web counter
LEXO PA REKLAMA!

SHKARKO APP

App Store
Google Play

E fundit!

x

Vëllezërit Prifti sjellin festën në Korçë/ Performojnë në natën e parë të “Festivalit të Serenatave”

27 Shtator 2024, 21:34, Qyteti im CNA

Vëllezërit Prifti sjellin festën në Korçë/

Korça ka çelur siparin e festivalit të serenatave këtë të premte  për të gjithë korçarët dhe vizitorët që dashurojnë serenatat. Tradita e hershme e trashëguar brez pas brezi, me tingujt e ëmbel që krijohen nga telat e kitarave I kanë sjellë Korçës atmosferën më të veçantë të krijuar si kurrë më parë. Dhe nuk kishte si të mungonin në këtë mbrëmje festive dy vëllezërit Endri dhe Stefi Prifi,  të cilët ndezën atmosferën në pazarin e vjetër të Korçës ku performuan për qindra qytetarë.

Pak para se të dilnin në skenë dy vëllezërit korcarë ndanë ndjesitë e tyre për mikrofonin e CNA.

“Nuk ka arsye pse të mungojmë, bile po na “shfrytëzojnë” që eventet e mëdha t’i hapim ne. E kupton apo jo? Po bëjmë shaka! Falënderojmë Bashkinë e qytetit për ftesën dhe organizatorët, që mesa di janë pjesë e Pallatit të Kulturës në qytetin e Korçës. Kur na bëjnë ftesa të tilla, sidomos për qytetin dhe Korçën, nuk themi jo. Vijmë me shumë kënaqësi, respekt dhe dashuri për serenatën. Mendoj që festivali i serenatës si ide është viti i parë që organizohet, por besoj se ka për të shkuar shumë larg dhe për t'u bërë një nga festivalet më të ndjekura. Ndoshta në të ardhmen, brenda kësaj ideje, në vitet në vijim mund të ketë ide të tjera që mund ta pasurojnë edhe më shumë si festival. Kjo është një ndjesi e imja për të ardhmen”, tha Stefi Prifti.

“Unë ndihem si para një koncerti me emocione të dashura dhe të bukura. Mezi pres të ngjitem në skenë, të marr mikrofonin, të këndoj dhe t’i japim publikut atë që i japim gjithmonë me dashuri, me djersë dhe me shpirt.

Dy vëllezërit thanë se festivali i serenatave është një iniciativë e bukur, që duhet të përsëritet pasi sjell më shumë alegri për vendasit dhe të huajt. Nuk ka tjetër kush ta çelë këtë lloj festivali. Serenatat, mesa di unë, vetëm në Korçë këndohen dhe do të këndohen përjetësisht. Bravo qytetit, bashkisë dhe organizatorëve që marrin iniciativa kaq të bukura, që e bëjnë qytetin të lumtur, njerëzit të dashur, të dalin të festojnë, të argëtohen, të largohen nga problemet dhe hallet, nga streset që japin në televizor vetëm me politikë. Njeriu ka nevojë për muzikë”, u shpreh Endri Prifti.

Para se të elektrizonin skenën, Endri dhe Stefi Prifti dhanë një mesazh të fundit për publikun përmes CNA.

Endri Prifti: I love Korça!

Stefi Prifti: Mesazhi për CNA dhe gjithë publikun që ju ndjek është që ta duam muzikën shqiptare, t’i duam vlerat që kemi dhe, në veçanti, meqë bëhet fjalë për serenatën, ta duam serenatën korçare. Faleminderit!

Përgjatë dy netëve në rrugët e Korçës dhe në zonën e Pazarit të Vjetër të qytetit premtohet muzikë e mirë dhe performancat live të artistëve që rikthejnë në jetë meloditë e vjetra të ruajtura me fanatizëm ndër vite./ CNA





Lajmet e fundit nga