web counter
LEXO PA REKLAMA!

SHKARKO APP

App Store
Google Play

E fundit!

x

"Korça Open Air 2025"/ Qielli i Korçës, arenë e fluturimeve të lira

1 Nëntor 2025, 09:41, Qyteti im CNA

"Korça Open Air 2025"/ Qielli i Korçës, arenë

Qielli i Korçës është bërë arenë garash dhe emocionesh me zhvillimin e kampionatit të 14-të të fluturimeve të lira “Korça Open Air”, që këtë vit mbahet në aerodromin e Lumalasit.

Mbi 45 pilotë nga nëntë shtete europiane janë bërë pjesë e garës për Trofeun “EXTRA Skënderbe”, duke e kthyer qytetin në një qendër të vërtetë të sporteve ajrore dhe turizmit të aventurës. Për organizatorët, rikthimi i aktivitetit në Korçë është një moment i veçantë.

Sipas Xhonatan Islamit, qyteti ka një histori të hershme në zhvillimin e sporteve të natyrës dhe ishte ndër të parët që solli kompeticione të tilla në fillim të viteve 2000. Ai thekson se ndërtimi i aerodromit të ri dhe terminalit sportiv i ka dhënë një dimension të ri këtij eventi, duke e bërë pjesëmarrjen më të lehtë dhe garën më të organizuar.

"Korça Open Air 2025"/ Qielli i Korçës, arenë

"Korça është fantastike dhe personalisht sa herë vij këtu, vij me kënaqësinë më të madhe. Jam shumë i lumtur që vij në Korçë edhe për kënaqësinë time, por edhe për të organizuar e për të qenë pjesëmarrës i 'Korça Open Air' që organizohet në edicionin e 14-të. Korça ka qenë dikur, në vitet 2000-2001, një nga organizatoret e para të sporteve të natyrës dhe kompeticioneve të këtij lloji. Është prestigj të kthehemi sërish në Korçë dhe akomë më tepër, të shohim aerodromin e ndërtuar, pjesën fantastike, por edhe terminalin që na e bën qëndrimin dhe pjesëmarrjen në këtë garë të pilotëve shumë herë më të thjeshtë."

Këtë vit, numri i pilotëve dhe vendeve pjesëmarrëse është më i madh se kurrë më parë, çka tregon rritjen e interesit dhe potencialin që ka Korça për të pritur aktivitete të tilla ndërkombëtare.

"Korça Open Air 2025"/ Qielli i Korçës, arenë

"Pjesëmarrja e këtij viti është më e lartë se vitet e tjera, me rreth 45 pilotë, me 9 shtete pjesëmarrëse. Është një shenjë e mirë që Korça duhet të vazhdojë dhe jam i sigurt se këta hapa të marrë për sportet e natyrës, aeronautikën do të vazhdojnë të shtohen edhe në të ardhmen."

Një tjetër risi e këtij edicioni është aeromodelingu për fëmijët, një hap i parë për t’i afruar më të vegjlit me botën e fluturimeve, përmes ndërtimit të avionëve të vegjël prej letre dhe garave simbolike.

"Një tjetër risi e këtij edicioni është aeromodelingu, që është një disiplinë shumë interesante e sporteve të aeronautikës. Ne kemi hapat e parë që bëhen për aeromodeling, që janë edhe ndërtimi i atyre avionëve prej letre. Do të jenë fëmijët e Korçës pjesëmarrës në këtë disiplinë të re që ne po fusim për këtë garë dhe jam i sigurt se në vitet e tjera do të jetë në nivel më profesional."

Në këtë edicion, garat zhvillohen për herë të parë në aerodromin e Lumalasit, një projekt i ri që i ka dhënë Korçës infrastrukturën e nevojshme për zhvillimin e sporteve ajrore. Sipas Alket Islamit, ky është një hap i madh përpara që e vendos Korçën në hartën e garave europiane, me mundësinë që në të ardhmen të priten edhe kampionate botërore. Veçantia e këtij viti është prania e pilotëve më të mirë të Europës, përfshirë edhe ata nga Sllovenia, Anglia, Bullgaria e Kosova, që e bëjnë garën më të fortë dhe më konkurruese.

"Korça Open Air 2025"/ Qielli i Korçës, arenë

"Rikthehemi në Korçë, te 'Korça Open Air' në edicionin e 14-të, në aerodromin e Lumalasit që është projekt i ri dhe shpresoj të jemi gjithmonë këtu, mbase dhe me një kampionat botëror në të ardhmen. Infrastruktura që është bërë këtu për terminalin sportiv e civil, por edhe afërsia me Korçën, kjo fushë e mrekullueshme, të gjitha në pozitivitet. E veçanta e këtij viti është me pjesëmarrësit, janë më të mirët e Europës. Të mos harrojmë që ekipi kosovar vjen nga vendi i tretë në kampionatin botëror. Kemi rankimin e pilotëve më të mirë të botës, që janë nga Sllovenia, nga Anglia dhe nga Bullgaria. Është një garë shumë e fortë, ku besoj se deri në momentin e fundit do të ketë surpriza."

Një tjetër element i ri është ngritja me veriçel, që mundëson startime më të koordinuara dhe siguri më të madhe në ajër, duke e bërë garën më profesionale dhe dinamike.

"Korça Open Air 2025"/ Qielli i Korçës, arenë

"Edhe pse Korça ka malin e Moravës që është shumë i mirë për fluturim, ne jemi munduar të fusim elementin e ri, ngritjen me veriçel. Ngritja me veriçel është shumë eficiente pasi mban gjithë pilotët në një vend dhe ngrihen në një lartësi që ne e mendojmë, që të jenë të gjithë në garë në momentin e këndit të sulmit. Kjo është risia, që nuk jemi më nga 'Kryqi i Moravës', por këtu në aeroport dhe besoj se këtu do të jemi gjithmonë."

"Korça Open Air 2025"/ Qielli i Korçës, arenë

Edicioni i 14-të i “Korça Open Air” rikthen emocionet e fluturimeve të lira në një atmosferë që bashkon sportin, turizmin dhe adrenalinën. Korça po kthehet sërish në qendër të vëmendjes, jo vetëm si qytet kulture e tradite, por edhe si një destinacion modern për sportet ajrore dhe aventurën. Qielli i saj mbetet i hapur për garat, për pasionin dhe për lirinë e vërtetë të fluturimit./ CNA





Lajmet e fundit nga