web counter
LEXO PA REKLAMA!

SHKARKO APP

App Store
Google Play

E fundit!

x

Në fletën e votimit nuk është ambasadorja Kim!

11 Prill 2023, 12:32, Editorial CNA
Në fletën e votimit nuk është ambasadorja Kim!
Ambasadorja e SHBA-së, Yuri Kim

Ambasadorja e SHBA-së, Yuri Kim, ka qenë vazhdimisht pjesë e sulmeve dhe akuzave të bëra nga opozita, kryesisht nga ish-kryeministri dhe ish-presidenti Sali Berisha dhe njerëzit e tij, por edhe militantët e PD-së me reagime të ashpra në rrjetet sociale.

Ambasadorja, në një dalje të saj të radhës nga dritarja e Departamentit të Shtetit nëpërmjet “Zërit të Amerikës”, theksoi se nuk duhej të ishte votuar e vjetra, nuk duhej të votohej “non grata” nga linja e departamentit të shtetit.

Askush që kupton nga "ABC"-ja e politikës nuk do të thoshte të kundërtën e asaj që tha ambasadorja.

Por ajo u gjend përballë sulmeve dhe, prej muajsh, megjithëse kanë filluar zgjedhjet lokale, janë shpallur kandidatët, janë shpallur primaret, duhet organizim, duhen premtime, duhen denoncime, askush nuk merret me këtë punë, merren me ambasadoren. A thua Yuri Kim do të jetë në fletën e votimit.

Nuk do të jetë! Ambasadorja e SHBA-së nuk do të jetë në fletën e votimit!

Në fletën e votimit nuk është ambasadorja Kim!

Sepse po të ishte në fletën e votimit, ambasadorja e SHBA-së kundër Berishës dhe Ramës, pa asnjë diskutim që do të fitonte me një mazhorancë absolute. Jo sepse e kanë emrin Yuri Kim apo Donald Lu, apo një emër tjetër, po sepse është ambasadore e SHBA-së dhe shqiptarët besojnë gjithmonë te SHBA-ja.

Edhe pse sulmet e Berishës mund ta shqetësojnë ambasadoren apo të rrisin pakënaqësitë ndaj SHBA-së në Tiranë, e vërteta është se SHBA-ja do të fitonte, kjo nuk ka diskutim.

Shqipëria ka zgjedhjet lokale, ku do të garojnë kandidatët e Ramës me kandidatët e Berishës dhe Metës dhe disa të tjerë që sërish i ka nxjerrë Rama duke menduar se do të marrin një grusht votash dhe do t’i prishin punë dikujt.

Pra, nuk kandidohet për të zgjedhur, fiton SHBA-ja, Rama apo Berisha. Jo! Kandidohet për të zgjedhur një kryetar bashkie dhe "bateritë" e opozitës duhet të ishin 24 orë në 24 ndaj kundërshtarëve të tyre politikë dhe ndaj kryebashkiakut.

Në fletën e votimit nuk është ambasadorja Kim!

Rama, mesa duket, llogaritë i ka të bëra. Qartazi ai e di se opozita nuk do të marrë më shumë se deri 10-15 kryetarë bashkish, pra institucione administrative lokale dhe tani po vazhdon me premtime të tjera për zgjedhjet e ardhshme të vitit 2025. Ndërsa opozita, Berisha dhe të tijtë, në vend që të bombardojnë me fakte, në vend që të bombardojnë me fushatë kundërshtarin politik, merren me Yuri Kim, a thua se është ajo kundërshtarja politike.

E kemi përmendur në dy shkrime. Një shkrim i parë, ku theksuam se zgjedhjet nuk fitohen duke sulmuar ambasadoren apo në një përgjigje që i kemi kthyer ish-deputetit Myslym Murrizi, edhe për justifikimin “bar do të hanë”, do të hanë apo nuk do të hanë bar, ambasadorja e SHBA-së është edhe disa muaj dhe pastaj do të vijë i riu.

Mund të jetë edhe më keq. Mund të bien dhe nga shiu në breshër, sepse kështu ka ndodhur historikisht.

Dikur në korridoret e PD-së, njerëzit e Bashës thoshin sa të ikë Donald Lu dhe ne do të vijmë në pushtet.

Erdhi zonja Kim dhe po thonë se më keq se kjo nuk ka. Në fakt, mund të vijë ambasadori tjetër që për ta mund të jetë edhe më “i keq”.

Por ai thjesht dhe vetëm po ndjek politikën nga Departamenti i Shtetit. Ambasadori është linja zyrtare e tyre, nuk është një kandidat për kryetar bashkie.

Në fletën e votimit nuk është ambasadorja Kim!

Ka teprime, s’ka teprime, ashtu si e theksuam dhe në shkrimin tonë të dytë, duhet të ketë fakte dhe prova për ta denoncuar dhe kapur mat ambasadoren. Nuk mund të përfshihet në retorika politike boshe gjatë zgjedhjeve lokale, të cilat në finale nuk i japin opozitës asgjë.

Kur të hapen kutitë e votimit dhe të dalë e humbur dhe opozita të tentojë të ngrejë një frymë, na i vodhën, s’na i vodhën, na i manipuluan, s’na i manipuluan, dhe të gjitha institucionet ndërkombëtare të thonë, jo zgjedhjet ishin demokratike, pati problematika si kudo.

Atëherë sërish fajin do ta ketë ambasadorja?

A mund ta ketë fajin ambasadorja se opozita, në vend që të bënte zgjedhjet e saj lokale, u mor me një ambasadore të SHBA-së, së cilës në fund të ditës i solli pak shqetësime personale, por politika e SHBA-së nuk do të ndryshojë në asnjë mënyrë dhe në asnjë rast, thjesht dhe vetëm se ikën Yuri Kim apo vjen Kim Yuri.

Në fletën e votimit nuk është ambasadorja Kim!

Kjo s’ka për të ndodhur, sepse këtë e dinë të gjithë.

Prandaj opozita është ende në kohë që të shkarkojë bateritë e saj në rast se ka fuqi dhe energji ndaj kundërshtarit politik dhe ta lërë ambasadoren atje ku është, të bëjë punën e saj, mirë apo keq, dhe kur të ketë fakte dhe prova kundër saj le t’i publikojë, por në zgjedhje nuk mund të merresh me ambasadorë.

Në fletën e votimit nuk është ambasadorja Kim!

Në zgjedhje merresh me kundërshtarin politik, pasi ambasadorja nuk e ka emrin në fletën e votimit.

Në fletën e votimit do të jenë kandidatët dhe përbri tyre partia dhe këshilltarët, dhe përbri tyre partia dhe emri i kryetarit, këta garojnë. Emri i Yuri Kim nuk është në fletën e votimit.

Emri i Yuri Kim mund t’i lodhë dhe stresojë pak opozitarët tanë, por pasi të humbin zgjedhjet dhe kur të marrin shumë pak bashki nuk mund të justifikohen dot se i humbën për shkak të ndërhyrjes së ambasadores, por për shkak ta paaftësisë, dështimit, keqorganizimit dhe fokusit të gabuar gjatë zgjedhjeve lokale./ CNA.al

 





Lajmet e fundit nga