web counter
LEXO PA REKLAMA!

SHKARKO APP

App Store
Google Play

E fundit!

x

Lagjja "muze" e Pogradecit/ Projekti, që do të rivitalizojë zonën

11 Tetor 2024, 15:22, Qyteti im CNA

Lagjja “muze” e Pogradecit, e njohur ndryshe si Topleci, me një kulturë mbi 200-vjeçare, prej vitesh nuk e njohu dorën e investimeve, por duket se tashmë nëpërmjet një projekti shumë të rëndësishëm, do të bëhet rivitalizimi i kësaj zone. Në këtë lagje kanë jetuar korifenjtë e letërsisë, Lasgush Poradeci e Mitrush Kuteli, ndërsa rrugët me kalldrëm dhe burimet e ujit janë ato që e bëjnë të veçantë këtë zonë, duke e kthyer në lagje simbol të qytetit.

Në projektin që do të nisë investimet në nëntor, ndërhyrja do të jetë në dy zona, në lagjen Toplec dhe në rrugën “Naim Frashëri”. Sipas nënkryetarit të Bashkisë së Pogradecit, Paskalino Ziko, ky investim arrin në vlerën e 6.5 milionë dollarëve, financuar nga qeveria përmes Fondit Shqiptar të Zhvillimit, ndërsa momentalisht projekti është në fazën e prokurimit.

“Është një ndër projektet më të rëndësishme që do të zhvillohet në Pogradec. Projekti përfshin rehabilitimin total të dy lagjeve, që kanë statusin e qendrës historike, të cilat janë rruga “Naim Frashëri” dhe lagjja Toplec. Investimi kap vlerën e 6.5 milionë dollarëve, financuar nga qeveria përmes Fondit Shqiptar të Zhvillimit. Projekti është në fazën e prokurimit dhe pas kësaj procedure pritet të fillojë ndërhyrja në qendrën historike të Pogradecit.”

Nënkryetari i Bashkisë Pogradec jep detaje sa i përket këtij investimi, duke treguar se projekti parashikon rehabilitim të fasadave, infrastrukturës tokësore dhe sipërfaqësore të rrugëve. Nga ana tjetër do të ketë ndërhyrje në fasadat e 100 banesave, ku në lagjen Toplec disa prej tyre janë monumente kulture të kategorisë së parë.

“Projekti parashikon rehabilitim të fasadave, infrastrukturën nëntokësore dhe atë sipërfaqësore të rrugëve, të cilat do të shtrohen me kalldrëm. Do të transformohen fasadat e rreth 100 shtëpive, do ndërhyhet për restaurimin e çative, vetratave, dritareve. Do restaurohen banesat e lagjes Toplec, ku disa prej tyre janë monumente kulture të kategorisë së parë. Këtu ndodhen shtëpia e Lasgush Poradecit, Mitrush Kutelit, si dhe ndërtesa e shkollës së dytë shqipe.Projekti pritet të nisë në nëntor dhe do të përfundojë brenda 14 muajve.”

Nëpërmjet këtij investimi madhor, qëllimi dhe synimi është që kjo zonë historike e Pogradecit të kthehet në një pol të rëndësishëm turistik. Transformimi i lagjes muze do të mundësojë edhe kthimin e ndërtesave në bujtina, bare e biznese që do të jenë në funksion të turizmit. Paskalino Ziko ka theksuar se do të kujdesen për ruajtjen e identitetit të ansamblit urbanistik, pasi gjatë këtyre viteve ka pasur ndërhyrje në objekte nga banorët që kanë prekur arkitekturën e zonës.

“Projekti synon ta kthejë zonën historike të Pogradecit në një pol të rëndësishëm turistik, që do t’i shërbejë zhvillimit të turizmit. Ky transformim do të synojë kthimin e ndërtesave të restauruara në bujtina, bare, biznese, në funksion të turizmit. Gjatë këtyre 30 viteve edhe në qendrën historike si kudo ka pasur ndërhyrje në objekte nga banorët, të cilat kanë prekur arkitekturën e qendrës historike. Për këto struktura të ndërtuara në kundërshtim me rregulloren e qendrës historike projekti parashikon edhe prishjen e tyre, ose integrimin në përshtatje me arkitekturën e zonës.Restaurimi i objekteve të qendrës historike do të synojë ruajtjen e identitetit të ansamblit urbanistik.”

Projekti i financuar nga qeveria në bashkëpunim me Fondin Shqiptar të Zhvillimit pritet të nisë në nëntor të këtij viti e të përfundojë për një periudhë 14-mujore. Ky është një nga projektet më të rëndësishme për Pogradecin, pasi do t’u kthejë lagjeve muze shkëlqimin që ato kanë pasur dikur./ CNA





Lajmet e fundit nga