Muharrem Mekos, një letër për ditëlindje

20 Shtator 2024, 20:05, Qyteti im Elvi FUNDO

Nuk do të ishte aspak e vështirë t’i hidhja këto rreshta në “Facebook”, të hidhja dhe një foto me personin që i dedikohet ky shkrim, por jo thjesht për të krijuar një titull.

Qëllimi im është për të treguar se përtej politikës, përtej ndasive, përtej sherrnajës së ditës, thashethemeve, përtej hajdutërive, konflikteve, përçarjeve, korrupsionit, skandaleve që bëhen nga njerëzit edhe në qytetin tim lindjes në Korçë si kudo, ka dhe njerëz që bëjnë diferencën.

Këto rreshta po i shkruaj për 70-vjetorin e një “komunisti” që unë shpesh i them shoku Muharrem Meko.

Muharrem Meko

Ah, mund të jetë komunist në bindje, por në fakt është një socialist i vërtetë dhe një nga ata njerëz për të cilët duhet të jesh krenar që e ke mik.

Ka qenë zyrtar, drejtues i PS-së.

Sot mbush 70-vjetorin, ka dalë në pension, por për njerëz si ai pensioni nuk ekziston.

Ka drejtuar televizionin e Korçës, korrespondent i “Zërit të Popullit”, drejtues politik, i majtë i thekur, dikur ushtarak.

Kurrsesi deri më sot, askush nuk ka ngritur gishtin ndaj tij ta akuzojë, edhe pse ka mbajtur poste publike. Qoftë për korrupsion, qoftë për ndonjë aferë, apo për një kafe të vetme.

Muharrem Meko

Muharremi ka mbetur ai që ka qenë. Me miq dhe shokë nëpër tavolina dhe ajo që kërkon është të ndihmojë apo punësojë të rekomandojë apo dhe të mbrojë publikisht sa më shumë djem të rinj, djem me kontribute, njerëz të ndershëm, këtë e bën gjithmonë, nuk ka rëndësi shumë ndasia politike për të.

Tashmë mosha dhe fisnikëria të bën të mendosh ndryshe nga dje.

Ka qenë një penë e ashpër, e hidhur, e tmerrshme. Vitet kalojnë, pena jo vetëm që nuk i është zbutur, por i është bërë edhe më e bukur, më e drejtë, më dinjitoze, më e fortë dhe më e qartë.

Kur jep një mesazh të thjeshtë dhe të përsëritur duhen të rinj në politikë, na duhen djem vizionarë, duhet të hapet politika, duhet qytetaria, duhet kultura, duhet respektuar kontributi, duhen njerëz të ndershëm.

Muharrem Meko

Këtë nuk e thotë gjatë kohës që partia e tij është në opozitë, por e thotë gjatë kohës që PS është në pushtet.

Ai ka drejtuar këtë forcë politike në Korçë për disa vite.

Unë këto rreshta i shkrova edhe si mik, edhe si bashkëpunëtor, edhe si një dashamirës, jo vetëm person i imi, por dhe i CNA-së, një media e hapur nga unë, por që sot, në kaq vite, kanë kaluar dhjetëra gazetarë, drejtorë dhe menaxhohet nga njerëz me eksperiencë dhe profesionistë, por që Muharrem Meko i vlerëson, i falënderon për çdo shkrim që i publikohet. Ndërhyn me këshilla për TV ka ngelur klasik do gazetat ne mëngjes. Lexon portale e tjer politikë. Në fakt tani si usta.

Mund t’i bëja dhe ndonjë letër dhe t’ia nisja, por më mirë një shkrim më i plotë, me pak fjalë, që të ngelet në kujtesë, jo thjesht 70-vjetorin e Muharrem Mekos, por për të përçuar një mesazh, atë që e thotë shpesh Muharremi.

Muharrem Meko

Të rinj shumë duhen në politikë, por duhet të ecin me mençurinë e të vjetërve e atyre me më shumë eksperiencë.

T’i dëgjojnë për t’u korrigjuar, të jenë më të hapur, të jenë më me vlera, më familjarë, më qytetarë. Të mos ngushtësohen dhe të shohin vetëm xhepin e tyre. Por të shohin përtej xhamit, përtej fasadës, përtej kolltukut.

Ndaj dhe këto rreshta ia dedikova Muharrem Mekos për qytetarinë e tij si një kolonjar i mirë, për vlerat e tij politike që sot i ka më të mëdha se kurrë, edhe kur bashkë kemi qenë kundërshtarë dhe jemi përplasur, ku me të drejtë ku pa të drejtë, pa asnjë diskutim, të gjitha fajet po i marr unë. Jo si me i vogël, por si reflektim.

Për t’i uruar publikisht Muharrem Mekos edhe në audiencën e CNA-së: Edhe 100 vite të tjera zoti Meko, tashmë gjysh! Të kesh shëndet dhe mbarësi dhe unë besoj që urimit tim i bashkohet edhe stafi i CNA-së dhe shumë kolegë gazetarë. Në mënyrë të veçantë nuk do të harroj të përmend këtu “maloku” tënd Tonin Frrokun, mikun tonë të përbashkët, dhe të urojmë gjithë të mirat.

Muharrem Meko

Mos e ndal penën, mos e ndal mirësinë dhe në përfundim mos ndal as debatet me rilindasit dhe me 99-çat që ti më të vërtetë në politikë i shikon si një problem dhe një shqetësim për vendin dhe të ardhmen e Shqipërisë.

Mos e ndal penën tënde edhe në këtë datëlindje për të vërtetat që i thua, për mënyrën si i thua, duke treguar qytetarinë, kulturën, vlerat e traditës dhe origjinës tënde, por në mënyrë të veçantë se si duhet ta kemi një mik, një shok, një qytetar, një gazetar dhe një politikan që ndoshta si ti në moshën 70-vjeçare mirë do të ishte të kishim shumicën e këtyre të rinjve në politikë apo në media.

Edhe njëherë urime, jetë të gjatë mes miqsh, shokësh, me nipër, me mbesa, me djemtë e tu, me familjen tënde të shtrenjtë dhe miqësisht unë personalisht jam krenar që jam miku yt, që bashkë diskutojmë, debatojmë dhe besoj dhe stafi i CNA-së dhe shumë gazetarë, kolegë në Korçë, bashkëpunëtorët e tu ndër vite janë me kokën lart që janë miqtë e tu dhe unë e them me krenari: “Po, unë jam miku i Muharrem Mekos! Edhe 100 miku im!”