EDUKONI FËMIJËT, MOS VRISNI QENTË

Lënia pas dore, mosndëshkimi i fajtorëve të rasteve, e stimulon terrorizmin ndaj kafshëve të gjora të rrugës, e bën atë fenomen të pandalshëm.

16 Korrik 2026, 17:25, Opinione Xhovan Shyti

Një rast i denoncuar nga dy shoqata të mbrojtjes së kafshëve ka risjellë në vëmendje rastin më të fundit, por jo të vetmin e “terrorizmit” njerëzor ndaj kafshëve.

Sipas ”Animal Guardian Albania” dhe “ARSA”, ngjarja ka ndodhur në zonën e Astirit, tek “Ozone,” ku një qen, i pranuar dashurisht prej banorëve, është ekzekutuar barbarisht, pas lëndimit të një fëmije.

Ekzekutorë të kafshës së gjorë kanë qenë prindërit e fëmijës së lënduar, i cili së bashku me shokë të tjerë ia kishin nxirrë jetën qenit të gjorë, i cili në padurim të mëtejshëm përdori instiktin e vet kafshëror, kafshimin, për t'u vetëmbrojtur. Ato ç’ka denonconin dy faqet online, të OJF-ve mbrojtëse të kafshëve, i konfirmonin edhe banorët e zonës, për të cilët qeni i gjorë ishte banor i vjetër i zonës.

Ai ushqehej prej tyre, nuk bezdiste, e aq më tepër, nuk sulmonte kënd. Ishte aq i urtë sa hante bukë me macet, tregojnë banorët e zones (gjë e rrallë kjo në marrëdhëniet qen-mace). Fëmija i lënduar, së bashku me të tjerë shokë, prej kohësh e bezdisnin me sulme konsistente qenin. Edhe në momentin e kthimit agresiv të kafshës, fëmija ishte duke vijuar ngacmimin, që meret me mënd se i’a ka plasur buzën qenit, duke e detyruar të përdor agresivitetin.

Pas këtij akti, sigurisht të papëlqyer, prindërit e fëmijës e vranë qenin, edhe pse faji i tij rridhte nga paedukata e fëmijës së tyre në marrëdhënie me kafshët, që në fakt bën fajtor ata vetë, pra prindërit, që, ndërsa gjetën rrugën më të shkurtër të hakmarrjes, vrasjen e qenit të gjorë, as e kanë patur në listë edukimin e fëmijës ”trazovaç” me dashurinë ndaj kafshëve.

Sepse është pikërisht mungesa e kësaj edukatë që i kthen fëmijët (por jo vetëm) në "terroristë" të kafshëve të braktisura shtëpiake, kryesisht maceve e qenëve.

Vrasja e qenit të “Ozone” e vërteton këtë sjellje kriminale njerëzore ndaj kafshëve, duke qenë fakt i mosprishjes së terezisë nga institucionet shtetërore të zbatimit të ligjit ndëshkues. Sepse ligji për mbrojtjen e kafshëve, madje dhe shpendëve, ekziston. Ai vlerësohet i standardit bashkëkohor. Ajo që nuk ekziston është mungesa e zbatuesve të tij, hetimi i rasteve të terorrizmit ndaj kafshëve, gjetja e fajtorëve dhe ndëshkimi i tyre.

Lënia pas dore, mosndëshkimi i fajtorëve të rasteve, e stimulon terrorizmin ndaj kafshëve të gjora të rrugës, e bën atë fenomen të pandalshëm. Nëse përfshirja në reagim e ndëshkim ligjor do të ishte prezente, atëherë prindërit nuk do të merreshin me vrasjen e kafshëve paqësore të braktisura, por me edukimin e fëmijëve të tyre me dashurinë e qenëve, maceve e kafshëve të tjera përtej tyre.

Kujtojmë se disa muaj më parë, shoqata “Animal Rescue Albania”, denoncoi një varr masiv qensh, në zonën e Lanabregasit, Dajt, ku 11 prej kufomave të qenëve qenë të ngrirë. Shoqata në fjalë hodhi dyshime se masakra ishte vepër e klinikës veterinare të Bashkisë së Tiranës, Agjensisë së Mbrojtjes së Konsumatorit, pa pasur forcën të bëjë më shumë se kaq.

Që Bashkia e kryeqytetit është e shqueshme për masakrimin e qenëve endacakë, e thonë faktet kur vite më parë niste gjuetinë makabre të vrasjes së tyre natën. Ba-bumet e çifteve nuk po ndihen më, por nuk përjashtohet aplikimi i ndonjë mjeti tjetër shfarosës ndaj kafshëve të gjora, aq shumë të urryera nga zyrtarët e 'Republikës së Rinisë Patronazhiste' të Bashkisë 'Veliaj'./CNA