E fundit!

21:59 Politikë

Zgjedhja e strukturave drejtuese të PD-së/ Nis numërimi i votave në selinë blu

Ka nisur procesi i numërimit të votave për zgjedhjen e str...

Arrestimi i Kevi Muçllarit/ Protestë në Çërravë

11 Nëntor 2025, 12:40, Qyteti im CNA

Arrestimi i Kevi Muçllarit/ Protestë në

Në qendër të fshatit Çërravë, banorët janë mbledhur sot në protestë për të kërkuar lirimin e Kevi Muçllarit, i cili u arrestua pas incidentit të ndodhur në mbledhjen e fundit të Këshillit Bashkiak të Pogradecit. Sipas banorëve, ngjarja ka nisur pas një debati të ashpër mes këshilltarëve dhe përfaqësuesve të fshatit lidhur me çështjen e tokave që parashikohet t’u jepen me qira për vendosjen e paneleve diellore.

Ata pretendojnë se Muçllari është provokuar gjatë mbledhjes dhe se arrestimi i tij është i padrejtë, madje me motive politike. Protestuesit janë shprehur se qëllimi i tyre është mbrojtja e tokave të fshatit dhe kundërshtimi i vendosjes së paneleve diellore, që sipas tyre do të dëmtonin jetesën e banorëve. Ata paralajmërojnë se do të vazhdojnë protestat, madje edhe në qytetin e Pogradecit, deri në lirimin e bashkëfshatarit të tyre.

“Unë kam qenë prezent në mbledhjen e bashkisë dhe reagimi i këshilltarit ishte i padrejtë. Nuk ishte ofendim se "legen" e themi gjithë ditën dhe s'ishte ofezë që këshilltari të reagonte në atë mënyrë. I kërkojmë prokurorit të çështjes që ta lirojë sa më shpejt të jetë e mundur Kevin. Kevi ishte në mbështetje të banorëve dhe për mendimin tim arrestimi ishte politik. S'ka të bëjë farë reagimi që tha "jeni legena". Përderisa voton pro, ashtu je. Reagoi keq këshilltari duke u ngritur. Këshilltarët e tjerë nuk u ngritën, e pranuan ofezën. Nëse ai s'do ngrihej, nuk do ndodhte incidenti”, tha një banor.

“Unë po protestoj sot si të gjithë shokët për të mbrojtur fshatin, të mos vënë panele diellore. Po i vunë ato, s'kemi ku vemë, mbaron fshati. Kevin ta lëshoni se ne do vazhdojmë të rrimë këtu, do shkojmë të protestojmë edhe në Pogradec”, u shpreh një tjetër banor.

“Filli i kësaj proteste sot është për lirimin e djalit të fshatit tonë. Ai është arrestuar pa të drejtë. Kam qenë vetë prezent në Këshillin Bashkiak dhe ai është provokuar nga një këshilltar i bashkisë sepse në atë mbledhje u votua pro për çështjen e tokave të fshatit Çërravë që është çështje e stërzgjatur. Ne u acaruam, por provokimi ishte nga vetë këshilltari i bashkisë. Këshilltari bëri të fortin e bashkisë duke u ngritur kundër nesh sepse ai është prej atyre të bashkisë, i paguar, i punësuar, kjo është e gjitha”, deklaroi një banor.

Në protestë ka marrë pjesë edhe këshilltari i pavarur Arbër Male, i cili ka kërkuar ndërhyrjen e organeve ligjzbatuese për lirimin e menjëhershëm të Kevi Muçllarit, duke theksuar se ai ndodhej në mbrojtje të të drejtave të banorëve të Çërravës.

“Sot bashkë me banorët e fshatit Çërravë po protestojmë për lirimin e Kevi Muçllarit i cili dje ishte në mbrojtje të së drejtës së pronave të aktiviteteve ekonomike të këtyre banorëve. Edhe pse ka qenë i provokuar nga një këshilltar pasi ka qenë duke ikur, arrestohet me urdhër politik. U bëj thirrje organeve ligjzbatuese të lirojnë menjëherë Kevi Muçllarin në të kundërt ne si anëtarë të KB dhe banorët do të jemi në mbrojtje të së drejtës së Kevit dhe të banorëve të Çërravës”, deklaroi Male.

Banorët e Çërravës thonë se nuk do të tërhiqen deri në momentin që Kevi Muçllari të lirohet dhe që vendimi për përdorimin e tokave të tyre të rishqyrtohet.

Ata kërkojnë transparencë nga autoritetet dhe respektim të të drejtave të komunitetit lokal, ndërsa theksojnë se protesta e sotme është vetëm fillimi i një qëndrimi të vendosur për mbrojtjen e fshatit të tyre./CNA