Festë dhe bamirësi/ Motoristët gjermanë dhe shqiptarë, performancë në Pogradec

15 Maj 2024, 14:41, Qyteti im CNA

Këtë të martë Pogradeci mori një tjetër pamje e atmosferë festive. Motoristë gjermanë e shqiptarë u bashkuan në pedonalen e qytetit me performancën e tyre duke treguar sërish miqësinë që ata kanë prej më tepër se 2 vitesh tashmë. Në aktivitetin festiv ka marrë pjesë edhe ambasadori gjerman, Karl Bergner, i cili prej paradites së djeshme, ka vizituar Bashkinë e Pogradecit, njësinë administrative Buçimas e ka vazhduar vizitën e tij edhe në vende të tjera të bukura në qytet. 9 kamionë me ndihma janë sjellë nga shoqata e motoristëve gjermanë për t’u shpërndarë në zonën e Mokrrës, në shkollat, kopshtet dhe qendrat ambulatore të fshatrave të thella.

Juliana Dita është ajo që bëri të mundur lidhjen e kësaj shoqate për shkak se prej vitesh ajo punon në Gjermani, duke dashur që qyteti i radhës për bamirësi të jetë qyteti i saj, Pogradeci.

Festë dhe bamirësi/ Motoristët gjermanë dhe shqiptarë,

Dita tregon se si ra në kontakt me gjermanët e më pas si u realizua ideja në vitin 2022 për herë të parë.

"Në radhë të parë ju falënderoj për intervistën dhe siç e kam theksuar edhe para dy vitesh, kjo shoqatë është mysafire në restorantin ku unë drejtoj dhe menaxhoj me pronar Valdet Ramën në Gjermani dhe gjatë bisedës i kam pyetur për misionin që bënin. Më treguan që ndihmojnë vendet e Ballkanit duke çuar pajisje për spitale, për shkolla e kopshte dhe sigurisht më lindi ideja për të ndihmuar qytetin tim Pogradecin. Këtë nismë ne e finalizuam në vitin 2022 dhe rrallë ndodh që këta të shkojnë dy herë për një kohë kaq të shkurtër në të njëjtin vend."

Më tej Juliana shton se dy nga mësuesit e zonës së Mokrrës e kanë kontaktuar duke i treguar gjendjen e shkollave në këtë zonë, pikërisht këtu Juliana vendosi ta bisedonte sërish me shoqatën e motoristëve për të sjellë sërish ndihma në Pogradec.

Festë dhe bamirësi/ Motoristët gjermanë dhe shqiptarë,

"Duke parë situatën në disa fshatra dhe në disa shkolla të fshatrave, këtu dua të falënderoj dy mësues shkolle, Mikael Ymeraj dhe Eftinoj Jakupi, të cilët më kanë ndaluar një ditë në rrugë dhe më thanë: ‘Juliana, ne kemi nevojë për pajisje për shkollat tona, për banka e karrige.’ M’i çuan me foto dhe unë e bisedova përsëri me shoqatën, me kryetarin e saj dhe u votua nëse do t’i sillnin përsëri ndihmat në Pogradec. Me shumicë votash u votua që të silleshin përsëri këtu. Janë 9 kamionë që kanë ardhur me pajisje për shkolla, kopshte, për invalidët dhe shumë të tjera. Pjesën më të madhe kemi dëshirë që ta shpërndajmë në Mokërr, në fshatrat e thella, por edhe në qytet gjithashtu."

Hannes Nielsen është një prej motoristëve, pjesë e shoqatës, i cili shoqëroi bashkë me miqtë e tij kamionët prej Gjermanisë drejt Pogradecit. Ai tregon se qyteti i Pogradecit i ka pëlqyer shumë, ndonëse hera e parë që e viziton, por fjalët e mira të thëna nga miqtë e tij e kanë bërë që të vijë me entuziazëm në këtë qytet. Nielsen tregon ndihmat e sjella këtë herë në Pogradec, ndërsa premton se do të kthehen edhe herë tjetër në ndihmë të qytetit.

