web counter
LEXO PA REKLAMA!

SHKARKO APP

App Store
Google Play

E fundit!

x

Qendra Kulturore "Dhimitër Orgocka" në Maliq/ Një hapësirë e re për artin dhe kulturën drejt përfundimit

15 Dhjetor 2025, 09:23, Qyteti im CNA
Qendra Kulturore "Dhimitër Orgocka" në Maliq/ Një
Qendra Komunitare Kulturore “Dhimitër Orgocka” në Maliq

Qendra Komunitare Kulturore “Dhimitër Orgocka” në Maliq po merr formë të plotë dhe tashmë duket më e bukur dhe më funksionale se kurrë. Ky investim i rëndësishëm është rezultat i bashkëpunimit mes Bashkisë Maliq dhe Fondit Shqiptar të Zhvillimit, ku bashkia ka realizuar punimet kryesore të ndërtimit, ndërsa fondi po përfundon instalimet, ndriçimin, pajisjet dhe të gjithë elementet e nevojshme për funksionimin e qendrës.

Qendra Kulturore "Dhimitër Orgocka" në Maliq/ Një

Objekti është projektuar për të ofruar hapësira moderne dhe të pajisura me teknologji bashkëkohore, të cilat do të mundësojnë realizimin e aktiviteteve të ndryshme kulturore, artistike dhe sociale. Qendra do të shërbejë për të gjitha moshat, duke u bërë një pikë referimi për komunitetin lokal dhe për rajonin e Korçës.

Kryetari i Bashkisë, Gëzim Topçiu, tregon për CNA TV se bashkia ka mbuluar ndërtimin, konstruksionin dhe pjesën e brendshme, ndërsa Fondi Shqiptar i Zhvillimit po përfundon instalimet, ndriçimin, pajisjet, ngrohjen dhe të gjitha elementet e nevojshme për funksionimin e qendrës. Ai e vlerëson këtë investim si një nga më cilësorët në territorin e Bashkisë Maliq dhe thekson se qendra do të jetë e përfunduar dhe e aksesueshme për qytetarët brenda një periudhe të shkurtër.

Qendra Kulturore "Dhimitër Orgocka" në Maliq/ Një

"Një investim shumë i rëndësishëm, një bashkëfinancim i Bashkisë së Maliqit me Fondin Shqiptar të Zhvillimit. Nga ana e bashkisë u bë pjesa ndërtimore, konstruksioni, çatia, gjithë pjesa e betoneve dhe tashmë gjithë pjesa tjetër po zhvillohet nga FShZh-ja.

Një investim shumë cilësor, shumë i mirë, ndoshta një nga investimet më të mira që është bërë në territorin e Bashkisë së Maliqit. Dua të falënderoj FShZh dhe qeverinë shqiptare për këtë investim. Jemi në fazën finale të themi, po bëhet pjesa e ndriçimit, e pajisjeve, e provave elektrike, e ngrohjes, e të gjithë aksesorëve të nevojshëm që do të ketë ky pallat kulture, qendër komunitare, e cila do të ketë shumë veprimtari për të gjitha moshat.

Është edhe pjesa e territorit të jashtëm, e cila besoj se do të investohet nga bashkia. Do të fillojmë shumë shpejt edhe me sistemimin e të gjithë territorit të saj. Besoj që brenda 1 ose 1 muaji e gjysmë kjo godinë do të jetë e përfunduar dhe e aksesueshme për të gjithë qytetarët."

Topçiu nënvizon gjithashtu rëndësinë e emrit Dhimitër Orgocka, një ikonë e kinematografisë dhe teatrit shqiptar, që ka filluar karrierën e tij në Maliq. Qendra do të funksionojë si një pikë referimi jo vetëm për qytetin, por edhe për rajonin e më gjerë, duke krijuar lidhje me teatrin e Korçës dhe institucionet kulturore të vendit.

