web counter
LEXO PA REKLAMA!

SHKARKO APP

App Store
Google Play

E fundit!

x

Korça Short Film Festival, 45 filma nga 22 vende të ndryshme të botës

18 Shtator 2024, 15:18, Qyteti im CNA

Ka startuar këtë të martë edicioni i 11-të i Korça Short Film Festival, me një program special në ceremoninë e hapjes së tij. Ky festival, tashmë një traditë për qytetin e Korçës, sjell për publikun 5 ditë të organizimit, ku do të shfaqen 45 filma të shkurtër nga 22 vende të ndryshme të botës. Në ditën e parë të festivalit u shfaqën dy filma të shkurtër me programin special "Films from Palestine", ku regjisorët palestinezë i kanë realizuar aq bukur, ndërsa këto filma janë prodhuar si bashkëfinancim mes Francës, Belgjikës, Polonisë e Palestinës.

Filmat janë të ndarë në katër kategori, kategoria e parë është ajo e filmave kombëtarë, duke vazhduar me kategorinë e filmave ndërkombëtarë, studentorë dhe dokumentarë. Ndërkohë, në 21 shtator, në orën 11:00, te kinema “Majestik”, do të shfaqet programi për fëmijë, i cili përbëhet nga 8 filma të shkurtër që janë të përshtatshëm për moshat 7-11 vjeç.

Korça Short Film Festival, 45 filma nga 22 vende të ndryshme të

Gledis Bica, drejtori ekzekutiv i festivalit, tregon detaje rreth programit të këtij viti duke thënë se filmi kushtuar situatës në Palestinë, që bëri edhe hapjen e festivalit, vjen si një reflektim për vendet që ndodhen sot në situatë lufte.

"Këtë vit do të shfaqen 45 filma që vijnë nga 22 vende të botës. Mes tyre janë edhe 5 filma shqiptarë, nga kineastë të Shqipërisë, Kosovës dhe Maqedonisë së Veriut. Filmat u përkasin katër kategorive: ndërkombëtare, kombëtare, studentore dhe dokumentare, si dhe filma për fëmijë. Festivali do të zgjasë pesë net dhe është hapur me një film të dedikuar situatës në Palestinë. Ky film vjen si reflektim për vendet që sot ndodhen në situatë lufte. Filmat janë prodhime të regjisorëve palestinezë dhe janë krijuar në bashkëpunim me artistë nga Polonia dhe Belgjika", deklaroi Gledis Bica.

Në këtë edicion, risi është tematika e lirë, ku ndryshe nga vitet e tjera, këtë vit festivali nuk ka kufizime. Disa nga tematikat e përzgjedhura nga regjisorët janë kushtuar emigracionit, zhvendosjes së popullsisë, varfërisë dhe problemet sociale.

Korça Short Film Festival, 45 filma nga 22 vende të ndryshme të

"Sa i takon tematikës, festivali nuk ka kufizime, por këtë edicion kemi filma që trajtojnë emigracionin, zhvendosjet e popullsisë për shkak të luftës, varfërisë dhe problemeve sociale. Filmat e shkurtër zakonisht shfaqen vetëm në festivale dhe paraqesin një ndërthurje mes kineastëve të njohur dhe artistëve të rinj. Madje, edhe regjisorët e njohur shpesh eksperimentojnë me filmin e shkurtër", u shpreh ai

Për anëtaren e juristë, Anxhela Çikopana, ky edicion do të jetë mjaft i veçantë. Ajo që juria veçon si prurje interesante është pikërisht filmi për Palestinën, ndërsa publiku ka mundësinë që nëpërmjet filmave të shkurtër të kuptojë më shpejt thelbin e historisë.

Korça Short Film Festival, 45 filma nga 22 vende të ndryshme të

"Çdo edicion sjell filma të rinj. Në këtë edicion do të veçoja si prurje interesante filmin për Palestinën, i cili trajton një problematikë që na vjen përmes filmit. Edhe pse publiku nuk është shumë i njohur me zhanrin e filmit të shkurtër, nga këto filma mund të kuptohet më shpejt thelbi i historisë, kanë ritëm dhe nuk të lodhin", tha Anxhela Çikopana.

KO:SH Festival do të zgjatë edhe për katër ditë të tjera në Korçë, me program mjaft të veçantë dhe me realizime shumë të bukura të regjisorëve shqiptarë e të huaj. Publiku korçar do të ndjekë 45 filma të shkurtër, me një shumëllojshmëri tematikash, ndërsa edhe fëmijët do të kenë një ditë kushtuar moshës 7-11 vjeç, me mundësinë për të parë 8 filma. Ceremonia e ndarjes së çmimeve do të zhvillohet ditën e shtunë, në datë 21 shtator, pranë kinemasë “Majestik”./ CNA TV





Lajmet e fundit nga