Festë dhe bamirësi/ Motoristët gjermanë dhe shqiptarë,

"Më pëlqen shumë Pogradeci. Për mua është hera e parë këtu, por kam dëgjuar fjalë shumë të mira dhe ja ku jam. Më pëlqen dhe i kaloi pritshmëritë e mia. Kësaj radhe kemi sjellë më së shumti materiale për shkolla dhe kopshte, për të vegjlit, të cilët janë e ardhmja e vendit. Po ashtu, edhe disa gjëra për të moshuarit në mënyrë që të kujdesemi për ta. Jemi gjithmonë të lumtur për faktin që ndihmojmë, çdokush prej nesh ka dëshirën e madhe për të ndihmuar e për të qenë bujarë. Jemi shumë të lumtur që këtë gjë po e bëjmë në Pogradec, kemi miq, njohim njerëz për të ardhur këtu përsëri, si edhe për të vazhduar bashkëpunimin dhe miqësinë tonë. Me shumë mundësi po, kjo është hera e dytë që vijmë dhe s'ka arsye përse të mos vijmë për herë të tretë apo të katërt. Më pëlqen shumë këtu, njerëzit janë shumë të këndshëm e miqësorë, kemi marrë një mikpritje të ngrohtë nga Dritani dhe të tjerët në qytet, nga policia dhe njerëzit në hotel. Me të vërtetë që është shumë këndshëm këtu dhe shumë bukur."

Vetëm pak ditë me parë, në CNA TV trajtuam ekskluzivisht detaje nga organizimi, ku mes një interviste, kryetari i shoqatës së motoristëve të Pogradecit, Dritan Hoxha, tregoi shumë mbi këtë aktivitet.

Bamirësi dhe festë në Pogradec/ Detajet e aktivitetit të motoristëve shqiptarë dhe gjermanë
10 Maj, 23:17

Edhe në intervistën e radhës, Hoxha shprehet mjaft i entuziazmuar për këto lloj aktivitetesh që hedhin poshtë mitin e krijuar se në Pogradec ka vetëm të moshuar.

"Koha nuk po na ndihmon edhe shumë, por paradën do ta bëjmë, do të bëjmë edhe një spektakël me motorë, i kemi përgatitur disa çuna për këtë. Mendoj edhe vetë të marr pjesë, nuk e di sa i zoti do të jem për shkak të aksidentit që sapo kalova kështu që mendojmë se do ta zbukurojmë festën. Janë 10 motoristë që kanë ardhur me motorë nga Gjermania në Shqipëri që shoqëruan kamionët. Pogradeci nuk është qytet pleqsh, nuk e di pse na kanë etiketuar në këtë formë, ndërkohë që në Pogradec kanë ardhur këngëtarët më të famshëm në Shqipëri e në Ballkan. Kanë performuar qoftë këtu, qoftë në operatorë të tjerë turistikë. Pogradeci gjatë gjithë verës ka superspektakle, s'them vetëm me motorë sepse ne kemi edhe spektakle me windsurf në liqen, motocross. Patjetër që ka të rinj në Pogradec, nëse doni ta shikoni këtë, ju mirëpres ta shikoni pas pak."

Festë dhe bamirësi/ Motoristët gjermanë dhe shqiptarë,

Parada e rreth 45 motoristëve dhe performanca e tyre u zhvillua në pedonalen e qytetit të Pogradecit, e më pas të gjithë të pranishmit u zhvendosën drejt Sherlock Irish Pub për të shijuar mbrëmjen me Urban Band, DJ Erioni dhe DJ Genti. Pogradeci edhe këtë sezon turistik pritet të ketë aktivitete të shumta që do të afrojnë në zonë shumë turistë vendas e të huaj./ CNA TV