E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Mbahet “Festa e mollës” në Dvoran/ Mes vështirësive dhe shqetësimeve të fermerëve

24 Tetor 2024, 11:46, Qyteti im CNA

"Festa e mollës" në fshatin Dvoran të Korçës është kthyer prej vitesh në një nga festat më të veçanta të stinës së vjeshtës. Kjo festë është tashmë një traditë për këtë fshat, i cili mbetet një nga fshatrat që për herë të parë në vitin 1956 hodhi rrënjën e parë të këtij produkti. Atmosfera e ngrohtë e plot gjallëri, edhe këtë vit ka mbledhur banorë e vizitorë të ndryshëm të cilët kanë parë panairin me varietete të mollës nga fermerët e fshatit, si edhe janë argëtuar nën shoqërinë e miqve e familjarëve.

"Festa e mollës" është menduar nga bashkia si një mundësi promovimi për fermerët të cilët prej vitesh kultivojnë e tregtojnë këtë produkt, por gjithashtu edhe me synimin për të zhvilluar turizmin.

Serian Bregu është një fermer i kësaj zone, i cili kultivon mollën që prej vitit 2006 dhe ka trashëguar disa varietete duke nisur nga molla golden, starkinge, fuxhi, dhe varietete të cilat hyjnë çdo vit në treg. Për Serianin, kjo festë ka rëndësi për vetë faktin se Dvorani njihet si fshati i mollës, ku kjo kulturë bujqësore është kthyer në një traditë ndër breza.

"Ferma jonë ka një prejardhje prej vitit 2006, kur filluam me kultivimin e mollës. Varietetet kryesore që kemi autoktone, të trashëguara nga fermat tona është gold, kemi starkingun, varietetet e reja si fuxhi dhe të tjera që hyjnë çdo vit në treg. Në zonën tonë nuk ka nevojë që të bësh shumë reklamë sepse është traditë prej shumë vitesh që në vitin 1956 kur është vënë rrënja e parë e mollës. Thjesht të jetë një festë që të kujtojë mollën, të krenohemi që ne si Dvoran e kemi këtë festë, siç ka Polena festën e lakrorit. Është një festë që i mbledh të gjithë bashkë në një ditë."

"Festa e mollës" organizohet çdo vit në kohën kur është bërë vjelja e mollëve. Fermeri tregon problematikën që i ka shoqëruar viteve të fundit, duke thënë se çmimi me të cilin e shesin është i ulët. Sipas tij, kostot janë rritur, përfshirë këtu dhe krahun e punës, ndërsa ka rënë edhe vrulli i mëparshëm që të gjithë mezi e prisnin momentin e grumbullimit dhe shitjes së produktit.

"Këtë vit, në disa bahçe kemi problemin me breshërin, ndërsa në parcelat e tjera kemi produkte shumë cilësore pavarësisht çmimit që është pak i ulët. Vetëm kjo na godet. Sot për sot, nga dhomat frigoriferike nuk kanë dalë akoma mollët, thjesht janë grumbulluar. Kurse varietetet e pastra si goldi janë shitur me 400 lekë (të vjetër), ka dhe varietete të tjera me numra të ndryshëm që bën të ndryshojë dhe çmimi i mollës. Kostot janë rritur shumë, sidomos krahu i punës, dhe nuk është më ai vrulli i mëparshëm që kemi pasur atë dëshirën për të vazhduar."

Një tjeter fermer i fshatit Dvoran që u bë pjesë e festës me stendën ku promovoi disa lloje të mollës, është Arjan Baki, i cili prej 10 vitesh merret me këtë kulturë bujqësore. Ai nxjerr në pah problematikën e prodhimit duke thënë se nuk ka qenë i bollshëm krahasuar me vjet, ndërsa shitja s'ka qenë në çmimin e duhur duke pësuar përgjysmim të saj.

"Unë merrem prej të paktën 10 vitesh me kultivimin e mollës, sepse isha emigrant në Greqi dhe jam kthyer. Varietetet kryesore janë gold, starking dhe grannysmith. Prodhimi nuk ka qenë i bollshëm, vjet kishte më shumë, por shitja s'ka qenë me çmimet e duhura. Vjet u shit pak më mirë. Vjet ishte te 600 lekë (të vjetër), këtë vit u shit me 350 lekë (të vjetër) nëpër frigoriferë. Pak a shumë kostoja doli, por kënaqësia ishte ta shisnim pak më shumë. 'Festa e mollës' në vetvete është një reklamë e mirë që i bëhet fshatit tonë dhe mollës."

Pjesë e festës këtë edicion kanë qenë edhe nxënësit dhe stafi mësimor i Shkollës Profesionale të Shërbimeve të cilët në stendën e tyre kanë promovuar disa nga gatimet ku produkti kryesor është molla. Përfaqësuesja e Departamentit të Bujqësisë në këtë shkollë, Eranda Tërpini, ka treguar se molla është mbreti i frutave në zonën e Korçës, dhe me këtë produkt, nxënësit kanë sjellë gatime si ëmbëlsira e mollë sheqeri, por edhe nënprodukte të saj si lëngu e vera e mollës.

"Molla mund të quhet mbreti i frutave në zonën e Korçës, si vend bujqësor e me tradita të hershme kontemporane, ka eksperiencë e vazhdimësi sa i përket prodhimit të mollës. Unë jam nga Shkolla Profesionale e Shërbimeve, përfaqësoj departamentin e bujqësisë dhe këtu kemi sjellë varietete të mollëve që kultivohen në bazën e shkollës sonë. Gatimet janë mollë sheqeri dhe ëmbëlsira, prodhime si lëng molle, verë molle, të cilat ne i prodhojmë dhe ua ofrojmë pjesëmarrësve në panaire."

Eranda tregon edhe vlerat e mëdha që ka ky frut për shëndetin tonë, ndërsa shprehet se mund të përdoret edhe në industrinë farmaceutike.

"Mollët që kultivohen në rrethin e Korçës janë molla starkinge, golden dhe molla hajdare që kultivohet prej vitesh në shkollën tonë. Janë mollë që kanë vlerë ushqimore të lartë, vitamina dhe bëjnë mirë për shëndetin. Molla ka dhe një aromë shumë të mirë që mund të përdoret në industrinë farmaceutike dhe shërben për përditshmërinë e individit, i cili duhet ta ketë mollën në tavolinë."

"Festa e mollës" është një nga festat më të veçanta të Korçës, e cila zhvillohet në fshatin Dvoran, aty ku kultivimi i këtij fruti është një traditë shumëvjeçare. Ndonëse fermerët vitet e fundit kanë hasur vështirësi në tregtimin e kulturave bujqësore, ky aktivitet është menduar për t'i dhënë rëndësinë e duhur dhe për të promovuar këtë produkt, ndërsa synim mbetet zhvillimi i turizmit./ CNA