web counter
LEXO PA REKLAMA!

SHKARKO APP

App Store
Google Play

E fundit!

x

“Kitarat e Korçës” bashkojnë brezat dhe rikthejnë magjinë e serenatave në pedonalen e qytetit

25 Dhjetor 2025, 12:55, Qyteti im CNA

“Kitarat e Korçës” bashkojnë brezat dhe

Pedonalja e qytetit të Korçës u mbush mbrëmjen e djeshme me tingujt karakteristikë të kitarës dhe këngëve korçare, duke u shndërruar në një skenë të hapur ku muzika bashkoi breza të tërë artistësh.

Koncerti festiv “Kitarat e Korçës" solli serenatistë të vjetër, kitaristë me përvojë dhe këngëtarë të rinj, në një bashkim simbolik të traditës me energjinë e brezit të ri.

Rreth 40 kitara u dëgjuan njëkohësisht, duke krijuar një atmosferë të veçantë dhe emocionale për qytetarët dhe vizitorët që ndoqën koncertin.

Ky aktivitet muzikor, i kthyer tashmë në një festë për qytetin, u organizua në prag të festave të fundvitit dhe solli në vëmendje trashëgiminë e pasur kulturore të Korçës, e njohur prej dekadash si qyteti i serenatave dhe i muzikës qytetare.

Përgjatë gjithë mbrëmjes, publiku pati mundësinë të dëgjojë këngë të njohura korçare, interpretime instrumentale me kitarë, si edhe pjesë të reja të sjella nga brezi i ri i artistëve.

Pandeli Tasellari, kitarist korçar dhe një nga serenatistët më të vjetër, ndau me publikun kujtimet e tij nga vitet kur serenatat ishin pjesë e pandarë e jetës së përditshme në qytet. Ai thekson se Korça ka qenë dhe mbetet djepi i kitarës dhe i serenatave, një traditë që ka lindur dhe është rritur në rrugicat dhe sokakët e qytetit.

“Korça është mbreti i kitarave dhe i serenatave. Ne s’kemi lënë sokak pa gjesdisur në qytet. Mblidheshim dhjetë veta, këndonim serenata deri në orët e vona të natës dhe pastaj ktheheshim në shtëpi. Kënga e preferuar e serenatave ka qenë ‘Dil në dritare’. Të rinj ka shumë të talentuar, por sot nuk prodhohen më serenata si dikur. Ne dilnim për natë, na u bë si një lloj ‘sëmundjeje’. Ka njerëz që e duan muzikën këtu në Korçë, sepse Korça ka qenë e para në muzikë, megjithëse profesorët më të mirë që kemi pasur janë larguar drejt Tiranës.”

Një nga momentet më të veçanta të koncertit ishte bashkëpunimi me korin e të rinjve “Zë+”, i cili solli një repertor të larmishëm, duke ndërthurur këngë korale, pjesë acapella dhe interpretime me baza muzikore. Performanca e tyre i dha koncertit një dimension tjetër, duke e pasuruar atë me harmoni vokale dhe duke e bërë edhe më të ndjeshme atmosferën festive. Edhe pse kohët kanë ndryshuar, fryma e muzikës qytetare vazhdon të jetë e pranishme, falë përpjekjeve të artistëve të rinj që përpiqen ta ruajnë dhe ta përcjellin këtë trashëgimi. Gledia Zhilla shprehet se kjo përvojë ishte shumë e veçantë, sidomos për faktin se ishte hera e parë që kori performonte i organizuar në një hapësirë të hapur publike.

“Sot kemi përgatitur disa pjesë korale, disa me baza karaoke dhe disa i kemi acapella. Kemi edhe pjesë të dedikuara për Krishtlindjen, pra një repertor të larmishëm. Për mua është tepër emocionuese, sepse është hera e parë që e kemi këtë kor të organizuar dhe për më tepër performojmë jashtë, në pedonalen e qytetit. Kjo na jep edhe më shumë emocion. Publiku korçar është shumë i ngrohtë dhe na mbështet vazhdimisht me duartrokitje.”

Koncerti “Kitarat e Korçës” u kthye në një mbrëmje feste për qytetin, duke dëshmuar se muzika mbetet një urë lidhëse mes brezave. Tingujt e kitarës, zërat e rinj dhe kujtimet e serenatistëve të vjetër u bashkuan në një koncert që rikujtoi identitetin muzikor të Korçës dhe rëndësinë e ruajtjes së kësaj tradite të çmuar kulturore./ CNA





Lajmet e fundit nga