web counter
LEXO PA REKLAMA!

SHKARKO APP

App Store
Google Play

E fundit!

x

Promovimi i traditave dhe kulturës/ Festivali Folklorik Tipologjik Kombëtar i Lojërave Popullore dhe Riteve

26 Korrik 2024, 15:10, Qyteti im CNA

Promovimi i traditave dhe kulturës/ Festivali Folklorik Tipologjik

Festivali Folklorik Tipologjik Kombëtar i Lojërave Popullore dhe Riteve vjen për herë të dytë në Bashkinë e Devollit, duke bërë bashkë 8 grupe performuese nga e gjithë Shqipëria. Për të dytin edicion radhazi, u përzgjodh pikërisht zona e Devollit për të zhvilluar këtë event mjaft të veçantë që ka për qëllim promovimin e traditave dhe kulturës, jo vetëm të kësaj zone, por edhe të zonave të Shqipërisë.

8 grupe pjesëmarrëse nga disa prej bashkive të vendit tonë kanë performuar në natën e parë të eventit me valle tradicionale dhe lojëra e rite popullore duke treguar rëndësinë e madhe të tyre për çdo zonë. Risia e këtij viti është pikërisht pjesëmarrja e lartë e të rinjve dhe fëmijëve, të cilët po ndjekin traditën e bukur të trashëguar brez pas brezi, duke shfaqur performanca të ndryshme dhe aq të bukura për publikun.

Promovimi i traditave dhe kulturës/ Festivali Folklorik Tipologjik

Sonila Bushi është një nga vajzat më të vogla të grupit përfaqësues të Bashkisë së Lezhës, e cila merr pjesë për herë të parë në këtë festival. Me shumë emocione ajo tregon se kanë për qëllim të transmetojnë te publiku traditën e qytetit, ku nëpërmjet syve të të vegjëlve, tregojnë edhe trashëgiminë kulturore e folklorike nga më të rriturit.

"Për ne është hera e parë që vijmë në qytetin e Bilishtit, vijmë nga rrethi i Lezhës. Është hera e parë që vijmë në këtë festival dhe po na pëlqen shumë. Ne kemi përgatitur disa lojëra tradicionale dhe nëpërmjet tyre duam të transmetojmë te publiku traditën e qytetit tonë. Ndihemi të emocionuar dhe besoj se do të kënaqemi shumë. Ne mund të jemi të vegjël, por nëpërmjet syve tanë ne transmetojmë gjithçka që transmetojnë edhe të rriturit. Do të ishte shumë mirë që të rinjtë të merrnin pjesë në këto lloj aktivitetesh sepse i zhvillon shumë dhe i përgatit për të ardhmen."

Promovimi i traditave dhe kulturës/ Festivali Folklorik Tipologjik

Devolli është ndër trevat që pikas për mikpritjen, bujarinë, fisnikërinë dhe njëkohësisht njihet për kryevlerën e valles devolliçe. Këtë e tregon Monika Muzikanti, punonjëse e Qendrës Kulturore në Devoll, e veshur me një kostum tradicional të kësaj zone. Ajo thotë se njerëzit e Devollit nuk harrojnë atë që kanë trashëguar brez pas brezi.

"Karakteristikat kryesore të kësaj krahine janë mikpritja, bujaria, fisnikëria dhe njëkohësisht kyevlerën e vlerave ‘Vallen Devolliçe’. Rëndësia më e madhe është që ne të shpalosin ndër breza kulturën e mbartur sepse kultura është ajo që di të flasë me gjuhën më të bukur të trupit, të veshjeve, është etnografia jonë. Ajo që është dëshmi që jemi një popull i lashtë, një popull që nuk harrojmë atë që na kanë trashëguar brez pas brezi, është pikërisht veshja që në shumë fshatra të Devollit mbahet jo vetëm si relikë e bukur, por edhe në përditshmëri. Për të mos lënë më pas tekstet e bukura të këngëve që janë perlat e Shqipërisë."

