web counter
LEXO PA REKLAMA!

SHKARKO APP

App Store
Google Play

E fundit!

x

Pogradeci çel sezonin turistik/ Projekte që nxisin vizitorët dhe lundrimin e lirë me Strugën

6 Qershor 2026, 17:27, Qyteti im CNA

Pogradeci ka çelur zyrtarisht sezonin turistik veror me aktivitete të shumta kulturore, artistike dhe promovuese, duke mbledhur përfaqësues të pushtetit vendor, institucioneve qendrore, operatorë turistikë dhe vizitorë nga vendi e rajoni.

Në ceremoninë e organizuar në qytetin liqenor morën pjesë kryetari i Bashkisë së Pogradecit, Ilir Xhakolli, kryetari i Komunës së Strugës, Mendi Qyra, si dhe ministri i Turizmit, Kulturës dhe Sportit, Blendi Gonxhja.

Pogradeci çel sezonin turistik/ Projekte që nxisin vizitorët

Qyra vlerësoi bashkëpunimin mes dy qyteteve që ndajnë liqenin e Ohrit dhe theksoi rëndësinë e lehtësimit të lëvizjes ndërkufitare.

“Kënaqësi që jam këtu me Kryetarin e Bashkisë së Pogradecit. Sigurisht ju përgëzoj dhe dëshiroj që ky vit të jetë një vit i mbarë në turizëm dhe shpresoj që bashkëpunimi ynë do të sjellë më shumë fryte. Kemi diskutuar për një linjë të përbashkët ujore, por edhe për lehtësimin e procedurave në kufi, pasi vonesat pengojnë lëvizjen mes Pogradecit dhe Strugës. Do të vazhdojmë bisedimet me autoritetet përkatëse që ky problem të marrë zgjidhje. Ne jemi shumë afër, por shpesh dukemi sikur jemi larg. Nëse punojmë së bashku, do të afrohemi edhe më shumë”,-tha Qyra.

Edhe kryebashkiaku i Pogradecit, Ilir Xhakolli, u shpreh optimist për sezonin turistik, duke nënvizuar investimet e kryera dhe projektet që synojnë ta bëjnë qytetin më tërheqës për vizitorët.

Pogradeci çel sezonin turistik/ Projekte që nxisin vizitorët

“Jemi gati për një turizëm edhe më të mirë se në vitet e kaluara. Prej disa muajsh kemi punuar për përgatitjen e sezonit, ndërsa aktivitetet e kësaj dite zgjasin deri në mesnatë. Një objektiv i përbashkët me Strugën mbetet lundrimi i lirë në liqen dhe besoj se jemi pranë realizimit të tij. Gjithashtu, sot pamë një demonstrim me hidroplan, një projekt që mund të shërbejë si një atraksion i ri turistik dhe të ndikojë pozitivisht në zhvillimin ekonomik të qytetit”,-theksoi Xhakolli.

Ministri Gonxhja u shpreh se  tha se Pogradeci ka potencial të madh turistik, por ka ende nevojë për më shumë investime dhe koordinim ndërmjet institucioneve dhe aktorëve të tregut.

“Pogradeci ka nevojë për më shumë mbështetje dhe investime. Ka projekte që janë drejt përfundimit dhe të tjera që do të nisin. Një pjesë e sfidave lidhen edhe me statusin e zonës së mbrojtur nga UNESCO, që kërkon kujdes të veçantë në çdo ndërhyrje. Potenciali i qytetit është shumë më i madh se përfitimet që gjenerohen aktualisht nga turizmi dhe për këtë arsye duhet të punojmë për një zhvillim të qëndrueshëm dhe të mirëplanifikuar”,-u shpreh ministri.

Pogradeci çel sezonin turistik/ Projekte që nxisin vizitorët

Pjesë e aktiviteteve të çeljes së sezonit ishte edhe promovimi i kulinarisë lokale. Nxënësit e shkollës profesionale “Enver Qiraxhi” prezantuan gatime tradicionale dhe moderne, të përgatitura në kuadër të formimit të tyre profesional.

“Nxënësit e degës Hoteleri-Turizëm kanë prezantuar gatime tradicionale pogradecare, por edhe elementë të kuzhinës moderne. Kjo bëhet për të promovuar kulinarinë vendase dhe për të rritur cilësinë e shërbimeve turistike. Kërkesat për punësimin e nxënësve tanë janë shumë të larta, madje më të mëdha se mundësitë që kemi aktualisht për t’i përmbushur”,-tha Manushaqe Malçellari.

Në stendat e kulinarisë morën pjesë edhe bizneset lokale, të cilat prezantuan produkte tipike të zonës, me fokus të veçantë tek korani i liqenit.

Pogradeci çel sezonin turistik/ Projekte që nxisin vizitorët

“Kemi sjellë disa gatime të ndryshme si tartar korani, fileto korani dhe sushi me koran. Po mundohemi të ndërthurim traditën me modernen. Vizitorët i pëlqejnë të dyja dhe numri i turistëve, veçanërisht të huajve, po rritet nga viti në vit. Korani mbetet simboli kryesor i kuzhinës pogradecare dhe besoj se do të vazhdojë të jetë edhe në të ardhmen”,-tha Kliton Rika nga restoranti “The Change”.

Me projekte të reja infrastrukturore, ide për lidhje më të forta me Strugën dhe përpjekje për të diversifikuar ofertën turistike, Pogradeci synon të tërheqë më shumë vizitorë gjatë këtij sezoni, duke e shndërruar potencialin e vet natyror, kulturor dhe kulinar në një motor më të fortë zhvillimi ekonomik./CNA

 

 

 





Lajmet e fundit nga