web counter
LEXO PA REKLAMA!

SHKARKO APP

App Store
Google Play

E fundit!

x

Dhjetor magjik në Korçë/ Saro: Organizim i veçantë, kryeqyteti i festave të fundvitit

5 Dhjetor 2025, 19:17, Qyteti im CNA

Muaji i dhjetorit është shumë i veçantë kudo në vend dhe aq më tepër në Korçë, ku dritat, muzika dhe festat e fundvitit bashkohen më së miri.

Specialistja e Publikimeve në Bashkinë Korçë, Lorena Saro tregon se për këtë muaj festiv janë parashikuar një sërë aktivitetesh, që kulmojnë me natën e ndërrimit të viteve.

“Dhjetori është muaji ku Korça merr një shkëlqim të veçantë. Ne e quajmë me krenari kryeqytetin e festave të fundvitit në Shqipëri, sepse në këtë periudhë qyteti gjallërohet nga dritat, muzika dhe vizitorët që vijnë për të përjetuar një atmosferë unike.

Kjo magji reflektohet edhe te numri i vizitorëve: edhe këtë vit Korça është e rezervuar gjatë gjithë muajit, jo vetëm për Krishtlindjen dhe natën e ndërrimit të viteve, por çdo fundjavë, madje edhe në ditët e zakonshme.

Festimet nisin me ndezjen e dritave më 6 dhjetor, ora 18:00, në zonën këmbësore, me Orkestrën Frymore të Forcave të Armatosura dhe performancën e Gerta Mahmutajt te Pazari i Vjetër, duke krijuar kështu dy skena festive në qytet.

Panairi me shtëpizat prej druri dhe risia e këtij viti, shtëpiza e Babagjyshit pranë Katedrales, do të ofrojnë gëzim për fëmijët, ndërsa pista e patinazhit mbetet një nga atraksionet më të pëlqyera.

Çdo fundjavë, serenatat korçare te Pazari i Vjetër rikthejnë identitetin e qytetit dhe i japin vizitorëve një atmosferë të ngrohtë dhe autentike.

Kulmi i festimeve vjen në natën e ndërrimit të viteve, me koncertin e Venera Lumanit dhe Lind Islamit, përveç spektaklit të fishekzjarreve, duke e kthyer 31 dhjetorin në një mbrëmje të paharrueshme për banorët dhe miqtë që do të jenë në Korçë.

Korça gjatë këtij muaji është një ftesë e hapur për të gjithë ata që duan të përjetojnë traditën, muzikën dhe ngrohtësinë e festave”,-tha Saro./CNA

 





Lajmet e fundit nga