web counter
LEXO PA REKLAMA!

SHKARKO APP

App Store
Google Play

E fundit!

x

Mozaiku "Iliria"/ Realizimi nga piktor Anastas Kostandini, në fasadën e Bashkisë së Pogradecit

11 Qershor 2024, 13:02, Qyteti im CNA

Anastas Kostandini, piktori i njohur pogradecar, ka realizuar një mozaik në fasadën qendrore të Bashkisë së Pogradecit. Këtë mozaik piktori e ka titulluar "Iliria", titull ky që përmban një histori 2500-vjeçare ilire, në Selcën e Poshtme. Në këtë zonë janë vendosur varret e mbretërve ilirë, ndërsa është gjetur edhe pafta e kthyer tashmë në një mozaik.

Anastas Kostandini, i njohur në Pogradec si "Taso", mund të konsiderohet si piktori i veprave monumentale, i cili ka studiuar të gjitha veprat e Mitrush Kutelit, ashtu si edhe periudhën e Ilirisë, duke filluar me varret e Selcës dhe duke vazhduar me periudhën e Enkelejve.

Anastas Kostandini tregon se Pogradeci është qyteti i gjetjeve të mëdha arkeologjike, ndërsa vetë piktori ka ndjekur në këtë mozaik, linjën e identitetit kombëtar nëpërmjet artit.

Mozaiku "Iliria"/ Realizimi nga piktor Anastas Kostandini, në
Anastas Kostandini, burimi CNA

"Ky përfaqëson Ilrinë, e cila është një temë e madhe e lashtësisë së kombit shqiptar dhe tema të tilla nuk janë të shpeshta. Pogradeci është një vend i gjetjeve të mëdha arkeologjike dhe njihet për varret e mbretërve ilirë. Fakti që Mitrush Kuteli ka shkruar kryevepra mbi Ilirinë nuk është rastësi, por është shkruar mbi një territor që është një nga epiqendrat e Ilirisë. Jemi në botën e Enkelejve, fiset e mëdha ilire, është gjëmëmadh dhe kanë shkruar histori legjendare në botën antike. Unë ndoqa linjën e këtij identiteti kombëtar nëpërmjet artit."

Realizimi i një mozaiku të tillë, për kryebashkiakun Ilir Xhakolli, është një nga veprat që i mungonte qytetit, ndërsa do t’i japë një tjetër pamje edhe turizmit. Xhakolli tregon se kanë gati 1 vit që përgatiteshin për këtë vepër arti, për të realizuar këtë mozaik që tregon shumë për historinë dhe arkeologjinë shqiptare.

Mozaiku "Iliria"/ Realizimi nga piktor Anastas Kostandini, në
Ilir Xhakolli, burimi CNA

"Kemi gati 1 vit që merremi me këtë punë, me propozim nga unë i kërkova Tasos që të linte gjurmën e vet këtu, sigurisht që Taso e pranoi. Kjo i kushtohet edhe vëllait të Tasos, Rako Kostandinit, i cili ka qenë arkitekti që ka ndjekur punimet kur ndërtohej bashkia. Bashkë me Tason u munduam të sjellim një ikonë të Pogradecit siç është pafta e Selcës e gjetur nga gërmimet arkeologjike atje që është me një histori në shek. IV para erës sonë, e cila tregon historinë dhe lashtësinë që ka Pogradeci. Taso, me mjeshtërinë e vet, e ka quajtur mozaiku "Iliria" dhe unë e falënderoj për dhuratën që i bëri bashkisë dhe Pogradecit."

Për artistin pogradecar Anastas Kostandini, ky është mozaiku i parë i realizuar për qytetin e Pogradecit, ndërsa së bashku me autorë të tjerë, ai ka qenë pjesë e realizimit të veprave edhe në Muzeun Kombëtar në kryeqytet./ CNA TV





Lajmet e fundit nga