LEXO PA REKLAMA!

SHKARKO APP

App Store
Google Play

Altin Dumani ha gjizë si Agushi

30 Prill 2023, 14:39, Editorial CNA
Altin Dumani ha gjizë si Agushi
Altin Dumani

Shumë shqiptarë, në shumicë madje, e dinë “Njeriun me top” të Dritëro Agollit, kthyer në një film dhe luajtur mjeshtërisht nga i madhi Timo Flloko, ku një rol jo të paspikatur ka edhe Agushi.

Italiani Augusto i luajtur nga Zef Bushati, në rolin e tij sot e shohim Altin Dumanin, kreun e SPAK-ut, për të mos thënë që i gjithë SPAK-u është një tufë me Agushë që hanë gjizë për t’u bërë esëll.

Faktet janë të thjeshta. Zoti Dumani, në një dalje publike para disa javësh, tha se nuk bënte bllokimin e inceneratorit të Tiranës, se kishte hallin e arbitrazhit dhe nuk i njihte aksionerët dhe nuk e dinte se kush ishin të vërtetët që fshiheshin pas.

CNA dhe vetë SPAK-u e kanë ditur. Kemi treguar me letra shpesh se kompania është themeluar nga Klodian Zoto, më pas është marrë nga Giuseppe Ciaffaglione dhe në vitin e kaluar aksionet u kanë kaluar disa personave të tjerë.

Ndërkohë që SPAK-u po bënte hetimet janë zhdukur disa gjurmë.

Por ne kemi një letër të 9 dhjetorit 2022, kemi publikuar disa dokumente sërish të dhjetorit 2022, mbi Mirel Mërtirin, “trurin” e inceneratorëve.

Kemi publikuar regjistrin e Holandës, regjistrin tregtar me emrin e Klodian Zotos, kemi nxjerrë shumë dokumente që lidhin Klodian Zoton me inceneratorin e Tiranës, me kompaninë “Geogenix” si themeluese, Mirel Mërtirin dhe së fundi dhe një e-mail që administratori i Holandës, i cili i çon një e-mail në adresën Limon Mango dikujt që e quan “Dear Mirel” dhe i konfirmon rrogën administratorit të Tiranës e kështu me radhë.

Janë dokumente të siguruara nga informacione të besueshme të konfirmuara dhe këto Altin Dumani i ka publike ashtu siç i kanë dhe prokurorë të tjerë të SPAK-ut.

Kanë publike dhe mediat që shantazhojnë SPAK-un për të mbyllur çështjen, kanë publikë gazetarët që marrin paratë, kanë fluturimet e tyre, kanë takimet. Mund të sigurojnë dhe e-maile të tjera, por duke fjetur thjesht dhe vetëm po hanë gjizë që të bëhen esëll.

Nga çfarë? Këtë nuk e dimë. I ka dehur Mirel Mërtiri, Klodian Zoto apo Stela Gugallja, paratë apo çfarë e ka dehur SPAK-un tonë që nuk vepron për incenetarorin e Tiranës?

Ndaj një kompanie që ka fituar deri në 30 milionë dollarë në 5 vite në kurriz të shqiptarëve, ndaj një kompanie që ka blerë media, ka bërë shantazh ndaj prokurorëve. Që ka blerë ministra, ka korruptuar zyrtarë, siç është rasti i babait të Alqi Bllakos e kështu me radhë.

Kush është “truri” i inceneratorëve? SPAK-u na thotë se është Mireli. Kush është pas kompanisë në Tiranë, që ka aksionerë të rinj nga maji?

Ndryshimi i aksioneve është bërë thjesht dhe vetëm tani, pak ditë më parë, pasi CNA i çoi një shkresë zyrtare Ministrisë së Financave, e cila ia delegoi Qendrës Kombëtare të Biznesit dhe kjo e fundit ende nuk ka kthyer përgjigje se kush janë aksionerët në regjistrin e QKB-së, pasi sipas të dhënave që ne kishim në maj ishin shitur aksionet, ndërkohë në Shqipëri nuk ishin reflektuar ende dhe kishte të paktën dy shkelje ligjore në lidhje me ligjin e koncesioneve.

Së pari, leja që duhej marrë nga qeveria shqiptare, pra duhej miratuar më parë nga qeveria shitja e aksioneve, sepse është në koncesion dhe ligji i koncesioneve e përcakton saktë dhe, së dyti, njoftimi që i duhej bërë brenda 30 ditëve Qendrës Kombëtare të Biznesit, qeverisë, si dhe shtetit shqiptar.

Ndërkohë që këto nuk kanë ndodhur, këto janë fakte që i duhen ndoshta qeverisë, ndoshta një arbitrazhi të mundshëm që e kishte frikë Altin Dumani, ky Agush i vogël, që ha gjizë të madhe duke fjetur mbi dosjen hetimore, duke bërë spektakël dhe “show” dhe nga ana tjetër nuk zbardh aferën korruptive të landfillit të Tiranës, ku paguhen 29 euro/ ton, ndërkohë që nuk ka incenerator dhe me shumë gjasa nuk do të ketë për 1 apo 2 vite të tjera. Ndërkohë që kontrata është firmosur në gusht të 2017-ës, në Tiranë nuk ka incenerator ende në 2023-shin.

E ndërkohë Elbasani e Fieri përfunduan ashtu siç kanë përfunduar, edhe pse s’punojnë, janë aty në gjendje.

Ndërsa në Tiranë nuk ekziston. Dhe kompania që pretendonte investimin 128 milionë euro nuk i ka pasur këto para në momentin e firmosjes së kontratës, por po i gjen tani paratë kur Altin Dumani dhe kolegët e tij hanë gjizë të bëhen esëll.

Dhe pyetëm edhe më sipër, nga çfarë? Përse po bëhen esëll? Çfarë e ka dehur Altin Dumanin & Co? Njerëzit e reformës në drejtësi që do të luftonin korrupsionin çfarë i deh? Shantazhi i medias, kërcënimet e gazetarëve, paratë e korrupsionit që ndahen nëpër televizione? Frika nga kush? Kush i step Agushët e SPAK-ut?/ CNA.al

 

Lajmet e fundit nga