web counter
LEXO PA REKLAMA!

SHKARKO APP

App Store
Google Play

E fundit!

x

Konferenca për arsimin në Shkodër/ Gjithëpërfshirja e nxënësve mbetet sfidë në nivel vendor

3 Mars 2026, 15:48, Qyteti im CNA

Gjithëpërfshirja e nxënësve në arsim mbetet ende një nga sfidat kryesore në nivel vendor. Pikërisht kjo çështje, së bashku me lidershipin në shkolla, ishte në fokus të konferencës arsimore me temë “Cilësia dhe Sfidat e Arsimit në Nivel Vendor”.

"Gjithëpërfshirja vazhdon që të jetë sfidë. Për ne është e rëndësishme që të vazhdojmë të ofrojmë shërbim arsimor për të gjithë nxënësit në mënyrë të barabartë. Kemi probleme të lidershipit. Kemi lidership që është shumë motivues dhe promovues për komunitetin e prindërve, por edhe për stafet drejtuese. Kemi edhe lidership që ka nevojë për përmirësim gjatë punës së tyre. Këtë qëllim ka kjo konferencë. Ne nuk synojmë që të idealizojmë asnjë arritje dhe asnjë sukses, sigurisht edhe ato kanë vlerën e tyre. Kjo konferencë shërben për të përballuar të gjjtha sfidat që ne hasim në përditshmërinë tonë",-tha Brisela Kadija, Drejtore ZVA Shkodër.

Konferenca për arsimin në Shkodër/ Gjithëpërfshirja e

Nga ana e tij, rektori i Universiteti i Shkodrës “Luigj Gurakuqi”, Tonin Gjuraj, u ndal te sfidat e arsimit të lartë dhe u bëri thirrje maturantëve që ta kenë universitetin e Shkodrës si zgjedhje prioritare për vijimin e studimeve.

"U bëj thirrje maturantëve të mund të konsiderojnë Universitetin ‘Luigj Gurakuqi’ si zgjedhje të parë sepse nuk do t’i zhgënjejmë. Përtej sfidave dhe vështirësive që kemi, po bëjmë përpjekje të mëdha për të diversifikuar imazhin e këtij institucioni, për të diversifikuar dhe zgjeruar ofertën tonë akademike. Në tetor do të kemi programin në gjuhën angleze sepse ndërkombëtarizimi është një prej shtyllave kryesore të hapjes dhe zgjerimit të këtij institucioni. Edhe ndryshimi i ligjit të arsimit të lartë synon zgjerimin e autonomisë universitare dhe universitetet do të kenë mundësi më të mëdha të ofertave akademike ”,-tha Tonin Gjuraj, rektor i UNISHK.

Konferenca për arsimin në Shkodër/ Gjithëpërfshirja e

Në konferencë morën pjesë edhe përfaqësues të pushtetit vendor dhe të institucioneve të qarkut, që theksuan rëndësinë e mbështetjes së vazhdueshme, sidomos në drejtim të sigurisë dhe mirëqenies së nxënësve.

"Paketa e sigurisë në shkolla është në bazë të legjislacionit shqiptar, që shpreh qartë detyrimin e institucioneve publike për siguri fizike të nxënësve, por edhe për sigurinë e shëndetit mendor. Integrimi shumë i lartë në jetën shoqërore, por edhe atë arsimore i teknologjisë, ka ndikuar negativisht sa i takon pjesës së varësisë së krijuar nga nxënësit ndaj mjeteve teknologjike",-tha prefektja e Qarkut Shkodër, Holta Duda.

"Arsimi është themeli mbi të cilin ndërtohet e ardhmja e një shoqërie. Ai nuk është thjesht një proces mësimor, por një mision i përbashkët për të formuar qytetarë të përgjegjshëm, profesionistë dhe të aftë. Në nivel vendor ne ndiejmë drejtpërdrejt nevojën dhe përgjegjësinë për të krijuar kushte sa më të mira që ky mision të realizohet sa më mirë. Përballë sfidave të kohës, ndryshimeve teknologjike, lëvizjeve demografike, nevoja për përfshirje dhe barazi në arsim, na kërkohet të jemi sa më largpamës dhe bashkëpunues",-tha Edmond Ndou, kryetar i Qarkut Shkodër./CNA





Lajmet e fundit nga