Aftësitë ndryshe në fokus/ Sfidat dhe nevojat e fëmijëve në Korçë

3 Dhjetor 2025, 12:45, Qyteti im CNA

Aftësitë ndryshe në fokus/ Sfidat dhe nevojat e

Në shkollën speciale të qytetit të Korçës u zhvillua sot një aktivitet në kuadër të Ditës Ndërkombëtare të Personave me Aftësi të Kufizuara. Në këtë qytet numërohen rreth 2 mijë persona me aftësi të kufizuara, ndërsa 40 fëmijë marrin çdo ditë shërbime në qendrën komunitare, ku përfshihen terapi zhvillimi, terapi në grup, logopedi dhe fizioterapi. Vitet e fundit vihet re një rritje e numrit të fëmijëve me aftësi të kufizuara, çka rrit edhe nevojën për mbështetje dhe struktura të posaçme. Për shumë prindër, sfidat janë të shumta dhe të përditshme. Ata përballen me mungesë qendrash dhe hapësirash të përshtatshme, por edhe me vështirësinë e pranimit nga shoqëria.

Kristina Ndini, nëna e një djali me aftësi ndryshe, tregon se momenti i diagnozës shoqërohet shpesh me tronditje emocionale, por më pas fillon faza e forcimit dhe e përballjes së realitetit për të siguruar terapitë dhe mbështetjen e nevojshme.

Aftësitë ndryshe në fokus/ Sfidat dhe nevojat e

“Sot është shumë e vështirë të kesh një fëmijë me aftësi ndryshe sepse është ajo dhimbja që ne kemi dhe përballemi çdo ditë duke parë që fëmija yt nuk bën dot ato që duhet të bëjë. Sot ka shumë vështirësi sepse nuk i pranojnë, ka shumë mangësi në shumë gjëra që nga mënyra ku duhet të rrijë, se ti nuk ke mundësi ta mbash gjithmonë me vete. Ai nuk është i lirë të dalë si çdo fëmijë tjetër. Nuk ka shumë qendra ku mund të rrinë, të jenë si të gjithë fëmijët. Fëmija im tani është në shkollë këtu, shërbimin e merr këtu”, u shpreh ajo.

Në rastin e djalit të Kristinës, që ndjek shërbimet në këtë shkollë, përshtatja ka qenë e mirë, falë kujdesit të vazhdueshëm dhe mjedisit mbështetës që ofron institucioni. Ajo thekson se dashuria, pranimi dhe qëndrimi afër fëmijës janë vendimtare për zhvillimin e tij, ndërsa mungesa e pranimit nga të tjerët shihet si pengesa më e madhe për integrimin.

“Djali im është përshtatur. Nëse atij i dhuron dashuri, i rri afër dhe i sillesh mirë, bëhet për vete direkt. Ka edhe fëmijë që nuk përshtaten dhe është akoma më e vështirë, por ky s'është rasti i djalit tim. Kur unë e kam marrë vesh që ai ishte me aftësi ndryshe, nuk më ka ardhur mirë dhe mendoja 'Pse mua?'. Por duhet të bëhesh i fortë. Për ata që nuk i pranojnë është krim. Nëse nuk i pranojmë ne që i kemi sjellë në jetë, tjetri nuk do ta pranojë kurrë. Duhet të luftosh e ta përballosh që dhe fëmija të ndihet mirë, me vështirësi, por e kemi pranuar”, tha Kristina.

Aktiviteti i sotëm synoi të sjellë në vëmendje sfidat reale me të cilat përballen familjet dhe fëmijët me aftësi të kufizuara, duke theksuar se 3 Dhjetori nuk duhet të jetë vetëm një datë simbolike, por një kujtesë për domosdoshmërinë e mbështetjes dhe përfshirjes në jetën shoqërore./CNA