E fundit!

23:00 Aktualitet

Zgjedhja e ekipit drejtues të PD-së/ Vijon numërimi i votave në selinë blu

Vijon procesi i numërimit të votave për zgjedhjen e strukt...

81-vjetori i çlirimit të Korçës/ Zhvillohen aktivitete përkujtimore

24 Tetor 2025, 11:23, Qyteti im CNA

81-vjetori i çlirimit të Korçës/ Zhvillohen aktivitete

Në qytetin e Korçës u zhvilluan sot aktivitetet përkujtimore me rastin e 81-vjetorit të çlirimit të qytetit. Kjo ditë historike, 24 tetori i vitit 1944, shënon momentin kur Korça u çlirua nga pushtuesit fashistë, duke hyrë në faqet më të ndritura të historisë së saj.

Festimet nisën me performancën e bandës frymore të qytetit para sheshit të teatrit “Andon Zako Çajupi”, për të vijuar më pas me ceremoninë solemne ku morën pjesë veteranë të Luftës Nacional Çlirimtare, përfaqësues të pushtetit vendor, personalitete të njohura dhe qytetarë të shumtë.

Në fjalët e tyre përshëndetëse, drejtuesit vendorë vlerësuan këtë ditë si një simbol të sakrificës, guximit dhe përkushtimit të atyre që dhanë jetën për lirinë dhe dinjitetin kombëtar.

Kryetari i Këshillit të Qarkut, Petrika Tollkuçi, theksoi se kjo datë mbetet një kujtesë e përhershme e vlerave që duhet të trashëgohen brez pas brezi, duke nënvizuar se liria nuk është dhuratë, por fryt i përpjekjes dhe i gjakut të derdhur për atdheun. Ai shtoi se Korça ka qenë dhe mbetet një vatër e pashuar e patriotizmit, arsimit dhe kulturës kombëtare.

“81 vite më parë, në 24 tetor 1944, Korça u çlirua nga pushtuesit fashistë falë sakrificës, guximit dhe përkushtimit të bijve dhe bijave të kësaj toke. Kjo ditë është simbol i lirisë dhe i bashkimit, ditë që na kujton se liria nuk është dhuratë, por fryt i përpjekjes dhe i gjakut të derdhur nga ata që luftuan për atdhe. Ne përulemi me respekt përpara kujtimit të dëshmorëve dhe të gjithë atyre që dhanë jetën për çlirimin e vendit. Ata ishin në anën e drejtë të historisë dhe ne sot gëzojmë një atdhe të lirë dhe sovran. Është detyrë dhe përgjegjësi e çdo brezi që të mbajë gjallë idealet e tyre, të atdhedashurisë, drejtësisë dhe përkushtimit ndaj vendit. Korça ka qenë dhe mbetet një vatër e pashuar e patriotizmit, arsimit dhe kulturës kombëtare”, deklaroi Tollkuçi.

Në këtë përvjetor të rëndësishëm, Korça jo vetëm kujton të kaluarën e saj të lavdishme, por u përcjell brezave të rinj mesazhin e përjetshëm të dashurisë për atdheun dhe respektit për ata që sakrifikuan për lirinë. Me krenari dhe mirënjohje, qyteti vazhdon të mbajë gjallë frymën e patriotizmit që e ka karakterizuar ndër vite./CNA