E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

"Dy dashuri dhe një veshkë", mes humorit dhe dramës në skenën e Pogradecit

22 Mars 2026, 11:45, Qyteti im CNA

Një histori njerëzore, e mbushur me emocione, humor dhe reflektim, është sjellë për publikun pogradecar përmes komedisë “Dy dashuri dhe një veshkë”, e cila është ngjitur në skenën e Qendrës Kulturore të qytetit.

Nën regjinë e Guri Koços dhe me interpretimin e aktorëve Guri Koço, Alban Prodani, Adea Cale dhe Dhimitraq Tasellari, shfaqja ka arritur të ndërthurë në mënyrë të natyrshme elementët e komikes dhe tragjikes, duke prekur tema të ndjeshme të realitetit të përditshëm.

Në thelb të saj, vepra trajton jetën e dy personazheve që përballen me vështirësi ekonomike, por që mbeten të pasur në shpirt dhe në vlera.

Përmes situatave të thjeshta, por domethënëse, shfaqja sjell në vëmendje rëndësinë e miqësisë së vërtetë dhe sakrificës për tjetrin, duke e kthyer skenën në një pasqyrë të shoqërisë së sotme.

Regjisori dhe njëherazi aktori i shfaqjes, Guri Koço, thekson se vepra nuk mbështetet te humori i zi, por te balanca e hollë mes të qeshurës dhe dhimbjes.

“Komedia nuk ka humor të zi, ka një ndërthurje të jashtëzakonshme midis tragjikes dhe komikes, vetëm se kufiri mes këtyre gjinive është kaq i hollë sa ndonjëherë njerëzit ngatërrohen. Ne kemi punuar me shumë dëshirë prej rreth 2 muajsh”, u shpreh Koço.

Ai shton se në qendër të shfaqjes qëndron një mesazh i fortë për kohën në të cilën jetojmë.

“Shfaqja ka në qendër të saj himnin e miqësisë. Në kohën e sotme, ku gjithçka po shkon drejt degradimit, kjo vepër përpiqet t’u tërheqë vëmendjen njerëzve. Nuk është pasuria ajo që i bën njerëzit miq, por zemra e shpirti”, shtoi ai.

Për aktorin korçar Albano Prodani, kjo shfaqje ka qenë një eksperiencë e veçantë artistike dhe njerëzore, e ndërtuar mbi bashkëpunim dhe përkushtim.

“Mendoj që kemi bërë një shfaqje të bukur, kemi punuar me aktorët e tjerë dhe jemi ndjerë shumë mirë. Mezi pres të shkoj në Korçë për këtë shfaqje”, tha Prodani.

Ai ndalet edhe te raporti i tij me regjisorin, duke e cilësuar atë një bashkëpunim të ngushtë dhe frymëzues.

“Unë jam nxënës i Guri Koços dhe ai më ka marrë në punë në teatër; miqësia jonë është shumë e madhe. Guri punon shumë dhe kjo na bën shumë mirë, pavarësisht se mund të kemi ndonjë fjalë gjatë punës, por pranohen të gjitha”, u shpreh ai.

Ndërkohë, për aktoren Adea Cale, pjesëmarrja në këtë shfaqje përbën një hap të rëndësishëm në rrugëtimin e saj artistik. Ajo vlerëson gjithashtu reagimin e publikut, i cili ka qenë mjaft pozitiv.

“Kjo është nata e dytë që ne dhamë komedinë në Pogradec. Dje ishte premiera dhe emocionet ishin më të mëdha. Publiku i Pogradecit e priti shumë mirë dhe ne jemi shumë të kënaqur me ta. Është privilegj i madh për mua që të jem në këtë kast aktorësh profesionist”, u shpreh aktorja.

“Dy dashuri dhe një veshkë” vjen si një reflektim i ndjerë mbi marrëdhëniet njerëzore, duke dëshmuar se edhe në kushte të vështira, vlerat si miqësia, solidariteti dhe dashuria mbeten thelbësore.

Shfaqja pritet të vijojë rrugëtimin e saj edhe në skenën e Korçës, duke sjellë për publikun jo vetëm të qeshura, por edhe mesazhe që ftojnë për reflektim mbi realitetin dhe raportet mes njerëzve. /CNA