Surpriza e panairit të Berlinit/ Arbana Osmani prezanton “Bana’s” në “Global Albanian Gastronomy”

2 Tetor 2024, 15:26, Qyteti im CNA

Në Berlin të Gjermanisë zhvillohet “Global Albanian Gastronomy”, një festival gastronomie, që mbahet këtë të mërkurë dhe të enjten e 3 tetorit.

Gazetari Elvi Fundo ka shkuar në “Arena Halle” të Berlinit për të parë nga afër këtë panair, në të cilin marrin pjesë 110 kompani, përfshirë ato shqiptare.

Surpriza e këtij panairi ishte pjesëmarrja e Arbana Osmanit, e cila ka zgjedhur që restorantin e saj “Bana-s” tashmë t’ia prezantojë edhe publikut gjerman. Arbana Osmani vendosi të ndajë për CNA-në disa nga strategjitë për biznesin e saj dhe se si lindi pasioni për të hapur këtë restorant, i cili që në fillesat e tij pati shumë sukses dhe u mirëprit nga shqiptarët.

“‘Bana’s’ ka nisur nga një pasion imi për kuzhinën, kulinarinë dhe dëshirën për të ngrënë mirë. Kam publikuar dy libra, që në fakt kanë recetat e mamit, gjyshes, por edhe nga udhëtimet. Asnjë shpikje e madhe, por një dëshirë për të ndarë receta të mira me ndjekësit e mi”, tha Osmani.

Pa mbushur ende një vit nga hapja e “Bana-s”, restoranti ka 3 pika të tij në Tiranë, Shkodër dhe Prishtinë.

Arbana Osmani

Osmani zbulon se synimi i saj i afërt është që të zgjerohet në tregun europian, duke hapur restorante edhe në Gjermani dhe Zvicër.

“Lindi nga pasioni, vijoi me dëshirën për ta çuar këtë brand në një nivel më të lartë. Ne akoma pa bërë 1 vit kemi tri pika, një në Tiranë, një në Shkodër dhe një në Prishtinë. Jemi duke parë mundësinë për t’u zgjeruar në tregun europian, si në Gjermani, apo Zvicër”, tha Osmani.

Arbana Osmani është një ndër moderatoret e mirafirmuara në tregun mediatik shqiptar dhe nuk kishte si mos ta pyesnim se cila prej dy botëve është më e bukur, ajo e kulinarisë apo ajo e medias.

“Janë të ndryshme, por të themi se bota e kulinarisë ka më pak stres, është më pak terapeutike. Mendoj që vëmendjen e mori brandi, se unë isha një personazh i njohur, por askush nuk do të hajë gjëra të këqija se i pëlqen Arbana. Mendoj se suksesi është puna”, tha Osmani.

Përveç “Bana’s”, shumë kompani të tjera shqiptare janë pjesë e këtij aktiviteti të rëndësishëm që zhvillohet në Berlin për dy ditë me radhë dhe që pritet të vizitohet nga rreth 5 mijë persona./ CNA