web counter
LEXO PA REKLAMA!

SHKARKO APP

App Store
Google Play

E fundit!

x

Ambasadori gjerman, në Pogradec/ Shpërndan ndihma për banorët në Buçimas

14 Maj 2024, 16:57, Qyteti im CNA
Ambasadori gjerman, në Pogradec/ Shpërndan ndihma për
Ambasadori gjerman në Shqipëri Karl Bergner

Ambasadori gjerman në Shqipëri Karl Bergner ka vizituar ditën e sotme qytetin e Pogradecit. Vizita e tij ka filluar prej orës 10:30 në Njësinë Administrative Buçimas, me qëllim shpërndarjen e ndihmave nga shoqata të ndryshme gjermane për banorët.

Pak ditë më parë, Cna Tv ka njoftuar përmes një reportazhi, aktivitetin që do të zhvillohet pasditen e sotme në qytetin liqenor, ku pjesëmarrës do të jenë edhe motorristët gjermanë. Po këta motorristë kanë bashkëpunuar në dhënien e ndihmave në Buçimas së bashku me stafin e ambasadës gjermane.

Pas shpërndarjes së ndihmave, ambasadori gjerman ka vizituar bashkinë e Pogradecit ku u mirëprit nga zv/kryetarja Entela Gusho ndërsa në një deklaratë për mediat ai ka theksuar bashkëpunimin ndërqytetas dhe partneritetin midis Bashkisë Pogradec dhe një qyteti verior të Gjermanisë.

“Ju përshëndes të gjithëve, jam tepër i gëzuar që ndodhem sot në Pogradec. Pogradeci në fakt është i vetmi qytet në të gjithë Shqipërinë i cili ka një partneritet bashkiak ndërqytetas me një qytet në veri të Gjermanisë. Këtu në Pogradec është një veçori tjetër karakteristike bashkëpunimi midis shoqërisë civile, një bashkëpunim në nivel humanitar përmes organizatash të tilla sikurse janë fondacione të ndryshme dhe Drita e Shpresës.

Krahas këtij bashkëpunimi në nivel të shoqërisë civile me qytetin e Pogradecit kemi edhe një bashkëpunim për zhvillim që po organizohet nëpërmjet strukturave qeveritare sikurse është bashkëpunimi me sektorin Ujësjellës Kanalizime, të zhvillimit të sektorit të turizmit meqënëse jemi pikërisht këtu në sfond me liqenin e mrekullueshëm të Pogradecit. Ne sigurisht për zhvillimin e turizmit, është mjaft i rëndësishëm aspekti i qëndrueshmërisë së tij, ruajtja e natyrës, ruajtja e mjedisit është një pasuri vërtet mjaft e rëndësishme e këtij rajoni.

Një aspekt tjetër i rëndësishëm i zhvillimit të turizmit është bashkëpunimi me vendet rajonale, vendet e rajonit, në rastin e Pogradecit me Maqedoninë e Veriut, nëpërmjet zhvillimit të turizmit në liqenin e Ohrit dhe në atë të Prespës.

Një falenderim i përzemërt nga ana ime i shkon edhe administratës së bashkisë të Pogradecit dhe zëvendës kryetares së bashkisë që na mirëpriti sot. Duhet të theksoj gjithashtu që është një kënaqësi vërtet e madhe të dalësh të shikosh qytete të tjera sikundër është Pogradeci, sepse e dimë që Shqipëria është shumë më tepër sesa thjesht vetëm Tirana”, tha ambasadori.

Zhvillimi i turizmit është një nga aspektet më të rëndësishme të këtij bashkëpunimi, një aspekt që ambasadori Bergner i ka dhënë shumë fokus ku ndër të tjera ka falenderuar bashkinë dhe ka theksuar faktin se Shqipëria nuk është vetëm Tirana.

“Pra është kënaqësi tju njoftoj se së bashku me zv/kryetaren e bashkisë do të mund të vizitoj gjatë ditës së sotme edhe disa prej vendeve ku zhvillohen disa nga projektet tona të përbashkëta për të krijuar një përshtypje të drejtpërdrejtë me mënyrën se si janë duke u zhvilluar ato.

Më lejoni të kërkoj lejën tuaj në një farë mënyre të mos u përgjigjem pyetjeve që kanë sfond politik. Në fakt unë sot kam ardhur për të parë projektet e bashkëpunimit të Gjermanisë dhe qytetit të Pogradecit dhe kërkoj mirëkuptimin tuaj”, u shpreh ambasadori.

Ambasadori gjerman do të jetë prezent edhe në aktivitetin e pasdites, ku do të kryhet parada e motorristëve shqiptarë dhe gjermanë, si edhe do të ketë një koncert në zonën e pedonales./ CNA





Lajmet e fundit nga