E fundit!

11:00 Denoncim

Dokumenti/ Familjarët e vrasësit të policit në Maliq përfituan fonde nga AZHBR

Vrasja e efektivit Enea Mekolli në krye të detyrës ka nxje...

Pogradec / Tryezë për zhvillimin e turizmit

19 Tetor 2025, 11:25, Qyteti im CNA

Në qytetin e Pogradecit është zhvilluar një tryezë e përbashkët diskutimi mes Shoqatave të Turizmit, Bashkisë së Pogradecit dhe operatorëve turistikë të zonës. Qëllimi i takimit ishte forcimi i bashkëpunimit midis agjencive turistike dhe subjekteve të hotelerisë, për të rritur numrin e vizitorëve që zgjedhin Pogradecin si destinacion turistik. Në këtë takim u theksua rëndësia e krijimit të një dege të Unionit Turistik të Shqipërisë në Pogradec, për të qenë më pranë bizneseve vendase dhe për të adresuar nga afër problematikat që has sektori.

Sipas kryetarit të Unionit Turistik të Shqipërisë, Rrahman Hasa, synimi është që në planet e ardhshme të përfshihen paketa turistike që do të zgjasin të paktën dy ose tre netë qëndrimi në Pogradec, duke i dhënë qytetit më shumë impakt dhe përfitime ekonomike. Ai theksoi se përmirësimet e infrastrukturës rrugore dhe akseset e reja drejt qytetit e bëjnë Pogradecin gjithnjë e më tërheqës për turistët vendas e të huaj.

“Një nga direktivat që do e kemi si të shpejtë, është krijimi i një dege në Pogradec për të qenë në kontakt të vazhdueshëm pranë bizneseve, me qëllim që të njohim nga afër të gjitha problematikat e shqetësimet. Patjetër që bashkëpunimi ka qenë por ne duam ta rrisim atë, për shkak edhe të zhvillimeve kohët e fundit të Pogradecit. Këtu flas për infrastrukturën rrugore që ka përmirësim të madh, aksesimin e rrugëve të reja që afron Tiranën, por edhe me aksesimin e atraksioneve turistike, historike e kulturore që ka Pogradeci. Ne tashmë do të ofrojmë një paketë, së paku dy ose tre netë qëndrimi në Pogradec sepse deri tani, pjesë e guidave tona ka qenë vetëm një drekë këtu. Ne kemi planin tonë që do e diskutojmë me bizneset e zonës dhe mendoj se nga viti tjetër do ti japim një impakt shumë të mirë Pogradecit”, tha Hasa.

Ndërkohë, kryetari i Bashkisë së Pogradecit, Ilir Xhakolli, vlerësoi bashkëpunimin e ri me Unionin Turistik dhe njoftoi se pritet që vitin e ardhshëm të firmoset një marrëveshje me qytetin e Ohrit për bashkëpunim të ndërsjellë në fushën e turizmit.

Ai shtoi se katër chartera të rinj do të përfshijnë Pogradecin në itineraret e tyre, duke sjellë turistë që do të qëndrojnë në qytet për një ose dy netë. Xhakolli theksoi gjithashtu se është e rëndësishme që operatorët turistikë dhe vetë Bashkia të bëjnë përpjekje për të shfrytëzuar sa më shumë mundësitë që ofron aeroporti i Ohrit, duke e kthyer Pogradecin në një nga destinacionet më të vizitueshme të rajonit.

“Besoj që në 2026-tën, në fund të vitit, kryetari i unionit tha që do lidhë një marrëveshje me Ohrin. Siç u shpreh ai, 4 chartera do qëndrojnë dhe do vijnë të bëjmë marrëveshje për të ardhur edhe në Pogradec, për të kaluar një apo dy netë. Është një lajm i mirë, por nuk është vetëm kjo, sepse ka potenciale që dhe vetë bashkia, apo vetë operatorët e Pogradecit që merren me turizmin, duhet patjetër të bëjnë përpjekje për të shfrytëzuar aeroportin e Ohrit”, u shpreh Xhakolli./CNA