesit e tij si kryetar i Bashkisë së Tiranës, pra Taulant Tushën në komisonin ku është diskutuar procedura për inceneratorin e Tiranës, pra për dhënien me koncesion.

Nga ana tjetër Taulant Tushe atje thotë të shmanget Këshilli Bashkiak. Nga ana tjetër ky Erion Veliaj “i pafajshmi” si ka mundësi që i çon shkresë Alqi Bllakos dhe i thotë jemi dakord në parim?

Inceneratorët nuk fajësojnë Erion Veliajn dhe qeverinë

Si mund të jetë i pafajshëm kur e ka kërkuar vetë, ka rënë dakort vetë dhe e ka shmangur Këshillin Bashkiak vetë apo ka patur në procedurë njerëzit e tij, përfaqësuesit e tij si kryetar bashkie.

Ky është Erion Veliaj “i pafajshëm” i inceneratorëve.

Paratë kalojnë nga buxheti i shtetit, nga qeveria në llogaritë e Bashkisë Tiranë për t’ju dhënë inceneratorit të Tiranës, kompanisë koncesionare ku pas saj fshihej Mirel Mërtiri dhe Klodian Zoto. Të paktën nga viti 2019 dhe der tani, gati 5 vjet është shkruar për inceneratorin e Tiranës, që nuk janë holandezët, që nuk është një kompani e huaj, që fshihen shqiptarë nga pas.

Si ka mundësi? Nuk e dinte Erion Veliaj, s’ka parë, s’ka dëgjuar,  s’ka lexuar? A nuk shkoi Erion Veliaj si “i pafajshëm” në komision parlamentar atë hetimorin, që u bë siç u bë dhe nuk foli dhe nuk e mbrojti?

Pra,  Erion Veliaj është “i pafajshëm”. Ai që ka bërë kërkesën, ai që ka qenë në procedurë, ai që bën pagesash parash, ai që firmos kontrata, vartësit e tij firmosin për dhjetëra miliona euro, para të paguara nga qytetarët përmes blerjeve të apartamenteve apo ndërtimeve në kryeqytet.

Është “i pafajshmi” në historinë e inceneratorit të Tiranës. Po. Erion Veliaj është “i pafajshëm” vetëm për faktin se ndodhet jashtë për aferën e inceneratorëve pasi ai duhet të ishte në burg pikërisht për pafajësinë e tij, atë të rolit të budallait që kërkon t’ua shesë shqiptarëve ndërkohë që vetë e ka kërkuar, vetë e ka firmosur, vetë e ka zbatuar të gjithë aferën korruptive të inceneratorit të Tiranës./ CNA

 





Lajmet e fundit nga