LEXO PA REKLAMA!

SHKARKO APP

App Store
Google Play

Pse Altin Dumani, Dritan Prençi dhe Vladimir Mara nuk po hetojnë inceneratorin e Tiranës?

3 Maj 2023, 16:27, Editorial CNA
Pse Altin Dumani, Dritan Prençi dhe Vladimir Mara nuk po hetojnë
Fotomontazh - Vladimir Mara, Altin Dumani dhe Dritan Prençi

Dy prokurorët e SPAK-ut, të cilët kanë në dorë dosjen e inceneratorit të Tiranës, landfillin ku një kompani ka të ardhura rreth 25 milionë dollarë në vit, nuk po e hetojnë këtë aferë korruptive.

Pas 6 vitesh, sipas studimit të fizibilitetit dhe sipas aneks-kontratës së firmosur nga shteti shqiptar, tashmë duhet të kishte përfunduar investimi prej 128 milionë eurosh, që në fakt nuk është kryer dhe vetë kompania në një deklaratë të saj të fundit ka thënë 32 milionë dollarë, megjithëse nga ana tjetër rreth 30 milionë dollarë është fitimi i mundshëm i kësaj kompanie.

Dy prokurorët, Vladimir Mara dhe Dritan Prençi, nuk po hetojnë dosjen e inceneratorit të Tiranës. Këtë pothuajse e tha me gojë edhe Altin Dumani, kreu i SPAK-ut.

Pse Altin Dumani, Dritan Prençi dhe Vladimir Mara nuk po hetojnë

Dumani, nga i cili pritet jo pak, në daljen e tij të fundit mediatike tha se ishin dërguar letërporosi, tha se te Tirana ishte një situatë ndryshe, por nuk tha se dosja nuk kishte lëvizur, nuk tha se prej 6 muajsh që ai është në krye të SPAK-ut, nuk ka veprime konkrete dhe zbardhje të së vërtetës mbi aferën 430 milionë dollarëshe për 30 vjet të firmosur, që në fakt sipas shifrave shkon 750 milionë dollarë, të cilat paguhen nga taksat e shqiptarëve të varfër, nga biznesi shqiptar.

Dosja po fle dhe Vladimir Mara e Dritan Prençi janë dy prokurorët që e kanë këtë dosje, përfshi këtu edhe Altin Dumanin, të cilët së bashku prej kohësh na kanë treguar se kanë dështuar në hetimin e kësaj afere, ose duan që ta mbyllin këtë çështje dhe t’i vënë kapakun.

Edhe kryebashkiaku i Tiranës, Erion Veliaj, një nga njerëzit që është akuzuar nga opozita, së fundi tha se nuk e drejtonte ai institucionin e prokurorisë, se po ta kishte ai do të kishte gjetur përgjegjësit.

Tashmë shohim qartazi se as Dritan Prençi, as Altin Dumani dhe as Vladimir Mara nuk po e hetojnë inceneratorin e Tiranës, një aferë që po rrjep xhepat e shqiptarëve.

Është një dosje voluminoze, ku kompania e inceneratorit të Tiranës, me aksionet e Giuseppe Ciaffaglione-s, njeriut që punësoi babain e Alqi Bllakos, kompania e inceneratorit që ka paguar me qindra miliona Stela Gugalljan, Klodian Zoton, për konsulenca, kompaninë e Klodian Zotos për ndërtim, ndërkohë që sot nuk ka inceneratorë dhe nuk është kryer investimi që duhet të ishte në fazën e tij përfundimtare prej gati 128 milionë eurosh.

Vladimir Mara, Dritan Prençi, por edhe Altin Dumani nuk mund të jenë grupi i Agushit që ha gjizë e as të bëjnë korin e karrocës së Dylit, por duhet të zbardhin të vërtetën.

Edhe pse është fushatë zgjedhore, nuk mund të heshtin gjoja me justifikimin se nuk duam të ndërhyjmë se ka votime, sepse kështu po i japin kohë kompanisë, aksionerët po ndryshohen edhe në shkelje të ligjit, pa i marrë leje më parë qeverisë së Shqipërisë, ndërkohë shqiptarët i paguajnë taksat e tyre për inceneratorët që më pas të paguhet rrjeti i korrupsionit mediatik, i gjobaxhinjve, i shantazheve, shitblerja e njerëzve, pazaret dhe skenaret që në fakt nuk i paguajnë bizneset, nuk i paguajnë pronarët, por xhepat e shqiptarëve të varfër, të cilët duhet të paguajnë një incenerator që nuk ekziston, i cili duhet të kishte përfunduar totalisht pas 6 vitesh investimin dhe sot nuk ka kryer as 30% të tij, siç deklaron edhe vetë kompania./ CNA.al

 

 

Lajmet e fundit nga