Promovimi i traditave dhe kulturës/ Festivali Folklorik Tipologjik

Niko Kotherja, drejtor i Qendrës Kombëtare të Veprimtarive Tradicionale, thekson faktin se këtë vit ka një numër të jashtëzakonshëm të rinjsh dhe fëmijësh që do të interpretojnë lojëra popullore dhe rite. ky do të jetë një edicion me shumë ngjyra, larmishmëri dhe grupe interpretuese, të cilët do ta bëjnë më të vështirë punën e jurisë për dhënien e çmimeve në përfundim të festivalit.

"Është interesante që këtë vit kemi një numër të jashtëzakonshëm të rinjsh dhe fëmijësh që do të interpretojnë lojëra popullore dhe rite, të cilat vijnë nga zonat që ata përfaqësojnë. Besoj që do të vijë një edicion që do të sjellë shumë ngjyra, larmi, grupe interpretuese. Besoj se do të jetë punë e vështirë e jurisë për të dhënë çmimet në fund të natës së dytë, por është një nismë shumë e mirë e cila tregon pjesëmarrjen e të rinjve, që na jep shpresë e besim për të kuptuar se në të ardhmen jo vetëm që nuk do të harrohen lojërat popullore shqiptare, por do të ketë një bazë të fortë trashëgimie."

Promovimi i traditave dhe kulturës/ Festivali Folklorik Tipologjik

Koreografi i Qendrës Kulturore në Devoll, Sokol Çeka, tregon se kjo zonë është mjaft e pasur në folklor, veçanërisht në kërcimet popullore tradicionale. Ai shprehet se Devolli është mikpritës për këngët dhe vallet, duke thënë se ky festival është gjithëpërfshirës dhe i harmonizuar për të gjitha grupmoshat.

"Devolli është një trevë shumë e pasur në folklor, sidomos në kërcimet popullore folklorike. Kemi ditë që punojmë sepse tashmë ky festival është hipotekuar në Devoll. Devolli është mikpritës për këngët dhe vallet. Kemi sjellë lojëra të trevës sonë të cilat janë të harmonizuar me të tria grupmoshat sepse ky festival është gjithëpërfshirës. Të gjithë e dinë që devolliu nuk punon vetëm tokën, por edhe artin me të cilin ai çlodhet."

Promovimi i traditave dhe kulturës/ Festivali Folklorik Tipologjik

Bashkia Devoll u kujdes deri në detaje për organizimin mjaft të bukur të këtij edicioni. Kryetari i bashkisë, Eduard Duro, tregon fokusin kryesor të këtij festivali me qëllim promovimin e kulturës dhe riteve, pasi kryefjala e çdo bashkie është trashëgimia brez pas brezi e kulturës tradicionale të zonës.

"Është një veprimtari që ne duam ta kthejmë në traditë në Bashkinë Devoll dhe shpresoj të gjitha grupet pjesëmarrëse të mbeten të kënaqura dhe ne të promovojmë kulturën, ritet dhe pse jo zonën tonë të mrekullueshme të Devollit. Turizmi është kryefjala e çdo bashkie, por kjo shërben më tepër që ne të japim kuptimin e riteve tradicionale të zonave të ndryshme të vendit tonë dhe ato të jenë të trashëgueshme brez pas brezi në të gjithë popullsinë."

Promovimi i traditave dhe kulturës/ Festivali Folklorik Tipologjik

Në natën e parë të festivalit, publiku ka shijuar performancat fantastike të 4 grupeve nga Lezha, Elbasani, Gjirokastra dhe Dimali, ndërsa në natën e dytë do të performojnë grupet e Devollit, Gramshit, Pukës, Fierit e Lushnjës. Ky festival është një nga më të rëndësishmit që zhvillohet në Devoll, pasi bën bashkë grupe të ndryshme nga i gjithë vendi për të shpalosur vlerat dhe të veçantat e zonave./ CNA TV





Lajmet e fundit nga