E fundit!

19:08 Aktualitet

Zhvillohet sot protesta e 49-të kundër qeverisë

Këtë të shtunë po zhvillohet protesta qytetare e 49-të...

“Rinia lexon”/ Të rinjtë e Pogradecit sjellin letërsinë në qytet përmes QR kodeve

24 Prill 2026, 15:47, Qyteti im CNA

Në Ditën Ndërkombëtare të Librit, të rinjtë e Pogradecit kanë zgjedhur një mënyrë ndryshe për të promovuar leximin dhe për të thyer stereotipin se rinia nuk lexon. Nën moton “Rinia lexon”, Këshilli Rinor i qytetit ka organizuar një fushatë ndërgjegjësimi që sjell më pranë qytetarëve letërsinë pogradecare. Përfaqësuesi i Këshillit Rinor, Dorian Leka, shprehet se kjo iniciativë vjen çdo vit me forma të reja, ndërsa këtë herë fokusi është vendosur te përfshirja aktive e të rinjve dhe promovimi i autorëve vendas.

"Me rastin e Ditës Ndërkombëtare të Librit, 'Rinia Lexon' është një moto aktiviteti i ndërmarrë nga këshilli rinor Pogradec. Në këtë datë, që është datë ndërkombëtare dhe kremton dëshirën, dashurinë që duhet të kemi për të lexuar librin, për autorët që shkruajnë, ne si këshill rinor e zhvillojmë çdo vit në një formë ndryshe. Këtë vit të rinjtë donin që të kishte një fushatë ndërgjegjësimi, por edhe për të thyer steriotipin që të rinjtë nuk lexojnë. Nuk është e vërtetë, të paktën të rinjtë që janë në Pogradec lexojnë”, është shprehur Leka.

Përmes kësaj nisme, të rinjtë kanë përzgjedhur 10 poetë pogradecarë, veprat e të cilëve i kanë recituar dhe i kanë bërë të aksesueshme për publikun përmes kodeve QR. Këto kode janë vendosur në 10 pika të frekuentuara të qytetit, duke krijuar kështu një itinerar letrar të hapur për këdo. Qytetarë, turistë dhe vetë të rinjtë mund të ndalen në këto stacione, të skanojnë kodet dhe të dëgjojnë interpretimet e poezive, duke e kthyer qytetin në një hapësirë kulturore interaktive.

"Nëpërmjet kësaj fushate, të rinjtë kanë sjellë një model interesant duke përcjellë letërsinë pogradecare, në recitimet e tyre origjinale. Janë 10 poetë të përzgjedhur nga vetë të rinjtë, të recituara e të ngarkuara në një link, të vendosura me një QR poste, do të jenë në 10 stacione letrare të qytetit dhe kushdo që kalon, një banor, turist, por edhe vetë të rinjtë sepse janë zgjedhur stacione të frekuentueshme nga qytetarët, mund të skanojnë QR Code dhe të dëgjojnë leximin e poezive nga të rinjtë”, është shprehur ai.

Kjo iniciativë synon jo vetëm të nxisë dashurinë për librin, por edhe të rrisë vëmendjen ndaj autorëve lokalë, të cilët, sipas të rinjve, meritojnë më shumë hapësirë edhe në sistemin arsimor. Nëpërmjet këtij aktiviteti, Këshilli Rinor i Pogradecit përcjell një mesazh të qartë: të rinjtë lexojnë dhe janë të gatshëm të promovojnë vlerat letrare të qytetit të tyre, duke i sjellë ato më pranë komunitetit në mënyra bashkëkohore.

"Ne mendojmë që kjo është një nismë interesante, mendojmë që do mbjellë te të rinjtë akoma më shumë dëshirën për letërsinë, sidomos atë pogradecare, dhe shpresojmë që të shërbejë si një apel për institucionet vendimmarrëse arsimore që ndoshta është momenti. Meqenëse kemi disa poetë, shkrimtarë që janë të mirënjohur nga zona e Pogradecit, pse jo, të përfshihen në kurrikulat arsimore, të paktën te lënda e letërsisë, në arsimin e mesëm e të lartë. Do të ishte shumë bukur”, ka thënë përfaqësuesi i Këshillit Rinor.

Në një kohë kur teknologjia shpesh shihet si larguese nga libri, të rinjtë e Pogradecit po dëshmojnë të kundërtën, duke e përdorur atë si një urë lidhëse mes lexuesit dhe letërsisë. Nisma të tilla jo vetëm që i japin një frymë të re promovimit të librit, por edhe tregojnë se kultura mund të përcillet me forma kreative, duke e mbajtur gjallë dhe pranë komunitetit. /CNA