“Zhvillimi në kohë të trazuara”/ Gjuraj: Pavarësisht zhvillimit teknologjik, njeriu është më i rëndësishmi

14 Nëntor 2025, 15:19, Qyteti im CNA

“Zhvillimi në kohë të trazuara”/ Gjuraj:

Universiteti i Shkodrës “Luigj Gurakuqi” në bashkëpunim me Institutin Shqiptar të Sociologjisë organizoi Konferencën e 20-të Vjetore Ndërkombëtare me temë: “Zhvillimi në kohë të trazuara”. Një konferencë ndërdisiplinore që bashkon studiues, pedagogë, studentë dhe profesionistë nga Ballkani, Europa dhe vende të tjera të botës...

Rektori i Universitetit “Luigj Gurakuqi”, Tonin Gjuraj është shprehur se zhvillimet teknologjike të përdoren për të zbuluar kufijtë e së pamundurës njerëzore.

“Ndërkombëtar dhe ndërdisiplinar janë dy fjalë kyçe që përbëjnë trendin e zhvillimeve aktuale e universiteteve në botë krahas zhvillimit dhe teknologjisë. Jemi këtu për të diskutuar se si mund të rishikohen shkencat sociale dhe humane, kurrikulat e tyre universitare në funksion të zhvillimit. Zhvillimet teknologjike nuk duhet të na nxisin që të jemi konkurrentë dhe imitues të krijesave tona inteligjente, por të bëjmë eksperimente që të zbulojmë kufijtë e së pamundurës njerëzore. Sado që të avancojë teknologjia përgjigjja tek të gjitha sfidat e sotme është vetëm njeriu”, tha Gjuraj.

Drejtori i Institutit Shqiptar të Sociologjisë dhe Lekë Sokoli dhe Brisena Kopliku drejtore për marrëdhëniet ndërkombëtare në universitetin e Shkodrës u shprehën se kjo konferencë në Shkodër ka rëndësi duke qenë se niveli i konflikteve në botë është rritur...

Sokoli tha se kjo është një konferencë qarkulluese që zhvillohet duke kaluar gjithmonë kufijtë.

“Kjo temë është përzgjedhur sepse jetojmë në kohë të trazuara. Indeksi i Paqes nxori se krahasuar me një vit më parë niveli i konflikteve në botë është rritur ndjeshëm. Janë rreth 103 shtete që kanë rritur ndjeshëm shkallën e militantizmit të ekonomisë dhe çështja është se në qendër është Europa dhe Lindja e Mesme. Kjo është një konferencë qarkulluese që zhvillohet duke kaluar gjithmonë kufijtë në Kosovë ose Shqipëri apo Maqedoninë e Veriut. Janë gjithsej 20 partnerë ndërkombëtarë që janë bashkorganizatorë duke përfshirë vende edhe si Italia”, deklaroi Sokoli.

Kopliku u shpreh se kjo konferencë ka një karakter ndërdisiplinor.

“Për këtë vit rolin mikpritës të kësaj konference të rëndësishme e ka marrë Shkodra. Kjo konferencë ka edhe shumë elementë që janë të fokusuar në çështjet e arsimit, të zhvillimeve sociale, fusha e psikologjisë, ka shumë elementë nga aspekte ekonomike, të gjeografisë dhe deri kulturore dhe prandaj ka karakterin e një konference ndërdisiplinore”, tha Kopliku.

Ky event e vendos Universitetin e Shkodrës “Luigj Gurakuqi” në qendër të dialogut shkencor ndërkombëtar.