Skandali që rrezikon sigurinë e NATO-s / Në “krevatin” e Dorian Tolës dhe Mark Ndrecës futet edhe Arben Kraja

26 Qershor 2022, 10:26, Aktualitet CNA

Skandali që rrezikon sigurinë e NATO-s / Në

Kreu i SPAK-ut, Arben Kraja

Me 18 qershor, CNA.al raportoi për një skandal ku përfshiheshin disa institucione.

Ministria e Jashtme, Drejtoria e Informacionit të Klasifikuar, Drejtoria e Vettingut dhe Sigurimit Industrial, Shërbimi Informativ Shtetëror dyshohet se kanë vënë në rrezik sigurinë kombëtare dhe sigurinë e NATO-s.

CNA.al raportoi me fakte se si Xhuljana Dumani, motra e vrasësit serial Nuredin Dumani, është pajisur me certifikatë sigurie për sekrete shtetërore të NATO-s.

Pavarësisht se problemi nuk është vetë Xhuljana Dumani në këtë rast, pajisja e saj me certifikatë sigurie për sekrete shtetërore përbënte një skandal.

Pasi Xhuljana Dumani për shkak të vëllait të saj Nuredin Dumani, është lehtë e shantazhueshme, por institucionet e sigurisë dhe Ministria e Jashtme që ka kërkuar ta katapultojë te sekretet shtetërore e kanë anashkaluar këtë fakt.

Dhe në një kohë që Nuredin Dumani rrefente tregun e vrasjeve në DSIK, Dorian Tola dhe Mark Ndreca me 6.06.2022 firmosën certifikatën e sigurisë për Xhuljana Dumanin.

Skandali që rrezikon sigurinë e NATO-s / Në

Thellimi i skandalit

Certifikata e sigurisë për Xhuljana Dumanin, firmosur nga dyshja e DSIK-ut, Tola dhe Ndreca, është një provë e rëndësishme që tregon se institucionet që duhet të mbrojnë sekretet shtetërore, i kanë thyer ato.

Por, çfarë ndodhi me institucionet dhe si e thelluan më tej skandalin.

Reagimi i parë për skandalin erdhi nga Ministria e Jashtme, nga institucioni ku ishte punësuar Xhuljana Dumani.

Foto ilustruese

Me 19 qershor, Ministria për Europën dhe Punët e Jashtme, me anë të një njoftimi për mediat deklaronte se 24-vjeçarja është përzgjedhur për të kryer praktikën 3-mujore në MEPJ si studente ekselente, emri i së cilës ka qenë pjesë e listës që kanë aplikuar për këtë program, sjellë në MEPJ nga Ministria e Arsimit.

“Ashtu si për çdo punonjës tjetër të MEPJ, edhe për znj. Xh.D është kërkuar certifikata e sigurisë nga DSIK. Kjo certifikatë është, pas dëshmisë së penalitetit, një tjetër filtër nëpër të cilin kalon çdo punonjës i MEPJ”, thuhet në deklaratën e Ministrisë.

Por, Ministria e Jashtme, përkatësisht Drejtoria Juridike, e drejtuar nga Etleva Haka, e cila dyshohet se ka nisur këtë skandal, nuk sqaron se si një studente praktikante e fut në zyrën e sekreteve dhe më pas kërkon për të certifikatë sigurie për sekrete shtetërore të NATO-s.

Një ditë pas Ministrisë së Jashtme vjen edhe një reagim nga Xhuljana Dumani, e cila njofton se ka dhënë dorëheqjen nga Ministria e Jashtme dhe lëshon alarmin se po i rrezikohet jeta.

Ndërkohë, nga DSIK nuk ka pasur asnjë reagim, për të sqaruar procedurat, se mbi ç’ligje dhe mbi ç’baza ka lëshuar certifikatën e sigurisë për Xhuljana Dumanin.

A e ka thirrur DSIK Xhuljana Dumanin për ta pyetur, a ka marrë informacione nga Policia, Ministria e Brendshme apo nga SHISH?

Por, kaloi një javë dhe DSIK-u ka heshtur.

Kanë heshtur DSIK, SHISH, dhe të njëjtën linjë ka ndjekur edhe SPAK-u, duke ngritur kështu dyshime, se siguria kombëtare dhe ajo e NATO-s, është vënë në rrezik me përgjegjshmëri prej tyre./CNA.al