Rikthehet pelikani kaçurrel në ujërat e liqenit të Prespës

27 Maj 2024, 21:12, Qyteti im CNA

Rikthehet pelikani kaçurrel në ujërat e liqenit të Prespës së Madhe. Pelikani kaçurrel është një nga shpendët më të mëdhenj fluturues, një nga më të veçantët që ekziston në Prespë. Duket se numri i tij është reduktuar ndjeshëm krahasuar me vitin 2022 për arsye të rënies së gripit të shpendëve. Specialisti i fushës, Vasil Mele ka treguar se gjatë cencusit të kryer në liqenet e Prespës së Madhe, kanë gjetur 50 pelikanë, krahasuar me 495 që ka patur vitet e kaluara.

“Ne jemi para një fakti që diskutohet për pelikanin kaçurrel që është një nga shpendët më të mëdhenj fluturues që ekziston. Prezenca e tij në liqenet e Prespës mund të themi që nga pranvera e vitit 2022, është reduktuar në masë për arsye të rënies së gripit të shpendëve, dhe në momentin pasi aty folezon pelikani kaçurrel, e kur mbërrin në Prespën greke, ka humbur një numër i konsiderueshëm pelikanësh. Vitin e parë pas rënies së shpendëve, mund të them që është rralluar jashtë mase dhe prezenca në liqenet e Prespës ka qenë shumë e ulët. Nga censusi që kemi zhvilluar ne në liqenet e Prespës së Madhe, kemi gjetur rreth 50 pelikanë, kur para rënies së gripit të shpendëve rreth datës 5-6 të muajit Maj, ne brenda një dite kemi numëruar rreth 495 individë. Pra shikojmë një reduktim në masë të këtij shpendi” tha Vasil Mele.

Fatmirësisht, pelikani kaçurrel po vihet re se ka patur një rritje në këto liqene së fundmi.

“Sot e kësaj dite numri ka ardhur duke u rritur, për arsye edhe të daljes së individëve të rinj dhe numri po vjen duke u rritur.

Pellgu mbledhës dhe liqenet e Prespës janë një habitat për një numër të konsiderueshëm shpendësh, kryesisht ato të ujit. Këto shpendë kanë ardhur në rritje, numri i tyre në shtim. Nëse i referohemi censusit të shpendëve dimërues, mund të them që numri i tyre ka ardhur në ulje, por si lloje presenca ka qenë aty aty. Kjo për arsye edhe të ngrohjes globale që ka ardhur në këto ekosisteme”, u shpreh Mele.

Prespa e Madhe është një habitat që ka një prezencë të lartë të shpendëve dimërues, po ashtu edhe të shpendëve të ujit./ CNA