Qendra Kulturore "Dhimitër Orgocka" në Maliq/ Një

"Patjetër, Dhimitër Orgocka, një emër i rëndësishëm, një ikonë e kinematografisë, një regjisor i famshëm, i cili e ka filluar karrierën e tij që nga Maliqi e patjetër një respekt për figurën e tij. Kështu që le të jetë kjo qendër një ecuri e mëtejshme për kulturën, për artin, jo vetëm për Maliqin, por besoj edhe një qendër rajonale, e cila do të ketë ndërthurje edhe me teatrin e Korçës, me të gjitha institucionet kulturore të rajonit, dhe në rang republike. Pra, themi pse të mos jetë kjo qendër rajonale, por dhe më gjerë për kulturën, artin, kinematografinë, arkeologjinë, për çdo gjë që ka lidhje me Maliqin."

Zamira Kita, aktore dhe drejtoreshe e Teatrit të Korçës, shprehet se qendra e re do të mundësojë zhvillimin e shfaqjeve teatrale, koncerteve dhe ngjarjeve të mëdha kulturore, duke ofruar hapësira të rehatshme për publikun dhe artistët. Sipas saj, kjo do të krijojë mundësi për bashkëpunimin e artistëve dhe amatorëve nga Maliqi, Pogradeci, Devolli dhe Kolonja, duke nxitur aktivitetin kulturor në të gjithë rajonin.

Qendra Kulturore "Dhimitër Orgocka" në Maliq/ Një

"Së pari, unë ndihem shumë e lumtur, e kënaqur sepse do t'i shtohet Korçës, rajonit tonë, një tjetër teatër shumë i mirë me parametra kontemporanë, një teatër që nuk do të ketë vetëm komoditetin për të qenë publiku mirë në shfaqjet që do të luhen atje, por edhe do të ketë një teknologji të tillë që do të mundësojë jo vetëm shfaqje teatri, por edhe koncerte, aktivitete, evente, ngjarje të mëdha festive, artistike, kulturore, të cilat do ta pasurojnë më shumë aktivitetin kulturor, kalendarin e të gjitha kohërave tona që do të vijnë.

Jam shumë e lumtur sepse duke qenë një teatër tjetër, prodhimet tona në këtë rajon do të na i mundësojnë dy salla të mëdha. Nëse kemi 2-3 shfaqje në të njëjtën kohë dhe oraret e shfaqjeve janë të zëna, apo filmat që tani vijnë me shumicë, ne mund t'i shpërndajmë aktivitetet, jo mund, por do t'i shpërndajmë. Ajo që më bën të ndihem mirë, është edhe ideja e bashkimit të të gjithë rajonit në një qendër kulturore për të funksionuar si një e vetme duke qenë se ne të gjithë do të jemi bashkë.

Do të kemi një zë, një ndjesi, një frymë, një energji dhe kështu mund të realizojmë shumë aktivitete. Do të mundësohet aktivizimi i amatorëve edhe në Kolonjë, edhe në Devoll, Pogradec dhe Maliq, e ne të gjithë së bashku do të bëjmë shfaqje. Meqenëse këtë teatër të Maliqit ne e fitojmë në parametra shumë të mirë, do të kemi mundësi të bëjmë dhe shfaqje shumë të mira.

Do doja që t'u bëj thirrje të gjithë artistëve të fillojnë të planifikojnë gradualisht shfaqjet e tyre dhe për t’i sjellë në Korçë, duke i shfaqur në skenën e Maliqit. Pjesa tjetër që mua më gëzon dhe e them me krenari, është emri Dhimitër Orgocka që ky teatër prej kohësh e gëzon, tani do të ketë nderin e duhur siç i takon një artisti të përmasave të mëdha si Dhimitër Orgocka."

Qendra Kulturore "Dhimitër Orgocka" në Maliq/ Një

Me përfundimin e punimeve dhe hapjen e saj për publikun, Qendra Kulturore “Dhimitër Orgocka” në Maliq do të bëhet një qendër e gjallë për artin dhe kulturën, duke ofruar mundësi për shfaqje teatrore, koncerte, aktivitete artistike dhe ngjarje komunitare.

Ky investim shënon një hap të rëndësishëm për zhvillimin kulturor të rajonit dhe një nderim të merituar për figurën e Dhimitër Orgockës, duke e bërë qendrën një pikë referimi jo vetëm për qytetin e Maliqit, por për gjithë rajonin e më gjerë./ CNA





Lajmet e fundit nga