Një rekomandim miqësor për znj.Nancy VanHorn, të ngarkuarën me Punë të SHBA-së në Tiranë

6 Gusht 2024, 20:51, Editorial REDAKSIONALE

Një rekomandim miqësor për znj.Nancy VanHorn, të

Nancy VanHorn, e ngarkuara me Pune e SHBA-së

Një ditë më parë u njoftua ardhja në Shqipëri e të ngarkuarës me punë të SHBA-së në Tiranë, znj. Nancy VanHorn, e cila takimin e parë e pati me presidentin Bajram Begaj.
Sot e nderuara përfaqësuese e Shteteve të Bashkuara, znj. VanHorn ka postuar në rrjetet sociale një mesazh në gjuhën shqipe. Ajo prezanton veten e saj dhe pastaj kërkon nga shqiptarët që t’i rekomandojnë tre gjëra:

Vendin të cilin të vizitojë të parin, një ushqim që duhet ta provojë patjetër të parin dhe një libër që tregon forcën dhe shpirtin e vendit tonë. (lexo këtu)

Ne si CNA e përcollëm ambasadorin e nderuar, të ngarkuarin me punë z. Wisner, pak ditë më parë dhe për këtë bëmë dhe një shkrim. (lexo këtu)

E përcollëm me krenari, e përqafuam si media dhe treguam se qe një njeri mjaft i fortë si karakter dhe në qëndrimin që mbajti ndaj Bashkisë Tiranë, ndaj denoncimeve për korrupsion që janë bërë ndaj atij institucioni duke mos e takuar asnjëherë nga dita e parë deri në ditën e fundit kryebashkiakun Erion Veliaj.

Shpresojmë që të njëjtën gjë ta bëjë dhe ju zonja VanHorn, të cilën e përshëndesim me plot mall dhe respekt dhe e ftojmë të jetë si miku ynë Wisner që ishte i rrallë, që ishte i mençur, luftëtar i korrupsionit dhe mbante distancë ndaj personazheve politikë të korruptuar në Shqipëri, por dhe qëndrime mjaft të forta.

Nga ana tjetër në përgjigje të pyetjeve të saj ne i kërkojmë të ngarkuarës me Punë, znj. VanHorn, që vendi i parë të cilin ajo duhet të vizitojë në Shqipëri është inceneratori i Tiranës.

Ka një vend ku ka një incinerator me shumë kate janë paguar dhe 130 milionë euro, qeveria i dha rreth 70 milionë euro, por ka dhe një grup të strukturuar kriminal.

SPAK institucioni i financuar nga SHBA dhe BE, e ka hetuar punën e madhe me ketë vepër të paimagjinueshme për mëmëdheun tonë.

Ndaj znj. ambasadore fillimisht duhet të shikoni sa i lartë është bërë inceneratori me rreth 130 milionë euro, të cilin e ka marrë një kompani koncensionare e krijuar diku jashtë.

Një incinerator me kate shumë i kërkuar nga kryebashkiaku Erion Veliaj, i paguar prej tij, i përdorur për fushata prej tij.

Gjithashtu po patët kohë, shkoni të shikoni teatrin e ri se sa i bukur është, sa lart i ka ngritur kryet.

Mund të merrni eksperiencën nga kompania “5D”, një super biznes me eksperiencë në kryeqytet.

Ka edhe të tjera, por ne besojmë që Ju do ta shikoni dhe vlerësoni rekomandimin tonë.
Në rast se do të fillonit me vizitën e inceneratorit dhe vepravë të tjera të mëdha të Erion Veliajt, ushqimin rrugës do e gjeni shumë të mirë, mund t’iu ikë dhe oreksi nga veprat e mëdha që do të shikoni.

Mirëseerdhët në Shqipërinë e vërtetë!

Sa për ushqim e libra kemi plot, aq sa nuk e imagjinoni çfarë shijesh e veprash do të gjeni./CNA