web counter
LEXO PA REKLAMA!

SHKARKO APP

App Store
Google Play

E fundit!

x

Kalendar historik/ Çfarë ka ndodhur më 5 tetor?

5 Tetor 2023, 09:24, Blog CNA

Kalendar historik/ Çfarë ka ndodhur më 5 tetor?

2011 - Vdes themeluesi i “Apple”, Stiv Xhobs

Stiv Xhobs, bashkëthemeluesi vizionar i “Apple Inc”, që e revolucionarizoi industrinë kompjuterike, muzikore dhe të komunikimeve mobile me pajisje si Macintosh, iPod, iPhone dhe iPad, vdiq në moshën 56-vjeçare pas komplikacioneve të shkaktuara nga kanceri në pankreas.

I lindur më 24 shkurt 1955 në San Françisko të Kalifornisë nga çifti i studentëve Xhoan Shieble dhe Abdulfatah Xhandali, një emigrant sirian, i vogli Xhobs iu dha për adoptim Pol Xhobsit, një punonjës në Silicon Valley dhe gruas së tij Klara.

Kalendar historik/ Çfarë ka ndodhur më 5 tetor?

Pas diplomimit në shkollën e mesme në Kaliforni në vitin 1972, Xhobs ndoqi shkollën “Reed College” në Portland, Oregon, vetëm për një semester.

Më pas shkoi në Indi dhe studioi Budizmin. Në vitin 1976, ai dhe shoku i tij Stefën Vozniak, themeluan “Apple Computer” në garazhin e prindërve adoptivë të Xhobsit në Los Altos të Kalifornisë.

Në vitin 1977, Xhobs dhe Vozniak prodhuan “Apple II”, kompjuterin e parë personal që u bë tejet popullor. Në vitin 1980, Apple filloi të shitej masivisht te blerësit e zakonshëm, dhe Xhobs u bë i pasur.

Katër vjet më vonë, “Apple” prezantoi në treg Macintosh, një nga kompjuterët e parë personalë, që i lejonte njerëzit të lundronin duke klikuar një ‘mouse’ në vend se të shtypnin komandat në tastierë.

Në vitin 1985, Jobs u largua nga kompania pas një debati të ashpër me bordin e drejtorëve të “Apple”. Po atë vit, ai krijoi NeXT, një biznes që zhvillonte kompjuterë me një performancë të lartë.

Kalendar historik/ Çfarë ka ndodhur më 5 tetor?

Në vitin 1997 u rikthye në drejtimin e “Apple”, dhe nën udhëheqjen e tij kompania gati e falimentuar, u shndërrua në një nga korporatat më të pasura të planetit.

Një personazh karizmatik, maniak i perfeksionizmit, Xhobs thuhej se zotëronte aftësinë për të gjetur me intuitë atë që klientët dëshironin para se ta dinin ata vetë.

Kështu “Apple” prezantoi një seri pajisjesh novatore digjitale, duke përfshirë iPod-in portativ për të dëgjuar muzikë në 2001, iPhone në 2007 dhe kompjuterin tablet në vitin 2010, që u bënë pjesë e jetës së përditshme moderne.

Pavarësisht problemeve shëndetësore, Xhobs e drejtoi kompaninë “Apple” deri më 24 gusht 2011, 6 javë para se të ndërronte jetë. Kur vdiq, Xhobs, baba i 4 fëmijëve, kishte një pasuri prej më shumë se 7 miliardë dollarësh.

Ngjarje të tjera të rëndësishme:

1948 - Një tërmet me magnitudë 7.3 ballë goditi qytetin e Ashgabatit dhe fshatrat përreth në Turkmenistan, duke rrafshuar të gjitha ndërtesat, dhe shkaktuar vdekjen e më shumë se 100.000 njerëzve.

1968 - Policia sulmon demonstruesit e të drejtave civile në Derri të Irlandës së Veriut, ngjarje që konsiderohet si fillimi i “trazirave” midis protestantëve dhe katolikëve.

1986 - Në SHBA një hetim parlamentar zbuloi se CIA dërgonte fshehurazi në Nikaragua ndihmë për rebelët Contras, që ishin kundër qeverisë në fuqi.

1994 - 48 anëtarë të Urdhrit të Traditës Diellore, një sekt në Zvicër, kryejnë vetëvrasje kolektive, për t’i shpëtuar hipokrizisë dhe represionit të kësaj bote.

2000 - Përkrahësit e opozitës, sulmojnë parlamentin jugosllav në Beograd, duke shpallur Vojisllav Koshtunicën si presidentin e ri të federatës, duke rrëzuar kështu nga pushteti Sllobodan Milosheviçin, që refuzoi të njihte fitoren e zgjedhjeve nga opozita në raundin e parë./ Përshtatur nga CNA





Lajmet e fundit nga