web counter
LEXO PA REKLAMA!

SHKARKO APP

App Store
Google Play

E fundit!

x

Escobar, kundër socialistëve/ Kujdes me SPAK-un

5 Shkurt 2024, 10:29, Politikë CNA
Escobar, kundër socialistëve/ Kujdes me SPAK-un
Zv.ndihmëssekretari amerikan i shtetit, Gabriel Escobar

Një grup deputetësh të mazhorancës dhe opozitës ditët e fundit kanë udhëtuar drejt SHBA-së, për të qenë të pranishëm në “Mëngjesin e Lutjeve”.

Deputetët e pranishëm kanë qenë Gazment Bardhi, Pandeli Majko, Damian Gjiknuri, Blerina Gjylameti dhe Dhurata Çupi.

Grupi i deputetëve ka zhvilluar takime me disa kongresmenë dhe senatorë dhe si më i rëndësishmi prej tyre ka qenë takimi me zv.ndihmëssekretarin amerikan të shtetit, Gabriel Escobar.

Burime diplomatike i thanë CNA-së se zoti Escobar ka qenë i ashpër në qëndrimin e tij me deputetët shqiptarë në lidhje me hapat e ndërmarrë nga mazhoranca për ngritjen e një komisioni “Ad-Hoc” që do të çonte në kontrollin e SPAK-ut.

Escobar, kundër socialistëve/ Kujdes me SPAK-un

Zoti Escobar i ka quajtur të rrezikshme për demokracinë dhe të gabuara veprime të tilla që minojnë besimin dhe ecjen përpara të drejtësisë së re, aq shumë e mbështetur dhe e financuar nga SHBA dhe partnerët evropianë.

CNA denoncoi në datën 17 dhe 18 janar tentativën e mazhorancës për ngritjen e një komisioni “Ad-Hoc”, në drejtimin e ish-ministrit Fatmir Xhafaj, komision, i cili në emër gjoja të procesit të integrimit në BE do të bënte kontrollin e SPAK-ut, për të mbajtur më shumë nën presion institucionin, i cili po bën luftën ndaj korrupsionit dhe ka në hetim dosje të nxehta për zyrtarët e lartë të mazhorancës, ministrat e Ramës, etj.

Escobar, kundër socialistëve/ Kujdes me SPAK-un
Enver Hoxha dhe Fatmir Xhafaj

Reagimi i zotit Escobar vjen pas një qëndrimi tjetër të fortë publik, bërë në datë nga këshilltari Ligjor në ambasadën e SHBA-së, David Backman, i cili nga Shkodra lëshoi një mesazh mjaft të fortë për klasën politike, duke theksuar se SPAK duhet ruajtur si xhevahir.

Në të njëjtën linjë kanë qenë të gjithë faktorët ndërkombëtarë, të cilët duken të shqetësuar nga veprimet e fundit të mazhorancës, që po zhvillon takime të njëpasnjëshme, duke tentuar të ngrejë një komision në emër të integrimit, por që në thelb ka kontrollin ndaj SPAK-ut.

Escobar, kundër socialistëve/ Kujdes me SPAK-un
SPAK

Zyrtarë të Partisë Socialiste në denoncimin për krijimin e këtij komisioni janë përgjigjur me deklarata të çoroditura. Eduart Shalsi, i cili është deputeti i ngarkuar me ngritjen e komisionit dhe që drejton grupin e punës së mazhorancës, fillimisht nuk e mohoi kontrollin ndaj SPAK-ut, më pas e pranoi dhe pastaj e refuzoi.

Nga ana tjetër, nën zë burime nga PS i thanë CNA-së se agjenda e kontrollit ndaj SPAK-ut vazhdoi me disa takime, i fundit disa ditë më parë, ku morën pjesë Engjëll Agaçi, ministri i Drejtësisë Ulsi Manja, Klotilda Bushka, Ermonela Felaj, ish-ministrja e Drejtësisë, Etilda Gjonaj, ish-ministri i Brendshëm, Fatmir Xhafaj, ish-zv.ministri i Drejtësisë Toni Gogu dhe ministrja e Antikorrupsionit, Adea Pirdeni.

Ndërkohë, një burim zyrtar tha se pritet të ketë takime dhe zhvillime të tjera, kjo pasi kryetarja e Komisionit të Ligjeve Klotilda Bushka është ngarkuar nga kryeministri për të përgatitur draftin për ngritjen e komisionit “Ad-Hoc”. Eduart Shalsi është njeriu që përgatit terrenin brenda administratës së parlamentit.

CNA ka raportuar në vazhdimësi tentativën e mazhorancës për të kontrolluar SPAK-un dhe institucionet e pavarura, iniciativë e cila duket se ende nuk është ndalur dhe ka shqetësuar edhe Departamentin e Shtetit, siç konfirmuan burimet diplomatike./ CNA





Lajmet e fundit nga