E fundit!

14:54 Politikë

"Nuk mjafton produkti formal, por përmbajtja"/ Debat Boçi-Mazniku për afatin e Reformës Territoriale

Këtë të mërkurë po mbahet seanca e radhës e Komisionit të ...

Galeria e Arteve Digjitale/ Dallto sjell "Undinus" në Korçë, bota nënujore

30 Qershor 2024, 15:31, Qyteti im CNA

Përmes Galerisë së Arteve Digjitale, Korça ka mundësinë të shfaqë një lloj tjetër arti, të veçantë dhe të mrekullueshëm. Për herë të parë në këtë qytet u shfaq mbrëmjen e së shtunës ekspozita imersive "Undinus", e ideuar dhe projektuar nga artisti Willred Dallto. Përvoja e botës nënujore e parë nga syri i këtij artisti digjital, është finalizuar pas 3 muajsh përgatitjesh dhe pune, së bashku me artistin 3D Noel Çela dhe dy artistët e talentuar Era Canaj e Gent Shahini që krijuan kolonën zanore origjinale për këtë projekt.

Për disa minuta, të apasionuarit pas artit digjital kanë shijuar pamjet e mrekullueshme nën ujë si dhe kanë eksploruar së bashku me personazhin kryesor të projektit, botën nënujore.

Galeria e Arteve Digjitale/ Dallto sjell "Undinus" në

Galeria e Arteve Digjitale, burimi CNA

Artisti Willred Dallto prej 8 vitesh zhvillon pasionin e tij për artin digjital, ndonëse studimet i ka mbaruar në një fushë komplet ndryshe në Gjermani, për lëndën e biologji - kimi. Këto studime nuk e ndaluan të vazhdonte edhe pasionin e tij, duke u bërë sot një nga artistët më të veçantë.

Në një intervistë për CNA TV, Dallto tregon më shumë për projektin që solli në qytetin e Korçës.

"'Undinus' është një eksperiencë imersive artistike që është i përfytyruar si një udhëtim nën ujë, ku në mënyrë simbolike përfaqëson rrugëtimin dhe eksplorimin e artistit. Duke qenë se unë jam një artist digjital, te ky projekt do ekspozohen 8 punë të artit digjital ku midis çdo pune është ndërthurur një histori e një personazhi kryesor, që noton nën ujë duke kërkuar për përmbushje shpirtërore siç është dhe arti në vetvete", deklaroi artisti.

Galeria e Arteve Digjitale, burimi CNA

Një ndihmesë shumë e madhe në finalizimin e kësaj ekspozite imersive ka qenë edhe artisti 3D, Noel Çela. Për rreth 3 vite, ai është përqendruar tek arti digjital, duke nxjerrë në pah këtu edhe pasionin për këtë fushë të veçantë që gjendet rrallë në artistët shqiptarë.

Çela tregon se ky projekt ka qenë i mbushur me shumë sfida, ku pjesën më të madhe janë kujdesur për të dhënë sa më qartë mesazhin dhe ndjesinë e udhëtimit, duke futur elementë edhe të ndjesive fëminore me sirenat që pëlqeheshin aq shumë në fëmijëri.

Galeria e Arteve Digjitale, burimi CNA

Në karrierën e tij artistike, për Noelin është hera e parë që ka marrë pjesë në një projekt të këtij niveli, duke theksuar edhe faktin se ky lloj arti duhet të promovohet sa më shumë për të thithur të rinj drejt kësaj fushe, pasi edhe arti digjital të jep kënaqësi të mëdha shpirtërore, kënaqësi që duhet të kenë mundësi t’i përjetojnë të rinjtë shqiptarë.

"Undinus" është një nga ekspozitat më të bukura që është shfaqur pranë Galerisë së Arteve Digjitale në qytetin e Korçës./ CNA TV