Fotot-Dy perlat e Adriatikut, destinacionet që nuk duhen humbur!

23 Qershor 2024, 12:29, Qyteti im CNA

Fotot-Dy perlat e Adriatikut, destinacionet që nuk duhen humbur!

Rana e Hedhun, foto ilustruese

Shqipëria është një nga destinacionet perfekte si për turizëm malor apo bregdetar dhe kulturor.

Shqipëria ka një vijë bregdetare prej 450 km që lag brigjet perëndimore të Shqipërisë, duke u shtrirë përgjatë detit Adriatik dhe Jon.

E pasur me bukuri të shumta natyrore, me plazhe ranore të cekëta në veri dhe plazhe me gurë dhe të thellë si në pjesën jugore të saj.

Ata që dëshirojnë të eksplorojnë bregdetin e Adriatikut, e kanë zgjedhjen e tyre midis plazheve të njohura të Velipojës, Shëngjinit, Durrësit, Golemit, Spillesë dhe Divjakës.

Përveç plazheve, vizitorët që janë vëzhgues të pasionuar të shpendëve ose të interesuar për eko-turizmin, mund të eksplorojnë lagunat e pasura të bregdetit të Adriatikut dhe ekosistemet e tjera natyrore.

Plazhi i Velipojës

Foto e marrë nga "Facebook"-u i kryeministrit Edi Rama

Ky është një nga plazhet më të njohura të qytetit të Shkodrës.

Ndodhet 22 km larg qytetit të Shkodrës. Zona sheh rreth 250 ditë me diell në vit dhe nga mesi i majit temperaturat normalisht rriten mbi 20°C.

Plazhi i Velipojës është edhe kurativ pasi 4 km rërë e tij është cilësore duke e kthyer në një vendpushim të përshtatshëm për familjet me fëmijë.

Rana e Hedhun, një perlë e Shëngjinit

Foto e marrë nga Google

Në jug të bregdetit të Velipojës shtrihet plazhi i Shëngjinit, një tjetër breg ranor, i cili ndodhet pesëmbëdhjetë minuta me makinë nga qyteti historik i Lezhës. Me rërën e tij të imët dhe rreth 200-300 ditë me diell në vit, plazhi i Shëngjinit është një tjetër i preferuar vendas. Në veri të Shëngjinit, i mbrojtur nga erërat e zonës nga një kurorë kodrash, vizitorët mund të zbulojnë plazhin e mrekullueshëm të Ranës së Hedhun (Rërë pluhur).

Rana e Hedhun si plazh është formuar nga veprimi i erës në rërën pranë shpatit të malit shkëmbor duke formuar duna ranore, që janë deri në rreth 50 metra të larta, deri në 600 metra të gjata dhe rreth 100 metra në thellësi të bregut të detit.

Një sipërfaqe prej gjashtë hektarësh përreth dunës u shpall monument natyre në vitin 2002.

Në verë, pushuesve u pëlqen të vizitojnë dhe të ngjiten në dunën e ranës, e cila mund të përshkohet vetëm në këmbë./ CNA