E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

“Festivali i Filmit Ballkanik dhe Kulinarisë”/ Milkani: Prodhimtaria e filmit në Shqipëri, në rrugën e duhur

26 Qershor 2024, 14:41, Qyteti im CNA

“Festivali i Filmit Ballkanik dhe Kulinarisë”/ Milkani:

Regjisori e producenti, Eno Milkani. Burimi, CNA

Mbrëmjen e djeshme ka startuar në Pogradec "Festivali i Filmit Ballkanik dhe Kulinarisë", në edicionin e tij të 14-të. Ky festival është një ndër më të veçantët në qytetin liqenor, pasi bën bashkë për 4 ditë radhazi, regjisorë, producentë dhe studentë të kinematografisë, të cilët konkurrojnë në dy kategori, atë të filmave të shkurtër dhe atë të filmave të gjatë. Regjisori e producenti Eno Milkani shpreh kënaqësi teksa thekson se prodhimtaria ka hyrë në rrugën e duhur në Shqipëri.

Sipas tij, shumë filma po prodhohen më shumë në mënyrë të pavarur sesa nga studentët që mbarojnë shkollën. Në këtë festival, tematikat që përmbajnë filmat e realizuar lidhen me problemet e aktualitetit, për të rinjtë dhe marrëdhëniet me prindërit, për moshën e tretë, për problemet e shëndetit mendor e shumë të tjera.

"Festivali i Filmit Ballkanik dhe Kulinarisë", burimi CNA

“Këtë vit është rritur prodhimi i filmave për faktin që ka shumë indipendentë që punojnë, shkolla e filmit është shumë e domosdoshme, por të mos harrojmë që ka njerëz, të cilët janë autodidaktë e mësojnë shkollën nga ‘YouTube’ dhe bëjnë superfilma. Dhe vë re që shumë filma cilësorë nuk janë filma të studentëve, por indipendentë dhe biles vijnë edhe shumë filma të gjatë që janë indipendentë dhe kjo gjë të bën të mendosh që Shqipëria ka filma të tillë, janë komercialë dhe jo autorë, por mendoj se shumë shpejt do të kemi edhe filma autorë sepse koha ecën, ti nuk do të presësh më financimin e qendrës së filmit apo bashkëprodhuesit, sepse e gjitha është çështje lekësh, ndaj mendoj se kur këta autorë të gjejnë mbështetjen e nevojshme, do të kemi më shumë filma të tillë. Sa u përket filmave që kemi në konkurrim këto 4 ditë, janë filma që trajtojnë tema të ndryshme, të të rinjve, të moshës së tretë, tema sociale, të problemeve midis babait dhe fëmijëve, ngacmimet seksuale, filma që trajtojnë çështje të problemeve mendore, pra është një gamë shumë e gjerë.

Jo vetëm filma në konkurrim, por këtë vit në bashkëpunim me Arkivin Shtetëror të Filmit, është menduar që filmat shqiptarë të restauruar të shfaqen të titruar në anglisht për turistët e huaj.

Gerta Qurku, burimi CNA

“Filmat që do të shfaqen në ‘Odeon’ janë filma të restauruar shqiptarë, të titruar në anglisht për të gjithë pushuesit që nuk janë shqipfolës, në këtë sezon turistik që ka filluar tashmë në Pogradec, për këtë kemi pasur mbështetjen e Arkivit Qendror të Filmit Shqiptar. Jemi shumë të lumtur dhe mezi po e prisnim ta fillonim këtë edicion të 14-të”.

Ky festival tashmë i përket Pogradecit dhe krahas filmave është një promotor shumë i mirë i qytetit, kulinarisë dhe vlerave kulturore që ky qytet ka. Nënkryetarja e bashkisë, Entela Gusho, thotë se në këtë moment, Pogradeci është epiqendra e Ballkanit.

Nënkryetarja e bashkisë, Entela Gusho. Burimi, CNA

“Është edicioni i 14-të që Festivali Ballkanik i Filmit zhvillohet në Pogradec, tashmë mund të quhet edhe festivali i Pogradecit sepse janë 14 vite që ky festival shpalos vlerat jo vetëm artistike të filmave të Ballkanit, por edhe kulturën e gjithsecilit që merr pjesë në këtë festival. Në këto momente ne jemi epiqendra e Ballkanit ku të gjithë janë me sy dhe mendje në Pogradec. Pra, Pogradeci do të jetë Pogradeci i filmit, turistëve, luleve, freskisë dhe i të gjithëve. Vetë festivali ka edhe vazhdimësinë e kulinarisë, shpalosja e këtyre vlerave janë edhe një promovim për qytetin tonë, për t’i njohur sa më shumë vlerat e tij edhe në art, kulturë, por edhe pogradecarët si artdashës.”

Festivali i Filmit do të mbyllet në datë 29 qershor, ku do të ndahen edhe çmimet për filmin më të mirë me metrazh të gjatë, të shkurtër dhe dokumentar. Festivalin e preferojnë edhe qytetarët pogradecarë, së bashku me turistë vendas e të huaj, që janë mbledhur në sheshin “Odeon” për të ndjekur filmat e realizuar./ CNA TV