E fundit!

19:08 Aktualitet

Zhvillohet sot protesta e 49-të kundër qeverisë

Këtë të shtunë po zhvillohet protesta qytetare e 49-të...

“Dy dashuri dhe një veshkë” ngjitet në skenën e teatrit “Andon Zako Çajupi” në Korçë

30 Mars 2026, 10:12, Qyteti im CNA

“Dy dashuri dhe një veshkë” ngjitet në skenën e

Pas suksesit në Pogradec, komedia “Dy dashuri dhe një veshkë” ka vijuar rrugëtimin e saj artistik në teatrin “Andon Zako Çajupi” në Korçë, ku është pritur me duartrokitje dhe reagime pozitive nga publiku artdashës.

Nën regjinë e Guri Koços dhe me interpretimin e aktorëve Guri Koço, Alban Prodani, Adea Cale dhe Dhimitraq Tasellari, shfaqja sjell në skenë një histori që ndërthur humorin me dramën e përditshmërisë, duke trajtuar me ndjeshmëri jetën e dy njerëzve të thjeshtë, të varfër në kushte, por të pasur në shpirt.

Në skenën e teatrit korçar, shfaqja ka marrë një dimension edhe më të veçantë, për vetë lidhjen e fortë të artistëve me këtë qytet dhe publikun e tij, i njohur për kulturën dhe kërkesën ndaj artit.

“Dy dashuri dhe një veshkë” ngjitet në skenën e

“U ndjeva shumë mirë. Këtu është gjithçka në perfeksion, salla, ndriçimi, njerëzit. Sigurisht që unë kam 50 vite që punoj këtu dhe të gjithë më ndihmuan, megjithëse kisha pretendime për njerëz që duhet të vinin më shumë.”

Regjisori vlerëson gjithashtu punën e bërë për realizimin e kësaj komedie, duke e konsideruar një nga projektet e tij më të arrira.

“Jo se e kam bërë unë shfaqjen dhe luaj rolin kryesor, por them se të tilla shfaqje rrallë vijnë në qytet. Shfaqja është shumë e mirë e madje them me modesti se kam punuar në mënyrë të jashtëzakonshme për 2 muaj. Ishte një shfaqje që nuk pushuan të qeshurat, nuk pushuan duartrokitjet. I falënderoj të gjithë që kanë ardhur dhe them se është një nga punët e mia më të mira.”

“Dy dashuri dhe një veshkë” ngjitet në skenën e

Nga ana tjetër, aktori korçar Alban Prodani shprehet se rikthimi në skenën e qytetit të tij ka një domethënie të veçantë dhe se mbështetja e publikut ka qenë e jashtëzakonshme.

“Kjo është një pyetje që s’ka nevojë të mendohesh shumë. Në qytetin tim unë ndihem gjithmonë mirë, sepse përveçse jemi miq me njëri-tjetrin, mua gjatë gjitha shfaqjeve që kam bërë këtu, them se publiku më përkrah jashtë mase.”

Prodani thekson se bashkëpunimi në këtë shfaqje ka qenë i suksesshëm dhe se publiku e ka mirëpritur.

“Dy dashuri dhe një veshkë” ngjitet në skenën e

“Korçarët janë ai publik që po u pëlqeve të përkrahin. Shfaqja ‘Dy dashuri dhe një veshkë’ me regji të Gurit… them se kaluam shumë mirë. Mendoj se nxorëm një shfaqje të bukur që publiku e priti shumë mirë. Ne këtë si shfaqje duhet ta japim edhe më tej dhe të mos e humbim. Vërtet jam shumë i lumtur.”

“Dy dashuri dhe një veshkë” vjen si një reflektim mbi vlerat njerëzore, miqësinë dhe sakrificën, duke dëshmuar se arti mbetet një nga mënyrat më të forta për të përcjellë mesazhe në shoqëri.