Orkestra e Harqeve të Korçës, probleme me kontratat/ Dirigjenti: Duam rritje rroge

6 Mars 2024, 12:36, Qyteti im CNA

Orkestra e Harqeve të Korçës, probleme me kontratat/

Dirigjenti Kostika Tanto

Dirigjenti Kostika Tanto ka bërë një reagim për mosrinovimin e kontratës për një pjesë të instrumentistëve të Orkestrës së Harqeve të Korçës.

Sipas tij, artistët kanë kërkuar rritjen e pagesës në fund të vitit të kaluar duke refuzuar edhe përfshirjen në Orkestrën Simfonike deri në marrjen e një përgjigjeje, ndërsa në fillimin e këtij viti kontratat e gjysmës së tyre nuk janë rinovuar.

Nga 18 anëtarë të Orkestrës së Harqeve në Korçë, 9 prej tyre nuk janë më pjesë e këtij formacioni. Drejtuesi i Orkestrës, Kostika Tanto, thotë se për këtë vit për 9 prej tyre nuk u rinovua kontrata.

“Arsyeja e daljes para jush është se një pjesë e Orkestrës së Harqeve që unë kam drejtuar prej 8 vitesh, është lënë jashtë kontratës së vitit 2024. Pse jemi lënë jashtë këtij informacioni? Po bëj një kronologji shumë të shkurtër, në nëntor i kemi dërguar një letër bashkisë për një kërkesë page dhe sot që flasim nuk kemi akoma përgjigje. Në dhjetor na thërrasin që të jemi pjesëtarë të një formacioni të ri si Orkestër Simfonike dhe ne nuk pranuam, pasi kërkesat tona nuk kishin marrë përgjigje. Gjë që bëri të largoheshin të gjithë.

Orkestra e Harqeve të Korçës, probleme me kontratat/

Në janar disa shkojnë në këtë orkestër, kurse 9 veta nga Orkestra e Harqeve nuk shkojnë akoma. Ne kërkojmë një zbardhje të kësaj kontrate se kemi sinjalizime shumë të forta se mbi gjysma e Orkestrës së Harqeve është bërë me orkestrantë që punojnë në Radio Televizion në Tiranë. Është fyerje për ne korçarët që të mos marrim pjesë ne, dhe marrin pjesë ata. Sa për veten time, në pozicionin tim jam krejt i paqartë, edhe pse këtë formacion e drejtoja prej 8 vitesh, dhe dirigjent i orkestrës me sa kam marrë vesh është një rezident që banon Lamia.

Orkestra ka 18 anëtarë, dhe 9 prej tyre janë jashtë. Këta të 9 janë me shkollë të lartë. Kemi kërkuar sqarime dhe nuk na janë dhënë, kërkuam listën e Orkestrës së Harqeve dhe nuk na e japin. Pagesa e parë është bërë. Pagesa jonë ka qenë 60 mijë lekë, tani është bërë 68 mijë lekë, pra është rritur 8 mijë lekë të vjetër. Ne jemi të pakënaqur me shpërblimin, dhe i kërkuam bashkisë të shpërblehemi si ‘motrat’ tona, Elbasani, Durrësi dhe Shkodra. Kjo gjë nuk është pranuar, atëherë ne filluam e u larguam dhe këta duan formacion të ri për Orkestrën Simfonike. Kushtet e Korçës nuk besoj se e bëjnë një Orkestër Simfonike. Është si një ekip futbolli me 11 lojtarë, dhe të ngelen 6 lojtarë. Mungojnë instrumentet.

Orkestra e Harqeve të Korçës, probleme me kontratat/

Kontrata ka qenë që të gjithë duhet të bëjnë 8 prova në muaj për të marrë asistencën e pagës, Tirana do vijë 8 herë në muaj në Korçë për prova? Erzeni do vijë nga Lamia në Korçë për të bërë 8 herë prova në muaj? Ka paqartësi, ka mjegull brenda. Sigurisht që jemi të gatshëm të rikthehemi sepse atë zanat kemi. Mosvajtja në Orkestrën Simfonike është si rezultat i mosplotësimit të kërkesave tona. Kërkuam pranë bashkisë të na shtohej paga dhe nuk na përfillën fare. Është lajm i mirë për Korçën, por jo me mercenarë, sepse nuk bëhet Orkestra Simfonike me forcat që ka Korça. Duhen instrumente, unë s’dua t’i them tani çfarë po mungojnë”, deklaroi Tanto.

Në një reagim, Qendra e Artit e Kulturës në Korçë ka thirrur te gjitha forcat artistike për të qenë pjesë e festimeve të inaugurimit të këtij institucioni dhe 100-vjetorit të Orkestrës Simfonike. Sipas drejtuesve të Qendrës, ky vit do të jetë viti i ringritjes së Orkestrës Simfonike të Korçës me rikthimin e dirigjentit Ilir Erzeni dhe 44 instrumentistëve që tashmë kanë nisur punën./ CNA