"HYRI BAKLLAVA" shije që nuk harrohet/ Nga kuzhina e gjyshes, në një markë që kërkohet në të gjithë vendin

14 Shkurt 2026, 14:20, Qyteti im CNA

Në një rrugicë të qetë, mes aromës së gjalpit të freskët dhe sherbetit të ngrohtë, qëndron një histori që nisi në një kuzhinë shtëpie në vitin 1995.

Ishte gjyshja Hyri ajo që hodhi farën e parë të një tradite që sot mban emrin e saj. Fillimisht, bakllavaja përgatitej për miqtë, shoqet e koleget – një ëmbëlsirë e bërë me dorë, me përkushtim dhe dashuri.

Para dhjetë vitesh, bashkë me nipin e saj, familja vendosi ta kthente këtë pasion në biznes.

"Nisma ishte nga gjyshja e shtëpisë, Hyri. Ajo në fakt e kishte nisur si biznes që në vitin 1995 në shtëpi duke bërë bakllava për miqtë, shoqet, koleget e saj. Para 10 vitesh ajo së bashku me nipin e saj, tim shoq, hapën një pastiçeri që e quajtën pastiçeri tradicionale në fillim dhe bënë vetëm 4 produkte me dorë, tespixhe, bakllava, haxhimakulle dhe kadaif me kajmak. Ishin ëmbëlsira 'handmade', të bëra me dorë, nisnin në mëngjes e deri në orën 2:00 të drekës mbaroheshin. Para 4 vitesh, pas përfundimit të pandemisë, pamë që njerëzit nisën të reduktonin sheqerin, nuk donin më kallëpin e madh të bakllavasë, ndaj edhe ne vendosëm që të reformonim bakllavanë duke imituar pak a shumë edhe modelin turk të vogël. Dhe në këtë mënyrë vendosëm që t'i vinim edhe emrin e gjyshes 'Hyri Bakllava' sepse ajo e nisi si ide biznesi me shumë mund. Edhe pse gjyshja sot nuk jeton më, ende e kërkojnë klientët dorën e saj", tha Melani Cani, menaxhere "Hyri Bakllava".

"HYRI BAKLLAVA" shije që nuk harrohet/ Nga kuzhina e gjyshes,

Rruga nuk ka qenë gjithmonë e lehtë. Ka pasur ulje-ngritje, madje edhe një shkëputje njëvjeçare kur familja u zhvendos në Spanjë. Por edhe në atë kohë, mesazhet në rrjete sociale nuk mungonin: “Kur po hapeni sërish?” “Duam një porosi!”. Prej tre muajsh, në ambientin e ri, klientela është rikthyer menjëherë, duke dëshmuar se besimi ndërtohet me vite.

Sot, përveç bakllavasë – ku ajo me pistakio mbetet “on top” – ofrohet një gamë e gjerë tortash dhe ëmbëlsirash të përgatitura nga fillimi deri në fund në laboratorin e tyre. Pa ngjyrues artificialë, pa kompromise me cilësinë. Madje, ngjyrat që përdoren janë artizanale, nga panxhari, boronica apo mjedra.

"10 vite kanë pasur uljet e ngritjet e veta, megjithatë ne kishim një shkëputje. 1 vit u zhvendosëm në Spanjë. Gjatë kësaj kohe na kërkonin në rrjete sociale, pse nuk jeni, duam një porosi etj. Ka rreth 3 muaj që e hapëm në këtë ambient të ri. Menduam që nuk do të na gjenin, por klientela u rikthye direkt. Perveç bakllavasë që dihet se është specialitet, kemi një gamë tortash të ndryshme. Ëmbëlsirat i kemi që nga fillimi, që nga kremi i pastiçerisë e deri në fund të përgatitura në laboratorin tonë. Pa ngjyrues, mendoj që më mirë një ushqim i shëndetshëm dhe cilësor. Me këtë po ambientohen edhe klientët. Kjo është linja që ne kemi vendosur ta mbajmë. Kemi nisur të fusim ngjyrues artizanalë me panxhar, boronicë, mjedër. Jemi munduar të fusim edhe 'brunch' sepse çdo ditë e më shumë ka të huaj. Ata vijnë në mëngjes e patjetër që nuk e nisin me bakllava. Duan diçka me kafen, ndaj kemi nisur tostat me avokado, salmon, vezë, rukola. Të huaj ka mjaft, ka spanjollë, ka izraelitë, anglezë etj."

Ëmbëlsira më e mirë është torta me arra – pa miell, vetëm arra të bluara, krem pastiçerie dhe gjalpë – e thjeshtë në përbërje, por më e shitura. Ndërsa më sfiduesja mbetet “Pink Velvet”, një tortë me disa procese përgatitjeje, ku keku realizohet me krem panxhari dhe pure mjedrash, e mbuluar me çokollatë cilësore.

"HYRI BAKLLAVA" shije që nuk harrohet/ Nga kuzhina e gjyshes,

"Bakllava me pistakio është gjithmonë 'on top', ndërsa nga nga të rejat preferohet torta me arra. Nuk ka miell hiç, është veç arra të bluara, krem pastiçerie, gjalpë. Është e thjeshtë, por më e shitura. Më e vështira për t'u bërë është torta 'pink velvet'. Është e vështirë sepse keku i saj bëhet nga kremi i panxharit, pure mjedrash dhe e veshur me çokollatë të mirë. Ka disa procese, ndaj vonon sepse duhet zier panxhari për ta bërë pure etj."

Kërkesat nuk mungojnë as nga Tirana e Durrësi, ku produktet dërgohen me postë, apo brenda Shkodrës me shërbim "delivery". Edhe pse transporti ndikon disi në freskinë e produktit, dëshira për shijen e “Hyri Bakllava” mbetet e lartë. Synimi është i qartë: ruajtja e standardit dhe zgjerimi në qytete të tjera.

"Kemi shumë kërkesa, sidomos Tiranë-Durrës, i dërgojmë me postë. Patjetër që me postë nuk është e njëjta ëmbëlsirë që merret këtu sepse ndikon rruga, etj., por kërkesat janë të larta. Po ashtu kemi 'delivery' në Shkodër. Ndaj nga këto kërkesa synojmë që përveç mbajtjes së standardit të zgjerohemi në qytete të tjera".

"Hyri Bakllava" nuk është thjesht një pastiçeri. Është një histori familjare, një trashëgimi shijeje, një emër që vazhdon...!/ CNA